DIANE 16

₁Ditogamaano tsa pelo ke tsa motho, mme phetogo ya loleme e tswa mo go Jehofa.

₂Ditsela tsotlhe tsa motho di dintle mo matlhong a gagwe, mme Jehofa o lekanya bokete jwa mewa.

₃Neela Jehofa ditiro tsa gago, mme maikaelelo a gago a tlaa tlhomama.

₄Jehofa o diretse sengwe le sengwe kwa se direlang gone, ee, le e leng baikepi o ba diretse letsatsi la bosula.

₅Mongwe le mongwe yo o pelo e e ikgodisang o sefedisapelo mo go Jehofa, le fa seatla se tshwaragana le seatla, ene ga a ketla a tlhoka petso.

₆Boikepo bo tlhapisiwa bo tlosiwa ke boutlwelobotlhoko le boammaaruri, le gone batho ba kgaogana le bosula ka go boifa Jehofa.

₇E a re fa ditsela tsa motho di kgatlha Jehofa, o tle a dire gore le e leng baba ba gagwe ba agisanye nae.

₈Bonnye, fa bo na le tshiamo, bo molemo bogolo go dibapalo tse dikgolo, fa di se na tshiamo.

₉Pelo ya motho e tlhatlhanya tsela ya gagwe, mme Jehofa ke ene o mo kaelang tshepelo ya gagwe.

₁₀Katlholo ya semodimo e mo dipounameng tsa kgosi, molomo wa yone ga o ketla o tlola mo tshiamisong.

₁₁Selekanyo se se siameng, le dilekanyo tsa pego tse di siameng ke tsa ga Jehofa, dilekanyo tsotlhe tse di bokete tsa kgetse, ke tiro ya gagwe.

₁₂Ke sefedisapelo mo dikgosing go dira boikepo, gonne setulo sa bogosi se nitamisiwa ke tshiamo.

₁₃Dipounama tse di siameng ke natefelo ya dikgosi, mme di rata yo o buang tshiamo.

₁₄Bogale jwa kgosi bo ntse jaaka barongwa ba loso, mme monna yo o tlhalefileng o tlaa bo opela legofi.

₁₅Mo go selweng ke sefatlhogo sa kgosi go na le botshelo, le botsalano jwa yone bo ntse jaaka leru la pula ya kgogolammoko.

₁₆Go molemo jang go bona botlhale bogolo go gouta! Ee, go bapala tlhaloganyo go ka itshenkelwa bogolo go selefera.

₁₇Tsela ya mheru ya mothokgami ke go kgaogana le bosula, yo o dibelang tsela ya gagwe o ipoloka mowa.

₁₈Boikgodiso bo tle bo etelele tshenyego pele, le boipego jwa pelo pele ga go wa.

₁₉Go bo go le molemo go nna boikokobetso le bakgobaladi, bogolo go go kgaogana thopo le babelafadi.

₂₀Yo o elang lefoko tlhoko o tlaa bona molemo, mme le fa e le mang yo o ikanyang Jehofa, o a ba a le sego.

₂₁Yo o tlhalefileng mo pelong o tlaa bidiwa senokopela, mme monate wa dipounama o okeletsa kitso.

₂₂Tlhaloganyo ke motswedi wa botshelo o o tswelelang yo o nang nao, mme kwatlhao ya masilo ke bosilo jwa bone.

₂₃Pelo ya yo o tlhalefileng e ruta molomo wa gagwe, e be e okeletse dipounama tsa gagwe kitso.

₂₄Mafoko a a monate a ntse jaaka lomepa lwa dinotshe, a monate mo moweng, e bile ke phodiso mo marapong.

₂₅Go na le tsela e eketeng e siame mo mothong, mme bokhutlo jwa yone ke ditsela tsa loso.

₂₆Pelo ya dijo ya motho yo o dirang e a mo direla, ka gobo legano la gagwe le a mo patelela.

₂₇Motho yo o seramatla o loga bosenyi, le mo dipounameng tsa gagwe go na le mo go tshwanang jaaka molelo o o fisang.

₂₈Motho yo o lesoko o gasa kgotlhang, le mosebi o kgaoganya ditsala tse dikgolo.

₂₉Motho wa sefepe o fepa wa ga gabo, mme a mo gogele mo tseleng e e seng molemo.

₃₀Yo o budulatsang matlho, ke gore, o loga dilo tsa lesoko, yo o momang molomo o a ba a dirafatsa bosula.

₃₁Tlhogo e e pududu ke serwalo sa kgalalelo, fa e bonwa mo tseleng ya tshiamo.

₃₂Yo o bonya go galefa o gaisa yo o thata, le yo o laolang mowa wa gagwe o gaisa yo o gapang motse.

₃₃Bola bo thelwa mo kobong, mme taolo yotlhe ya jone e tswe mo go Jehofa.