2 DIKGOSI 15

₁Asaria morwa Amasia kgosi ya Juta o ne a simolola go busa ka ngwaga wa 27 wa puso ya ga Jerobeame kgosi ya Iseraele. ₂E rile a nna kgosi, a bo a le dinyaga di le 16, a busa dinyaga di le 52 kwa Jerusalema. Leina la ga mmaagwe e ne e le Jegolea wa Jerusalema. ₃A dira tse di siameng mo matlhong a Morena fela jaaka go dirile Amasia rraagwe. ₄Fela dithota tsa tlhabelo tsa se ka tsa tlosiwa; batho ba nna ba dira ditlhabelo le go tshuba maswalo mo dithoteng tsa tlhabelo. ₅Mme Morena a betsa kgosi, mme ya bolawa ke lepero go fitlha letsatsing la loso lwa yona, ya nna mo ntlong e e kwa thoko. Mme Jothame morwa kgosi o ne a e tshwarelela, a okamela ntlo ya bogosi a busa batho ba lefatshe.

₆Ditirafalo tse dingwe tsa ga Asaria le tsotlhe tse o neng a di dira kana di kwadilwe mo lokwalong lwa ditirafalo tsa sebaka sa dikgosi tsa Juta. ₇Mme Asaria a robala le borraagwe, mme ba mo fitlha fa go borraagwe mo motseng wa ga Dafita, mme Jothame morwawe a nna kgosi mo boemong jwa gagwe.

₈Sagaria morwa Jerobeame o ne a simolola go busa Iseraele ka ngwaga wa 38 wa puso ya ga Asaria kgosi ya Juta; a busa dikgwedi di le thataro kwa Samaria. ₉A dira tse di bosula mo matlhong a Morena jaaka go dirile borraagwe; a se ka a tlogela maleo a ga Jerobeame morwa Nebate yo o neng a leofisa Baiseraele. ₁₀Mme Sadume morwa Jabese a mo tsosetsa moferefere, a mo itaya fa pele ga morafe, a mmolaya, a nna kgosi mo boemong jwa gagwe.

₁₁Ditirafalo tse dingwe tsa ga Sagaria, kana di kwadilwe mo lokwalong lwa ditirafalo tsa sebaka sa dikgosi tsa Iseraele.

₁₂Ke lone lefoko la Morena le o kileng a le bua le Jehu a re: “Bomorwao ba tla nna mo sedulong sa bogosi sa Iseraele go ya losikeng lwa bone.” Ga nna jalo.

₁₃Sadume morwa Jabese o ne a simolola go busa ka ngwaga wa 39 wa puso ya ga Usia kgosi ya Juta, a busa sebakanyana sa kgwedi fela kwa Samaria.

₁₄Ke fa Menaheme morwa Gadi a bolola kwa Thiresa, a fitlha kwa Samaria, a fenya Sadume morwa Jabese kwa Samaria, a mmolaya, a nna kgosi mo boemong jwa gagwe. ₁₅Ditirafalo tse dingwe tsa ga Sadume le moferefere o a neng a o tsosa kana di kwadilwe mo lokwalong lwa ditirafalo tsa sebaka sa dikgosi tsa Iseraele. ₁₆Ka metlha eo Menaheme a bolaya motse wa Thifesa le botlhe ba ba neng ba le mo go ona le dinaga tsa ona go tloga kwa Thiresa, ka ba se ka ba mmulela. A o bolaya, a ba a gagola ba baimana botlhe ba ona dimpa.

₁₇Menaheme morwa Gadi o ne a simolola go busa Iseraele ka ngwaga wa 39 wa puso ya ga Asaria kgosi ya Juta; a busa dinyaga di le some kwa Samaria. ₁₈A dira tse di bosula mo matlhong a Morena ka malatsi otlhe a gagwe, a se ka a tlogela maleo a ga Jerobeame morwa Nebate yo o neng a leofisa Baiseraele. ₁₉Ka malatsi a gagwe ga tlhaga Phule kgosi ya Asiria, a tlhasela lefatshe. Ke fa Menaheme a naya Phule ditalente di le sekete tsa selefera gore mabogo a gagwe a nne nae go tlhomamisa bogosi mo seatleng sa gagwe. ₂₀Mme Menaheme a kgethisa Baiseraele madi ao, e bong bahumi botlhe gore monna a le mongwe a nee kgosi ya Asiria dišekele di le 50 tsa selefera. Ke fa kgosi ya Asiria e boa, ya se ka ya nna mo lefatsheng la Baiseraele.

