SIRAKA 31

₁Go tlhobaediwa ke khumo go a bopamisa, go ngongorisega go go dirwang ke yone go a tlhobaetsa.

₂Maitshwenyo motshegare a itsa motho le go otsela tota, fela jaaka bolwetsi jo bogolo bo tlhobaetsa.

₃Mohumi o dira ka natla, a koege madi, mme fa a ikhutsa o itšhobela letlepu la gagwe; ₄mohumanegi fa le ene a dira ka natla dilo tse a tshelang ka tsone di ntse di fokotsega, mme fa a tla go ikhutsa, ke modidi.

₅Motho yo o ratang gouta ga a kake a kaiwa e le mosiami, motho yo o tlholang a kobakobanye le dipapadi o tlaa timediwa ke gone golo moo.

₆Batho ba le bantsi ba ole ka ntlha ya gouta, le fa tshenyego ya bone e ne ya lebagana nabo.

₇Golo mo ke serai go botlhe ba ba go ineelang ka tlhwaafalo, mme seeleele sengwe le sengwe se tlaa tshwarwa ke sone.

₈Go sego mohumi yo o fitlhelwang a se na molato, mme a sa tsomake gouta.

₉Ke mang yo gore re tle re mo akgole? ka gonne o dirile dilo tse di gakgamatsang mo gare ga batho ba ga gabo?

₁₀Ke mang yo o neng a lekiwa jalo mme a fitlhelwa a itekanetse? Selo se o ka nna a ikgantsha ka sone se! Ke mang yo o neng a na le thata ya go leofa mme a se ka a leofa, a nna a direla yo mongwe phoso mme a se ka a e dira?

₁₁Lesego la gagwe le tla tlhomama sentle, mme phuthego e tla bua ka dikatso tsa gagwe.

₁₂A O ntse fa tafoleng ya dijo tse di monatenate? O se ka wa nna megagaru; O se ka wa nna wa re, “A namane e tona ya moletlo, banna!”

₁₃O gakologelwe gore go maswe thata go nna le leitlho le le megagaru. A go na le sengwe mo dibopiweng tsotlhe se se megagaru go feta leitlho? Ke gone ka moo O fitlhelang le ntse le seka dikeledi nako le nako.

₁₄O se ka wa tsaya sepe se mothelesetsi wa gago a se tlhomileng leitlho, O se ka wa mo pitlaganya fa lo ja.

₁₅O akanyetse moeng-ka-wena jaaka O ikakanyetsa, O akanyetse ba bangwe ka mekgwa yotlhe.

₁₆O je se o se tsholetšweng jaaka motho yo o nang le maitseo, O se ka wa hutetsa dijo, wa tloga wa itlhokisa tlotlo ya batho.

₁₇Ka ntlha ya maitseo a mantle e nne wena wa ntlha go emisa go ja, O se ka wa ja bobe wa tloga wa kgopisa batho.

₁₈Mme fa O ntse le batho ba le bantsi, O se ka wa itsholela pele ga ba bangwe ba itsholela.

₁₉Go itsholela go le gonnye go lekanye mo mothong yo o nang le kgodiso e ntle. O hema sentle fa a robetse.

₂₀Go ja ka tekanyo go robatsa motho sentle, o tsoga phakela, a itekanetse sentle. Go tlhobaelwa, go tenega le go khidiega ke dilo tsotlhe tse motho yo o jang bobe a di bogang.

₂₁Fa e le gore O patelesegile go ja go feta selekanyo, ema go sa ntse go jewa, O ye go tlhatsa mme O tlaa ikutlwa O le botoka.

₂₂O ntheetse, ngwanaka, O se ka wa bo wa ntlhokomologa; e tlaa re kgabagare O bone thuso ya mafoko a me. O dire ditiro tsotlhe tsa gago ka selekanyo, mme ga O kitla O bo O lwala.

₂₃Batho ba boka motho yo o tsholelang ba bangwe, mme kakanyo ya bone ka ga bopelo jwa gagwe jo bogolo e a ikanyega.

₂₄Ka mokgwa o o tšhwanang, motho yo o pelotshetlha mo go tsholeleng ba bangwe o nyadiwa ke batho botlhe mo motseng, mme kakanyo ya bone ka ga bopelotshetlha jwa gagwe le yone ga e belaesege.

₂₅O se ka wa itira seganka mo bojalweng jwa gago, gonne bojalwa bo feditse batho ba le bantsi.

₂₆Sebeso se supa bothata jwa tshipi, mme bojalwa jone bo supa dipelo ka nako ya go nwa ga baikgantshi.

₂₇Bojalwa ke botshelo mo mothong fa bo nowa ke motho ka selekanyo. Botshelo ke eng fa motho a se na bojalwa? Bo ne jwa bopelwa go itumedisa batho.

₂₈Fa bojalwa bo nowa ka nako e e bo siametseng le ka selekanyo se se bo siametseng, bo itumedisa pelo, bo bo bo thamise moya.

₂₉Fela pelo e utlwisiwa botlhoko ke bojalwa jo bo nowang go fetelela ka ntlha ya go galefa le go itira segatlhamedi.

₃₀Botagwa bo galefisa motho yo o se nang tlhaloganyo a ikutlwisa botlhoko; bo mo koafatsa bo ntse bo mo isa kwa titeong.

₃₁O se ka wa kgalemela mokaulengwe wa gago mo moletlong wa bojalwa, O se ka wa mo kgakgafalela a sa ntse a ja monate, O se ka wa mo kgala, kgotsa wa nnela go mo tena ka go mmotsa sesuga sa madi a gago.