2 MAKABISE 1

₁Rona Bajuta ba ba mo Jerusalema le mo lefatsheng la Juta, re kwalela lona bakaulengwe ba rona, ebong lona Bajuta ba ba mo Egepeto, ra re, madume, letlhogonolo le kagiso e nne tsa lona.

₂A Modimo o lo segofatse, o gakologelwa kgolagano ya one le Abrahama, Isaka le Jakobe, batlhanka ba one ba ba ikanyegang. ₃A o ko o lo fe lotlhe pelo ya go o obamela le go dira go rata ga one ka mogopolo o o phuthologileng le moya o ineetseng. ₄A o ko o dire gore dipelo tsa lona di bulegele Molao wa one le ditaelo tsa one, mme o lo neye kagiso. ₅A o ko o utlwe dithapelo tsa lona, lo utlwane nao, mme o se ka wa bo wa lo tlogela ka nako ya bosula. ₆Rona mono re ntse re lo rapelela.

₇E rile Demeteriuse a sa ntse a busa, ka ngwaga wa 169, rona Bajuta ra lo kwalela, ra re, “Mo pitlaganong e e boitshegang e e re wetseng godimo mo dingwageng tse fa e sale Jasone le balekane ba gagwe ba tswa lefatshe le le boitshepo le puso, ₈ba ne ba tshuba kgoro ya Tempele mme ba bolaya batho ba ba se nang molato. Ke fa re rapela Morena mme a re utlwa; ra ntsha tshupelo ka bupi jwa korong, ra tshuba dipone mme ra ntsha dilofo.” ₉Jaanong lo tlhokomeleng go tshegetsa moletlo wa Metlaagana wa kgwedi ya Chiselefe. Mo ngwageng wa 188.

₁₀Rona batho ba Jerusalema le ba Juta, Lekgotla la Bagolo le Judase, re kwalela Arisetobuluse, yo e leng mongwe wa losika lwa baprista ba ba tloditsweng le moruti wa ga Kgosi Petolemi, le Bajuta ba ba kwa Egepeto ra re madume, lo bo lo tsoge sentle.

₁₁Ka Modimo o re namotse mo diphatseng tse dikgolo, re o lebogela go re thusa go tlhabana le kgosi, ₁₂gonne ke One o o neng wa leleka botlhe ba ba neng ba tlhabantsha Motse o o boitshepo. ₁₃Gonne e rile moeteledipele wa bone a fitlha kwa Peresia ka lekoko la batlhabani ba e neng e kete ga go kake ga bo ga emelanwa nabo, a feta a kgemethwa mo Tempeleng ya Nanaea, ka ntlha ya bolotsana jo bo neng jwa dirwa ke baprista ba ba neng ba direla modingwana-sesadi oo. ₁₄E ne ya re Antiokuse a ipaya jaaka e kete o tsile go nyala Nanaea, a tla mo a na le ditsala tsa gagwe, a ikaeletse go tla go tsaya matlotlo a golo fa e le bogadi. ₁₅Baprista ba ga Nanaea ba ne ba a beile mo pontsheng. Mme ene le bangwenyana ba batlhanka ba gagwe ba tsena mo malwapeng a a boitshepo. Ya re fela jaaka Antiokuse a sena go tsena mo teng ba tswala tempele, ₁₆ba bula setswalo sa sephiri se se neng se le mo sesireng-marulelo mme ba diga moeteledi-pele yo le batho ba gagwe ka go ba digela maje a e neng e kete ditladi. Ke fa ba ba kgaolaka ditokololo, ba ba kgaola ditlhogo, ba di latlhela kwa go ba ba neng ba le ka kwa ntle.

₁₇A Modimo wa rona a bakelwe dilo tse tsotlhe, o o diretseng baikepi jaaka ba ne ba tshwanela.

