SIRAKA 38

₁O tlotle ngaka ka tlotlo e e tšhwanetseng, O e tlotlela dithuso tse e di go direlang, gonne le yone e bopilwe ke Morena.

₂Kalafi yone e tšwa kwa go Mogodimodimo, jaaka mpho e e tšwang mo kgosing.

₃Thutego ya ngaka ke yone e e tsholetsang tlhogo ya yone, mme boramaemo ba e bona e boitshega, ₄Morena ke ene yo o dirileng gore ditlhare di nne gone a di ntsha mo lefatshing, mme motho yo o nang le tlhaloganyo ga a kitla a di nyatsa.

₅A ga e ise e ke e re tsatsi lengwe legonyana le natefise metsi? ka mokgwa oo, le bontsha thata ya lone.

₆O bile o neile batho thutego, gore ba tle ba mo galaletse mo ditirong tsa gagwe tse di nonofileng.

₇O alafa a bo a sidila ka tsone, ngaka e dira motšwako ka tsone.

₈Ka mokgwa o ditiro tsa gagwe ga di fele mme ke ka ene boitekanelo bo leng mo lefatsheng lotlhe.

₉Ngwanaka, fa o lwala O se ka wa kgobega marapo; O rapele Morena mme o tlaa go fodisa.

₁₀O bakele melato ya gago, diatla tsa gago di nne di le phepa, mme O tlhatšwe pelo ya gago dibe tsotlhe.

₁₁O dire neelo ya insense le segopotso sa bupe jo bo boleta. O ntshe neelo e e nonneng ka fa O ka kgonang ka teng.

₁₂Jaanong O bo O mma ngaka e tswelela-pele, le yone e bopilwe ke Morena, mme O se ka wa mo lesa a go tlogela gonne O a mo tlhoka.

₁₃Go gongwe phodiso e mo go bone, ₁₄gonne le bone ba tla rapela Morena gore a ba fe neo ya go sidila le go fodisa, gore botshelo bo tle bo bolokwe.

₁₅Fa motho a leofa fa pele ga Modiri wa gagwe, o a tle a wele mo mabogong a ngaka.

₁₆Ngwanaka, O lelele mošwi selelo, mme O tlhabeletse pina ya selelo gore O supe khutsafalo ya gago e kgolo. O fitlhe mmele wa gagwe ka tirelo e e tšhwanelang, mme O se ka wa tlhokomologa go tlotla lebitla la gagwe.

₁₇O lele botlhoko, O bokolele ka tlhonamo e kgolo, O tshegetse khutsafalo e e tšhwanelang mošwi, letsatsi kgotsa a le mabedi O ka tla wa tšhwaiwa phoso, O bo O gomotsege mo kutlobotlhokong ya gago; ₁₈gonne khutsafalo e ka nna ya bolaya motho, pelo e e tletseng khutsafalo e ka nna ya go koafatsa.

₁₉O mme khutsafalo e felele le phitlho, go tshelela mo khutsafalong go imela mogopolo.

₂₀O se ka wa lesa pelo ya gago ya hutsafalela ruri; leleka khutsafalo, O akanye ya gago phelelo.

₂₁O se ka wa lebala gore ga go na go boela kwa morago, ga O kake wa thusa bašwi, go tlaa itlhagisetsa wena bosula.

₂₂“Gakologelwa katlholo ya me, gonne e tlaa nna ya gago le wena; maabane e ne e le letsatsi la me, gompijeno ke la gago.”

₂₃Fela fa mošwi a sena go tsena mo boikhutsong, a go mo gakologelwa le gone go ikhutse; a se ka a go tlhobaetsa fela fa moya wa gagwe o sena go tsamaya.

₂₄Nako ya tapologo ke yone e nayang mokwadi lobaka lwa go nna le botlhale; motho yo o se nang ditšhwarego tse dintsi tsa papadi o tlhalefela pele.

₂₅Molemi o ka nna botlhale jang, fa keletso e kgolo ya gagwe e le go tsokotsa seme fela, a kgweetsa dipholo tsa gagwe, a totometse mo tirong ya tsone, a sa tlotle ka sepe fa e se dikgomo fela.

₂₆O tlhomile mogopolo wa gagwe fela mo ditseleng tsa mogoma tse a ntseng a di fatola, mme o itisa ka go nontsha dikgongwana tsa gagwe.

₂₇Go ntse fela jalo ka mmereki le modiri mongwe le mongwe, yo o setlhang bosigo le motshegare: botlhe ba ba segang dikano, ba tlhola ba nnetse go akanya mesego e meša, ba tlhoma pelo tsa bone mo go direng setšhwano se se siameng, mme ba itshoka ba sa ikhutse gore ba feteletse tiro ya bone sentle.

₂₈Go ntse fela jalo ka ramothudi yo o ntseng fa tshiping e a thulelang mo go yone; o akanya se a ka se dirang ka tshipi ya gagwe; moya o o mogote wa molelo o mmabola letlalo, a itshoketse mogote wa sebeso; o sera tsebe ya gagwe ka modumo wa hamore, o tlhomile matlho a gagwe mo mosegong; o ikaeletse go feleletsa tiro ya gagwe, mme o itshokela, a sa robale, go konelela tiro ya gagwe sentle.

₂₉Go ntse jalo gape ka mmopi wa dinkgwana yo o nnetseng tiro ya gagwe a dikolosa leoto ka dinao tsa gagwe, nako e yotlhe a etse tiro ya gagwe tlhoko, tsapogo nngwe le nngwe ya monwana e le gore e diragala jaaka e akantswe pele, ₃₀o tšhoba mmopa ka letsogo la gagwe, a o dube ka dinao tsa gagwe, a tlhomile pelo ya gagwe mo go feleletseng go rethefatsa sentle, bosigo a bo a itshokela go phepafatsa sebesetso.

₃₁Batho ba botlhe ba ikantse diatla tsa bone, mme mongwe le mongwe wa bone ke setšwerere mo tirong e a e ithutileng.

₃₂Motse o ne o ka se ka wa agiwa kwa ntle ga bone, go ne go ka se ka ga nniwa, go ka se ka ga tsamaiwa.

₃₃Fela ga ba tlhokafale mo lekgotleng la kgakololo, ga ba na maemo ape a a kwa godimo mo phuthegong. ga ba nne mo setulong sa boatlhodi, mme molao ga ba o tlhaloganye.

₃₄Ga ba itsege thata mo thutegong le mo go atlholeng ka katlholo e e utlwalang, mme ga ba gope mo gare ga basimolodi ba mebuo. Fela ke batho ba ba tiisang lefatshe le le bopilweng, fa ba ntse ba akanya tiro e ba e ithutileng.