1 MAKABISE 13

₁Simone o ne a utlwa gore Terifo o kokoantse batlhabani ba le bantsi go tla go tlhasela le go senyaka lefatshe la Juta. ₂Mme ya re a bona ka fa batho ba neng ba roromaka ka teng, ba tshogile a tlhatlhogela kwa Jerusalema, a feta a kgobokanya batho. ₃A ba kgothatsa ka go ba raya a re, “Lo a itse le lona gore nna, bomorwarre le lolwapa lwa ga rre, re diretse melao le Felo ga Boitshepo ka bonatla. Lo itse dintwa tse re di tlhabanyeng, mathata a re neng ra tsena go one. ₄Ke sone se se dirileng gore bomorwarre ba bo ba tlhokafetse botlhe jaana ba swetse Iseraele. Ke nna fela yo ke setseng. ₅Ke gone ka moo ke tla se kang ke be ke ithekegela ka nako ya kgatelelo, gonne ga ke tlhokege go feta bomorwarre. ₆Ke tlaa mpe ke tlhabanele setšhaba sa ga etsho le Felo ga Boitshepo, le basadi ba lona le bana, jaaka baheitane ba ikaeletse botlhe, ka moya o o bosula, go re fetsa jaana.”

₇Ya re batho ba utlwa mafoko a gagwe, a ba tsena mo moyeng. ₈Mme ba goa ba mo raya ba re, “Ke wena moeteledipele wa rona mo boemong jwa ga Judase le Jonathane morwarrago. ₉Re tlhabanele dintwa, mme re tla dira sengwe le sengwe se O se re bolelelang.” ₁₀Ke fa a kokoanya batlhabani botlhe. A feleletsa dipota tsa Jerusalema ka bonako, a thatafatsa thekeletso yotlhe. ₁₁A romela batlhabani ba le bantsi kwa motseng wa Joppa, ba eteletswe pele ke Jonathane, morwa Abesalome. Ene a feta a ntsha baagi ba teng mme a nna teng, a o gapile.

₁₂Terifo jaanong a tswa mo Petolemaise ka namane e tona ya lekoko la ntwa go ya go tlhasela lefatshe la Juta, Jonathane a tsamaya nae a lebeletswe. ₁₃Simone a thibelela mo Adida, go lebagana le leboa. ₁₄Ya re Terifo a utlwa gore Simone o tsere maemo a ga Jonathane morwarraagwe, le gore o ikaeletse go mo tlhasela mo ntweng, a mo romelela batho ba se kaee ka molaetsa o: ₁₅“Jonathane, morwarrago, o ne a kolota letlole la madi a kgosi ka ntlha ya ditiro tse a neng a di dira. Ke sone se re mo se tshwaretseng. ₁₆Fa O ka romela ditalenta tsa selefera di le 100 le bomorwawe ba le babedi e le bantshiwa-peelano, gore re tle re tlhomamise gore e tlaa re re sena go mo golola a se ke a re tsosetse mokubukubu, re tlaa mo golola.”

₁₇Le mororo Simone a ne a itse sentle gore molaetsa o ke bolotsana fela, o ne a laela gore madi a romelwe, basimane le bone ba romelwe, gonne o ne a tshaba go itlhoisa batho thata. ₁₈Ka gore ba ne ba tlaa re: Jonathane o sule ka jaana Simone a ne a se ka a romelela Terifo madi le basimane. ₁₉Ke gone ka moo a neng a romela basimane le ditalente di le 100. Fela Terifo a tlhanoga, a se ka a golola Jonathane.

₂₀Jaanong Terifo a ipaakanyetsa go ya go tlhasela le go senyaka lefatshe. A fapoga ka tsela ya Adora. Fela Simone le batlhabani ba lekoko la gagwe la ntwa, ba nna ba thulana nae gongwe le gongwe kwa a neng a re o ya teng. ₂₁Banna ba ba neng ba le mo Motsaneng wa Phemelo ba nnela go romela batho kwa go Terifo, ba mo tlhotlheletsa go tla kwa go bone ka tsela ya sekaka, le go ba romelela dijo. ₂₂Terifo a baakanyetsa batlhabani-bapalami ba gagwe go tsamaya. Fela ga lala go ole kapoko e ntsi mo e leng gore o ne a se ka a tsamaya ka ntlha ya yone. Jalo he, o ne a fuduga, a ya Galelea. ₂₃Ya re a atamela Basekama, a bolaya Jonathane, a bo a fitlhwa gone koo. ₂₄Ke fa Terifo a boa a ya kwa ga gabo.

₂₅Simone a romela batho go ya go tsaya marapo a ga Jonathane morwarragwe, mme a mo fitlha mo Modeine, motse wa bagologolo ba gagwe. ₂₆Batho botlhe ba Iseraele ba ne ba mo hutsafalela, ba mo lelela malatsi a le mantsi. ₂₇Simone a aga sefikantswe sa segopotso se seleele, mo e neng e bile se bonala sentle, mo godimo ga phuphu ya ga rraagwe le bomorwarraagwe, a dirisa maje a a rethefaditsweng ka fa pele le ka fa morago. ₂₈A aga diphirami di supa, di lebaganye, e nngwe e le ya ga rraagwe, e nngwe e le ya ga mmaagwe, tse dingwe e le tsa bomorwarraagwe ba bane. ₂₉A di baya mo godimo ga matshego, a di dikaganyeditse ka metloutlou e meleele, mme mo godimo ga yone o ne a tshwantshitse dikgele tsa diaparo tsa tlhabano le dibetsa gore ba nne ba gakologelelwa ruri. Kwa ntle ga ditshwantsho tse, diaparo tsa tlhabano le dibetsa, o ne a tshwantshitse dikepe, gore di bonwe ke mongwe le mongwe yo o tsamayang mo lewatleng. ₃₀Sefikantswe sa segopotso se se neng se agilwe kwa Modeine se ne se ntse jalo. Mme se sa ntse se le teng le gompijeno.

