SIRAKA 37

₁Tsala nngwe le nngwe e tlaa re, “Le nna ke tsala ya gago,” fela ditsala dingwe ke ditsala fela ka leina.

₂A ga go bolaise botlhoko, fa molekane kgotsa tsala e fetoga mmaba?

₃Oh tshekamelo e e bosula, kana ruri O ne O bopelwa eng, gore O khurumetse lefatshe ka tsietso jaana?

₄Mofuta mongwe wa molekane, ke wa yo o jang tsala ya gagwe ntsoma fa e sa ntse e eme sentle; fela e re e tla go tsena mo mathateng a bo a e tlhanogela.

₅Ba bangwe balekane ke ba ba thusang tsala mo mathateng ka pelo yotlhe, mme e re ntwa e tsoga ba ntshe dibetsa.

₆O se ka wa bo wa lebala tsala e e kileng ya go lwela dintwa, e se ka ya re fa O humile wa mo ntsha mo mogopolong wa gago.

₇Mogakolodi mongwe le mongwe o tlaa gakolola, fela bangwe bagakolodi ba laolwa ke boithati fela.

₈Ikele tlhoko mo mothong yo o go neelang kgakololo; O leke go bona gore tota ene O ipatlela eng; gongwe kgakololo ya gagwe e tsamaya le boikakanyetso jwa gagwe. A se ka a tloga a go tsometsa, ₉a go raya a re “O tsamaya sentle.” fela a emela kwa thoko go bona gore O tla diragalelwa ke eng.

₁₀O se ka wa rerisana le motho yo o go lebileng ka pelaelo, O fitlhele batho ba ba go fufegelang maikaelelo a gago.

₁₁O se ka wa rerisana le mosadi kaga mogadikane wa gagwe, kgotsa leboi kaga ntwa, kgotsa morekisi kaga ditlhwatlhwa, kgotsa moreki kaga go rekisa, motho yo go pelotshetlha kaga tebogo, motho yo o ikgopotseng ene fela kaga bomolemo, motho yo o setšhwakga tiro nngwe, kgotsa motho yo o dira-dirang fela kaga go fetsa tiro, motlhanka mongwe yo o setšhwakga kaga tiro nngwe e kgolo e e tšhwanetseng go dirwa: O se ka wa bo wa ikanya kgakololo ya ope wa batho ba.

₁₂Fela O nne O ye kwa mosiameng, yo O itseng gore o tshegetsa melao, yo mowa wa gagwe o tšhwanang le wa gago, mme yo e tlaa reng O dira phoso a go tlhomogele pelo.

₁₃La bofelo, O kgomarele kgakololo e O e neelwang ke pelo ya gago, gonne ga go na ope yo o go thusang ka boikanyego go feta yone.

₁₄Moya wa motho gantsi o mo tlhagisa botoka go na le balebeledi ba ba supileng ba ba kotameng mo godimo ga setlhoa sa tebelelo.

₁₅Mme mo godimo ga tse tsotlhe nna O kope Mogodimodimo, gore a go tseise tsipidi mo boammaaruring.

₁₆Tlhaloganyo e tšhwanetse gore e nne tshimologo ya ditiro tsotlhe, kakanyo e tšhwanetse go tla pele ga tiro nngwe le nngwe.

₁₇Dikakanyo di mo teng ga pelo, mme yone e nna le dikala di le nne: ₁₈ebong bomolemo le bosula, botshelo le loso; mme mohumagadi wa tse tsotlhe e aga e ntse e le loleme.

₁₉A ko O akanye motho mongwe yo o botlhale, yo o rutang batho ba le bantsi, fela ene a sa itirele sepe se se molemo.

₂₀O ko O akanye motho yo o filweng mo go bueng, mme fela a ilwa, a bo a felela a bolawa ke tlala, ₂₁e le gore ga a a kgatlha Morena, mme ga a na botlhale bope fela.

₂₂O akanye motho yo o ithayang a re o botlhale, mme maungo a tlhaloganyo ya gagwe a senoga mo go se a se bolelang.

₂₃Motho yo o botlhale tota o ruta batho ba gagabo, maungo a tlhaloganyo ya gagwe a bonala ruri.

₂₄Motho yo o leng botlhale o tlaa tshegofadiwa thata, mme botlhe ba ba mmonang ba tlaa re o sego.

₂₅Motho o tshela malatsi mangwe, fela Iseraele ene o tshela malatsi a a ka se kang a balwa.

₂₆Motho yo o botlhale o ikanngwa ke batho ba gagabo, leina la gagwe le tshelela ruri.

₂₇Ngwanaka, mo malatsing a botshelo jwa gago O nne O itlhatlhobe mmele, mme fa O bona sengwe se se sa o siamelang O se ka wa se dira, ₂₈gonne ga se sengwe le sengwe se se dumalanang le mongwe le mongwe, le gone ga se mongwe le mongwe yo o itumelelang sengwe le sengwe.

₂₉O se ka wa jela dijo tse di monate ruri, O se ka wa nna megagaru mo dijong.

₃₀Gonne go ja go feta selekanyo go a lwatsa, mme go ja bobe go tsosa moya wa ntwa mo mothong, ₃₁batho ba le bantsi ba bolailwe ke go ja bobe, O itlhokomele mo selong se, mme O tla tshela ka nako e telele.