ESTERE (TSHIGIRIKI) 15

₁Nga ḓuvha ḽa vhuraru, musi Estere o no fhedza u rabela, o bvula zwiambaro zwe a vha o zwi ambara a tshi yo rabela, a fuka zwifuko zwawe zwa maṱeleṱele. ₂A pfundulula nga zwifuko zwa vhuhosi, a rabela Mudzimu, Ene Mutshidzi ane a linda vhathu vhoṱhe, a konou ṱuwa na vhalanda vhawe vhavhili vha tshisadzini, ₃a ḓitika zwavhuḓi nga muṅwe mulanda, ₄muṅwe a tevhela o mu farela mutshila wa tshifuko tshawe (uri tshi si kwame fhasi tsha ḓala tshika). ₅Estere o vha e na vala ḽavhuḓi, lunako lwawe lwó tou khunyelela, tshifhaṱuwo tshawe tshó tsha tshi tshi tamisa, hone mbilu yawe yó tou ṋoka nga nyofho. ₆Musi o no fhiruludza miṋango yoṱhe, a swika phanḓa ha khosi. Khosi yo vha yo thukha kha khuluṋoni yayo ya vhuhosi, yo fuka khanzu dza vhuhosi yo fhelela, dzo nakiswa nga musuku na nungu dza mutengo muhulu, lwe ya vha i tshi ofhisa.

₇Khosi ya liladza maṱo, i tshi penya vhugala, ya sedza Estere yo sinyuwa lu ofhisaho. Mufumakadzi Estere a pepeleka, a haluluwa, a ṋoka, a ḓitika nga shaḓa ḽa mulanda we a vha e phanḓa hawe. ₈Huno Mudzimu a shandukisa mbiti dza khosi a vha na vhulenda. Khosi ya tshenuwa zwihulu ya fhufha i tshi bva kha khuluṋoni ya kuvhatedza Estere a vhuya a dzivhuluwa. Khosi ya mu fhumudza nga maipfi a vhulenda ya mu vhudza ya ri, ₉“Estere, mulandu ndi mini? Nṋe ndi khaladzi aṋu. Ni songo nnyofha! ₁₀A ni nga fi, zwe nda laya zwo livhiswa kha vhalanda vhashu fhedzi. Sendelani ngeno tsini.” ₁₁Zwino Serekesese a imisa luḓo lwa vhuhosi lwa musuku, a kwama mutsinga wa Estere ngalwo, ₁₂a mu kuvhatedza a ri, “Ambani na nṋe!”

₁₃Zwino Estere a mu fhindula a ri, “Ndo vha vhona muṋe wanga, vha tshi nga muruṅwa wa Mudzimu, mbilu yanga ya ṋoka nga nyofho ndi tshi vhona vhugala havho. ₁₄Vha a ofhisa, nangwe tshifhaṱuwo tshavho tshi na vhuthu.” Musi Estere a tshi khou amba a dovha a ṋoka a wela fhasi. ₁₆Khosi Serekesese a dinalea nga maanḓa, vhalanda vhawe vha linga u mu rudza mbilu.