₁₈Ka re tlaa bo re ja moletlo wa go phepafadiwa ga Tempele fa Chiselefe e tlhola malatsi a le 25, re bona go tshwanela gore re lo itsise, gore lo tle lo je moletlo wa Metlaagana le wa molelo o e neng ya re Nehemia moagi wa Tempele le aletara, a ntsha tshupelo wa tlhaga. ₁₉Gonne e rile bagologolo ba rona ba isiwa kwa Peresia baprista ba ba borapedi ba nako eo ba ogola molelo mo aletareng ba o fitlha go sa bone ope mo teng ga sediba se se kgadileng, mo ba neng ba o suba teng mo e leng gore go ne go se na ope yo o neng a itse mo o neng o le teng. ₂₀Ya re go sena go feta dingwaga, jaaka Modimo o ne o rata, Nehemia, yo o neng a laetswe ke kgosi, o ne a roma ba lotso lwa baprista ba ba neng ba fitlhile molelo gore ba ye go o tsaya. Fela ba re itsise fa ba ne ba fitlhela bolepo jo bo loileng eseng molelo. Nehemia a ba laela gore ba ge boleponyana bongwe mme ba bo tsise kwa go ene. ₂₁Ya re ditsompelo tsa tshupelo di sena go bewa sentle, Nehemia a laela baprista gore ba tshele bolepo jo mo godimo ga dikgong le se se neng se beilwe mo godimo ga tsone. ₂₂Fa go sena go dirwa jaana, mme letsatsi, morago ga lobakanyana, ka le ne le ntse le siregile, le phatsima, molelo o mogolo o ne wa tuka, batho botlhe ba bo ba gakgamala thata. ₂₃Fa tshupelo e ntse e fisiwa jaana, baprista le botlhe ba ba neng ba na le baprista ba ne ba rapela, go tlhabeletsa Jonathane, batho ba bangwe bone ba ntse ba araba le Nehemia.

₂₄Thapelo e ne e tsamaya jaana: “Morena, Morena Modimo, Motlhodi wa dilo tsotlhe, wena yo o boitshegang, yo o nonofileng, yo o siameng, yo o boutlwelo-botlhoko, wena yo O leng kgosi O le nosi le morediredi-molemo, ₂₅wena yo o leng mootli O le nosi, yo e leng wena fela o siameng, O leng thatayotlhe, O nnelang ruri, wena yo o namolang Iseraele mo bosuleng bongwe le bongwe, wena yo O neng wa dira borraetsho batho ba gago ba ba tlhophegileng wa ba itshepisa, ₂₆a O ko O amogele tshupelo e, O e amogelela go thusa batho botlhe ba gago ba Iseraele, mme O sireletse O bo O itshepise boswa jwa gago. ₂₇A O ko O kgobokanye botlhe ba ga rona ba ba phatlaletseng, O golole botlhe ba ba sa ntseng ba le mo bokgobeng mo gare ga baheitane, O kgatlhegele botlhe ba ba nyadiwang le ba ba tlhoilweng, mme baheitane ba itse fa O le Modimo wa rona. ₂₈O otlhaye botlhe ba ba re gateletseng le ba ba re rogang ka makgakga a bone, ₂₉mme O tlhome batho ba gago, ba itsetsepele mo Lefatsheng la gago le le Boitshepo, jaaka Moše a ne a solofetsa.”

₃₀Baprista ba bo ba tlhabeletsa difela. ₃₁Ya re tshupelo e setse e fisitswe yotlhe, Nehemia a laela gore bolepo jo bo neng bo setse bo tshelwe mo majeng a matona, ₃₂mme ya re go dirwa jaana ga tlola kgabo, yone ya gopiwa ke go phatsima ga lesedi le le neng le tswa kwa aletareng.

₃₃E rile selo se se tla go itsege, mme kgosi ya Maperesia e utlwa gore golo fa baprista ba ba thopilweng ba neng ba fitlhile molelo teng go ne ga tlhaga bolepo jo, jo Nehemia le batho ba gagwe ba neng ba bo dirisa go phepafatsa ditsompelo tsa tshupelo, ₃₄kgosi ya re e sena go bona gore ke boammaaruri, ya dikaganyetsa felo fa mme ya bolela gore go boitshepo. ₃₅Kgosi ya abelana dimpho tsa botlhokwa le botlhe ba e neng e ba rata. ₃₆Nehemia le batho ba gagwe ba bitsa selo se “nefetare”, ke gore “phepafatso”, fela se itsege ka leina la “nafeta”.