Kgalaletso ya Modimo Mothatayotlhe
1Bakang Jehofa;
gonne go molemo
go opelela Modimo wa rona dipako,
gonne go monate,
mme pako e tshwanetse.
2Jehofa o agelela Jerusalema;
o phutha balatlhiwa ba Iseraele.
3O fodisa ba ba pelo di phatlogileng,
o fapa matsanko a bone.
4O bolela palo ya dinaledi,
o di raya maina tsotlhe fela.
5Morena wa rona o mogolo,
o senatla mo nonofong;
tlhaloganyo ya gagwe
ke mo go se nang kankabetso.
6Jehofa o tshegetsa bapelonomi;
mme o folosetsa baikepi fa fatshe.
7Opelelang Jehofa ka tebogo;
opelelang Modimo wa rona dipako
ka harepe.
8O o khurumetsang legodimo
ka maru,
o o baakanyetsang lefatshe pula,
o o tlhogisang bojang mo dithabeng.
9O fa dikgomo dijo tsa tsone,
le mamphorwana a mahukubu
a a lelang.
10Ga o natefelwe ke thata ya pitse;
ga o na kgatlhego
mo maotong a motho.
11Jehofa o kgatlhega
mo go ba ba mmoifang,
mo go ba ba solofelang
mo boutlwelongbotlhoko jwa gagwe.
12Baka Jehofa, wena Jerusalema;
baka Modimo wa gago wena Sione.
13Gonne o thatafaditse mephakalego
ya ditswalo tsa gago;
o segofaditse bana ba gago
mo teng ga gago.
14O dira kagiso
mo melelwaneng ya gago;
o go kgorisa setou sa mabele
se se boleta bogolo.
15O ntshetsa taolo ya one
kwa lefatsheng;
lefoko la one
le siane ka thata e kgolo.
16O aba kapoko e nne jaaka bobowa;
a gase kgogotshwane,
e nne jaaka melora.
17O latlhela sefako sa one,
se nne jaaka dikgapetlana;
e mang yo o ka itshokelang
letsididi la one?
18O ntsha lefoko la one,
o di tlhapolose;
o fokise phefo ya one,
mme metsi a elele.
19O supetsa Jakobe lefoko la one,
ditao tsa one
le ditshiamiso tsa one
mo go Iseraele.
20Ga o ise o ko o direle morafe ope
jalo;
mme ka ga dikatlholo tsa one,
ga ba ise ba ke ba di itse.
Bakang Jehofa.
