ESTERE (TSHIGIRIKI) 11
NYENGEDZO A
1/2Nga ṅwaha wa vhuvhili wa muvhuso wa khosi Serekesese Muhulwane, nga ḓuvha ḽa u ranga ḽa ṅwedzi wa Nisani, Maradokai murwa wa Jairi, murwa wa Shimei, murwa wa Kishi, wa tsinde ḽa Benjamini, a ḓelwa nga muloro. O vha e Mujuda a tshi dzula muḓini wa Shushani, e muḓivhalea, a tshi shuma musanda. 3/4O vha e muṅwe wa mathubwa vhe khosi Nebukhadinetsara wa Babele a vha hwala vha tshi bva muḓini wa Jerusalema, vhe na khosi Jekhonia wa Juda.
4/5Muloro wawe ngoyu: Ho pfala mukosi na vilinga na mubvumo na mudzinginyo wa shango na mufhirifhiri ḽifhasini. 5/6Zwino ha bvelela maḓiragoni mahulwane mavhili ó ḓilugisela u lwa nga tshao, a vhomba lu ofhisaho. 6/7Musi a tshi vhomba nga u ralo, lushaka luṅwe na luṅwe lwa bva pfumo u yo lwa na lushaka lwa vhavhuya. 7/8Ḽo vha ḽi ḓuvha ḽa swiswi ḽo tou bodo. Ḽifhasi ḽa welwa nga dambulo na khombo na u kandeledzwa na vilinga ḽihulu. 8/9Lushaka lwoṱhe lwa vhavhuya lwa hanganea nga u ofha khombo dzi no ḓo vha wela, vha ḓilugisela u lovha, vha ṱavhela Mudzimu mukosi. 9/10Vha tshi khou ralo u ṱavha mukosi, ha simuwa mulambo muhulu kha mukosi wavho, wo ḓala maḓi, u tshi nga u bva kusimani. 10/11Mapfuvhi a tswuka, ḓuvha ḽa bvisa mulomo ha vha na tshedza, vha nyadzeaho vha huliswa, vha lozwa vhaḓivhalea.
11/12Musi ho no fhira muloro na bono ḽa zwe Mudzimu a ḓiimisela u zwi ita, Maradokai a karuwa, a dzula a tshi humbula ngazwo, a linga nga nungo dzoṱhe u zwi ṱalukanya nga vhuḓalo, ḽa vhuya ḽa kovhela.
© Bible Society of South Africa 1998. Used with permission. All rights reserved.
