Luimbo lwa Judithi
1“Lidzani zwilidzo,
imbelani Mudzimu wanga nga mirumba,
imbelani Muṋe washu nga tshele;
mu imbeleni luimbo luswa,
mu huliseni ni vhidzelele dzina ḽawe!
2Muṋe washu ndi Mudzimu,
u kuya mmbi dza maswina dzó dzudzanywa,
u tsireledza vhathu vhawe,
o nndamukisa zwanḓani zwa vhatovholi vhanga.
3“Vhaashuru vho tsa vha tshi bva thavhani dza Devhula,
vho ḓa na magogo a mmbi;
magogo avho a ḓadza magovha,
bere dzavho dza phapha zwivhanga.
4Vha shushedza vha ri vha ḓo fhisa shango ḽanga,
vha vhulaha vhaṱhannga vhanga,
tshetshe dzanga vha dzi devhisa fhasi,
vhana vhanga vha vha thuba,
vha hwala vhasidzana vhanga.
5Hone Muṋe washu Ramaanḓaoṱhe a vha vilinganya,
a vha piringanya nga tshanḓa tsha musadzi.
6Muhali wavho ho ngo vhulahwa nga vhaṱhannga,
ho ngo wiswa nga Vhathithani,
ho ngo diwa nga miswonḓa;
o kundwa nga Judithi, ṅwananyana wa Mirari,
o mu kunda nga lunako lwa tshifhaṱuwo tshawe.
7O bvula nguvho yawe ya tshilikadzi
u vusa vho kandeledzwaho Israele.
Khofheni hawe o ḓola mapfura a nukhelelaho,
8a fukedza mavhudzi awe nga thebeni,
a ambara nguvho ya muḓali a mu fhura ngayo.
9Navhula dzawe dza takadza maṱo a mulangammbi,
lunako lwawe lwa tswa mbilu yawe,
banga ḽa mu tumula mutsinga.
10“Vhapheresia vha khura nga nyofho
vha tshi vhona vhuhali hawe,
Vhamedia vha ofha
vha tshi vhona e na tshivhindi.
11Vha farwa nga nyofho
musi vhaheḓana vhanga vha tshi ṱavha mukosi,
vha farwa nga tshahihihi
musi vha tshi huwelela,
maswina a tshi pfa mukosi wa nndwa a shavha.
12Vhana vha vhasidzana vha dziphuli
vha vha runga vha phuletshedza,
vha nga vho phuletshedza vhana vha magoswi,
vha lovha nndwani ya Muṋe wanga.
13“Ndi ḓo imbela Mudzimu wanga luimbo luswa.
Iwe Muṋe washu u muhulwane, u na vhugala,
maanḓa au a a mangadza, a u kundwi.
14Zwivhumbwa zwau zwoṱhe nga zwi u shumele;
wo tou amba zwa vha hone,
wa fema, zwa vhumbea;
a hu na ane a nga imedzana na ipfi ḽau.
15“Naho thavha dza thuthwa,
dza poswa magabeloni a lwanzhe,
nangwe wa sedza zwikwara zwa ṋoka unga phula,
hone vhane vha ofha Iwe,
u ḓi vha khathutshela.
16“Tshiṱhavhelo tshi nukhelelaho u ḓifha
ndi tshithu tshiṱukuṱuku,
na mapfura a zwiṱhavhelo zwoṱhe zwi fhiswaho,
ndi zwiṱukusa,
hone a ofhaho Muṋe washu
ndi muhulwane lini na lini.
17“Khombo lushaka lu vutshelaho vhathu vhanga!
Muṋe washu Ramaanḓaoṱhe u ḓo vha lifhedza,
u ḓo vha laṱisa nga ḓuvha ḽa khaṱhulo;
u ḓo lozwa ṋama yavho
nga mulilo na zwivhungu,
vha ḓo tambula vha lila lini na lini.”
18Ndi hone vhathu vha tshi ya Jerusalema u yo luvha Mudzimu, vha kumululwa, vha ṋekedza zwiṱhavhelo zwi fhiswaho, na nduvho dzine muthu a ṋekedza nga u tou funa, na zwifhiwa. 19Judithi a ana u ṋekedza Mudzimu thundu yoṱhe ya Holofenese ye vhathu vha mu ṋea, khathihi na lupila lwe ene muṋe a lu dzhia vhulaloni ha Holofenese. 20Vhathu vha ita vhuṱambo ha vhuya ha fhela miṅwedzi miraru vhe Jerusalema phanḓa ha hukhethwa, na Judithi a ḓi vha e navho.
Bvumo ḽa Judithi
21Musi ho no fhela maḓuvha ayo, muṅwe na muṅwe a vhuelela hayani. Judithi a humela Bethulia a dzula masimuni awe. A vha na bvumo shangoni ḽoṱhe vhutshilo hawe hoṱhe. 22Ha ḓa vhanna vhanzhi vha tshi tama u mu vhinga, hone ene a ḓi dzula e tshilikadzi vhutshilo hawe hoṱhe u bva tshee munna wawe Manase a tshinyala a swiṱwa. 23Judithi a lalama a swikisa miṅwaha ya ḓana na miṱanu (105) a tshi dzula nḓuni ya munna wawe. O vhofholola iḽa phuli yawe ya musidzana, a tshinyala e Bethulia, vha mu swiṱa tshaloni tsha munna wawe Manase. 24Vha nnḓu ya Israele vha mu lila vha fhedza maḓuvha maṱanu na mavhili. Musi a sa athu tshinyala a dzhia thundu yawe a i kovhela mashaka awe na mashaka a munna wawe Manase.
25Vhaisraele a vho ngo tsha levhelwa nga muthu na muthihi musi Judithi a tshi kha ḓi tshila, na musi a si tsheeho ha dovha ha fhela miṅwaha vha sa levhelwi nga maswina.