₃₁Terifo o ne a direla Kgosi Antiokuse, yo o neng a le mmotlana, bolotsana mme a mmolaya. ₃₂A mo tseela setilo sa bogosi, a ithwesa serwalo sa bogosi, sa Asia, mme a dira namane e tona ya tshenyo lefatshing.

₃₃Simone a aga dikago tsa phemelo mo Juta, a di dikaganyetsa ka dikago tse di godileng thata tsa phemelo, dipota tse ditona le dikgoro tse di tiileng, mme a tlatsa dikago tse tsa phemelo ka dijo. ₃₄A bo a tlhopa batho a ba roma kwa go kgosi Demeteriuse a mo kopa go thusa lefatshe ka sengwe gore le ke le nne mo boiketlong, gonne se Terifo ene a neng a se dirile e ne e le go thopa fela. ₃₅Kgosi Demeteriuse a fetola ka lokwalo lo lo neng lo kwadilwe jaana: ₃₆“Nna kgosi Demeteriuse ke kwalela Simone moprista yo mogolo le tsala ya dikgosi, le bagolwane le setšhaba sa Bajuta, ka re: madume. ₃₇Re itumetse thata go amogela serwalo sa gouta le kala ya palema e leng dilo tse O di re romeletseng. Mme re rata thata go dira kagiso le wena, le go kwalela magosana a rona, re ba bolelela go lo golola mo lekgethong. ₃₈Sengwe le sengwe se re se laotseng mabapi le wena se tshwanetse go nna se diragadiwa, mme dikago tsa phemelo tse O di agileng e tlaa nna e nna tsa gago. ₃₉Re go itshwarela melato yotlhe, e O sa e dirang ka bomo le e O e dirileng ka bomo, go fitlhelela gompijeno. Re go golola mo lekgethong la mmuso e O sa ntseng o le kolota. Le lekgetho lengwe le lengwe, le le ntseng le phuthwa mo Jerusalema ga le na go tlhola le phuthwa. ₄₀Fa e le gore go na le bangwe mo go lona ba ba ka nna ba dirwa maletakgosi a ba thaopiwe. Mme a go nne kagiso fa gare ga rona le lona.”

₄₁E ne e le ka ngwaga wa 170 fa puso ya baheitane e fedisiwa mo Iseraele. ₄₂Mme batho ba simolola go kwala mo dikwalong tsa bone le mo ditumalanong tsa bone, ba re, “Mo ngwageng wa ntlha wa ga Simone, moprista yo mogolo, motsamaisi wa batlhabani, le moeteledipele wa Bajuta.”

₄₃Ka nako eo Simone o ne a ya go tlhasela motse wa Gasere, mme a o dikaganyetsa ka mephato ya gagwe ya ntwa. A dira kago e e godileng e e ka tsamaisiwang, a e tsisa fa pele ga motse. A phunya phatlha mo bontlheng jwa lebotana la phemelo mme a gapa motse. ₄₄Banna ba ba neng ba le mo kagong e e godileng e e ka tsamaisiwang ba betsega mo go yone ba tsena mo motseng, mme ga tsoga tlhakantsukwe e kgolo. ₄₅Banna ba ba neng ba le mo motseng, le basadi ba bone le bana ba bone, ba palama dithako tsa phemelo, ba gagogetswe, mme ba goela godimo, ba kopa Simone go dira kagiso nabo. ₄₆Ba re, “O se ka wa re tshwara jaaka bosula jwa rona bo tshwanela. re tshware jaaka O tlhotlhelediwa ke boutlwelo-botlhoko jwa gago.”

₄₇Simone a utlwana nabo mme a tlogela go lwa, fela a ba ntsha ka motse, a phepafatsa matlo a a neng a na le medimo ya disetwa, a bo a tsena ka dipina tsa pako. ₄₈A ntsha itshekololo yotlhe mo go one, a baya banna ba ba tshegetsang Molao mo go one, a o thatafatsa, mme a ikagela ntlo mo go one.

₄₉Banna ba ba neng ba le mo Motsaneng wa Phemelo o o mo Jerusalema ba ne ba sa letlelwa go tswela kwa ntle le go boa go reka le go rekisa. Ke gone ka moo ba neng ba bolailwe ke tlala, mme bontsi jwa bone bo ne jwa swa bo bolawa ke leuba le. ₅₀Ba ne ba kopa Simone go dira kagiso nabo, mme a e dira. Fela o ne a ba ntsha ka motse, a bo a ntsha itshekologo yotlhe mo Motsaneng wa Phemelo. ₅₁Bajuta ba ne ba tsena mo go one ka kgwedi ya bobedi e tlhola malatsi a le 23 mo ngwageng wa 171, ka megolokwane, ba tshotse dikala tsa dipalema, go lediwa diharepa, dimatlana le dikithara, go opelwa difela le dikopelo tse dingwe, gonne mmaba yo mogolo o ne a pitlilwe, a ntshitswe mo Iseraele. ₅₂Simone a dira letsatsi le letsatsi la boipelo jwa ngwaga nngwe le nngwe. A thatafatsa manno a a thata a phemelo a Thaba ya Tempele go bapa le Motsana wa Phemelo mme a nna teng le banna ba gagwe. ₅₃E rile Simone a bona gore Johane morwawe e setse e le monna a mo dira molaodi wa mephato ya gagwe yotlhe, a nna kwa Gasere.