DIANE 4

₁Bomorwaaka, utlwang thuto ya rra batho, lo tlhokomeleng go itse tlhaloganyo; ₂gonne ke lo naya thuto e e siameng; lo se ka lwa tlogela molao wa me. ₃Gonne ke ne ke le morwarre, ke le tlekeetso, ke ratega ke le nosi mo matlhong a ga mme. ₄Rre a nthuta a nthaya a re: “A pelo ya gago e tshegetse mafoko a me; o boloke ditaolo tsa me, mme o tshele: ₅Bapala botlhale, bapala tlhaloganyo; o se ka wa go lebala, le gone o se ka wa tenega mo mafokong a molomo wa me; ₆o se ka wa kgaogana nae, mme o tlaa go tlamela; o mo rate mme o tlaa go direla. ₇Botlhale ke selo se segolo bogolo go dilo tsotlhe; ke gone bapala botlhale: Ee, mo go tsotlhe tse o di bonyeng, o bo o bapetse tlhaloganyo. ₈O mo goletse, mme o tlaa go godisa; o tlaa go isa mo tlotlong, motlhang o mo tlamparelang. ₉O tlaa naya tlhogo ya gago kgopana ya bontlafalo: o tlaa go neela serwalo sa tlhogo sa bontle.”

₁₀Utlwa, morwaaka, o amogele dipolelo tsa me; mme dinyaga tsa botshelo jwa gago di tlaa nna dintsi. ₁₁Ke go rutile mo tseleng ya botlhale; ke go gogile mo ditselaneng tsa thokgamo. ₁₂E tlaa re o tsamaya, dikgato tsa gago ga di ketla di pitlaganngwa, fa o siana, ga o ketla o kgotswa. ₁₃Tshwara thuto thatathata; o se ka wa e lesa; o e tshegetse; gonne ke botshelo jwa gago. ₁₄O se ka wa tsena mo tseleng ya baikepi, o se ka wa tsamaya mo mekgweng ya batho ba ba bosula. ₁₅E thibogele, o se ka wa feta ka yone; o e fapoge, mme o fetele koo. ₁₆Gonne ga ba robale ba e se ba dire bosenyi pele; boroko mo go bone ga boyo, fa ba sa diga bangwe. ₁₇Gonne ba ja senkgwe sa boikepo, ba nwa bojalwa jwa mofine jwa thubakanyo.

₁₈Tselana ya mosiami e ntse jaaka lesedi le le phatsimang, le le phatsimelang pele fela go ya motshegareng o mogolo. ₁₉Mme tselana ya baikepi e ntse jaaka lefifi: ga ba itse se se ba kgopang.

₂₀Morwaaka, tlhokomela mafoko a me; sekegela dipolelo tsa me tsebe. ₂₁A di se tloge mo matlhong a gago; o di bolokele mo sekwalelong sa pelo ya gago. ₂₂Gonne di botshelo mo go ba ba di bonang, di bile di le phodiso fela mo nameng yotlhe ya bone. ₂₃Dibela pelo ya gago ka tlhoafalo yotlhe: gonne matso a botshelo a tswa mo go yone. ₂₄Molomo o o lesoko o o tlose fa go wena, le dipounama tse di kgopo o di beye kgakala nao. ₂₅A matlho a gago a lebele kwa pele, dintshi tsa matlho a gago di lolamele go lebela kwa pele ga gago fela. ₂₆Lekalekanya tsela ya dinao tsa gago, mme ditselana tsotlhe tsa gago di tlhomamisiwe. ₂₇O se ka wa fapogela ka fa ntlheng ya le legolo, kgotsa ya la molema: tlosa lonao lwa gago lo tswe mo bosuleng.