₂₁Ditirafalo tse dingwe tsa ga Menaheme le tsotlhe tse o neng a di dira kana di kwadilwe mo lokwalong lwa ditirafalo tsa sebaka sa dikgosi tsa Iseraele. ₂₂Mme Menaheme a robala le borraagwe, mme Phekaya morwawe a nna kgosi mo boemong jwa gagwe.

₂₃Phekaya morwa Menaheme o ne a simolola go busa Iseraele ka ngwaga wa 50 wa puso ya ga Asaria kgosi ya Juta; a busa dinyaga di le pedi kwa Samaria. ₂₄A dira tse di bosula mo matlhong a Morena; a se ka a tlogela maleo a ga Jerobeame morwa Nebate yo o neng a leofisa Baiseraele. ₂₅Mme Pheka morwa Remalea mothusi wa gagwe wa motlhabani a mo tsosetsa moferefere, a mo fenya kwa Samaria mo kagong ya phemelo ya ntlo ya kgosi mmogo le Arekobe le Arie – Pheka ene a na le banna ba le 50 ba Gileate – a mmolaya, a nna kgosi mo boemong jwa gagwe. ₂₆Ditirafalo tse dingwe tsa ga Phekaya le tsotlhe tse o neng a di dira kana di kwadilwe mo lokwalong lwa ditirafalo tsa sebaka sa dikgosi tsa Iseraele.

₂₇Pheka morwa Remalea o ne a simolola go busa Iseraele ka ngwaga wa 52 wa puso ya ga Asaria kgosi ya Juta; a busa dinyaga di le 20 kwa Samaria. ₂₈A dira tse di bosula mo matlhong a Morena; a se ka a tlogela maleo a ga Jerobeame morwa Nebate yo o neng a leofisa Baiseraele.

₂₉Ka sebaka sa ga Pheka kgosi ya Iseraele ga tla Thigelathe-Philesere kgosi ya Asiria, a thopa Iyone le Abele-Bethe-Maaga le Janoa le Keteše le Hasore le Gileate le Galelea, e bong naga yotlhe ya Nafetale, a isa batho ba teng mo botshwarong kwa Asiria.

₃₀Mme Hosea morwa Ela a tsosetsa Pheka morwa Remalea moferefere, a mo fenya a mmolaya, a nna kgosi mo boemong jwa gagwe ka ngwaga wa 20 wa puso ya ga Jothame morwa Usia. ₃₁Ditirafalo tse dingwe tsa ga Pheka le tsotlhe tse o neng a di dira kana di kwadilwe mo lokwalong lwa ditirafalo tsa sebaka sa dikgosi tsa Iseraele.

₃₂Jothame morwa Usia kgosi ya Juta o ne a simolola go busa ka ngwaga wa bobedi wa puso ya ga Pheka morwa Remalea kgosi ya Iseraele. ₃₃Ya re a simolola go busa, a bo a le dinyaga di le 25; a busa dinyaga di le 16 kwa Jerusalema. Leina la ga mmaagwe e ne e le Jeruša morwadia Satoke. ₃₄A dira tse di siameng mo matlhong a Morena, a dira fela jaaka go dirile Usia rraagwe. ₃₅Fela dithota tsa tlhabelo tsa se ka tsa tlosiwa; batho ba nna ba dira ditlhabelo le go tshuba maswalo mo dithoteng tsa tlhabelo. Ke ene yo o neng a aga kgoro ya Ntlo ya Morena e e bidiwang: E e kwa godimo.

₃₆Ditirafalo tse dingwe tsa ga Jothame le tsotlhe tse o neng a di dira kana di kwadilwe mo lokwalong lwa ditirafalo tsa sebaka sa dikgosi tsa Juta. ₃₇Ka metlha eo Morena a simolola go laela Resine kgosi ya Siria le Pheka morwa Remalea kgosi ya Iseraele gore ba tlhasele Juta. ₃₈Mme Jothame a robala le borraagwe, a ba a fitlhwa fa go borraagwe mo motseng wa ga Dafita rraagwe, mme Ahase morwawe a nna kgosi mo boemong jwa gagwe.