1Ndi hone Holofenese a tshi vha vhudza uri vha ise Judithi he ha vhewa midzio yawe ya siliva, a vha laya uri vha mu dzudzanyele ḓafula a ḽe zwiḽiwa zwi ḽiwaho nga ene muṋe, vha mu ṋee waini i nwiwaho nga ene muṋe a nwe. 2Hone Judithi a ri, “Zwiḽiwa izwo ndi nga si zwi ḽe, ndi sa ḓo tshinya. Ndi ḓo fushea nga mbuvha ye nda ḓa nayo.” 3Holofenese a mu vhudzisa a ri, “Zwino musi mbuvha yaṋu i tshi fhela, zwiḽiwa zwi no nga zwenezwo ri ḓo zwi wana ngafhi ra ni nea? Hufha hu si na wa haṋu ane ra dzula nae fhano.” 4Judithi a mu fhindula a ri, “Ndi ana nga vhone muṋe wanga ndi ri, zwiḽiwa zwanga zwi nga si fhele Muṋe washu a sa athu vuledza nga tshanḓa tshanga zwine a ṱoḓa u zwi ita.”
5Ndi hone vhalanda vha Holofenese vha tshi isa Judithi denndeni, a eḓela henefho ha vhuya ha swika vhukati ha vhusiku. Mulindeloni wa vhukati ha vhusiku Judithi a vuwa, 6ngauri o vha o no ḓi isa malaedzwa ha Holofenese a ri, “Muṋe wanga, vha ḓivhadze uri nṋe mulanda wavho ndi tendelwe u bva ndi yo rabela.” 7Ndi hone Holofenese a tshi laya vha mu lindaho uri vha si thivhele Judithi a tshi bva. Judithi a dzula afho mishashani a fhedza maḓuvha mararu, vhusiku vhuṅwe na vhuṅwe a bva a ya govhani ḽa Bethulia, a yo ṱamba muvhili tshisimani he ha vhewa vhaḽa vhalindi. 8Musi e nḓilani a tshi yo ṱamba, a ḓi rabela Muṋe washu Mudzimu wa Israele uri a mu sumbe nḓila ya uri vha hawe vha kunde. 9Ndi hone a tshi humela denndeni o kumululwa, a dzula henefho zwiḽiwa zwawe zwa vhuya zwa ḓiswa khae a lalela.
Judithi e vhuṱamboni ha Holofenese
10Nga ḓuvha ḽa vhuṋa Holofenese a itela vhalangammbi vhawe vhuṱambo vhe vhoṱhe, vhalangagomane vha si vhidziwe. 11Holofenese a vhudza Baguasi muluvhedzwa a langaho zwa muṱa wawe, a ri, “Tshimbilani ni yo kwengweledza musadzi uyo wa Muheberu ane na mu londola uri a ḓe a ḽe, a nwe na riṋe. 12Zwi nga shonisa arali ri na musadzi o raliho ra si mu ambise. Ra sa ḓiphiṋa nae, vhoṱhe vha ḓo ri sea!”
13Zwenezwo Baguasi a tsiruwa Holofenese, a swika ha Judithi a ri, “Musadzi uyu wa lunako a nga tenda u hulisa muṋe wanga nga u ya khae? Arali a tshi tenda u ḓo dzula vhudzuloni vhu huliseaho u livhana na muṋe wanga, a nwa waini na riṋe ra takala, ṋamusi a gagamiswa unga muṅwe wa vhasadzi vha Vhaashuru vha shumaho pfamoni ya Nebukhadinetsara.” 14Judithi a fhindula a ri, “Ndi nṋe nnyi-vho ane nda nga landula ndi tshi vhidzwa nga muṋe wanga? Zwine zwa mu takadza ndi ḓo zwi ita ndi sa timatimi, nahone ndi zwone zwine zwa ḓo ntakadza nda vhuya nda fa.”
15Ndi hone Judithi a tshi takuwa a pfundulula nga dza vhuṱambo a ḓisungusedza, a ḓiṱama nga zwoṱhe zwa tshisadzi. Zwenezwo phuli yawe ya mu fhira phanḓa ya yo mu adzela nguvho ya vhukuse fhasi phanḓa hawe. Nguvho iyo o i ṋewa nga Baguasi uri a i adze nga misi musi a tshi tshingamela tshiswiṱulo. 16Ndi hone Judithi a tshi dzhena a tshingama khayo. Mbilu ya Holofenese yo vha i tshi khou mu swela, muya wawe wa vilingana. O vha a tshi tou swa nga lutamo lwa uri a mu dzhenise nnḓuni, ngauri u bva tshee a mu vhona, o vha o tou lindela tshifhinga tsha u mu tswa mbilu. 17Holofenese a vhudza Judithi a ri, “Inwani ni takale na riṋe!” 18Judithi a fhindula a ri, “Zwino ndi ḓo nwa, muṋe wanga, ngauri u bva tshee nda bebwa a thi athu vhuya nda ḓiphiṋa unga ṋamusi.” 19Ndi hone Judithi a tshi dzhia zwithu zwe mulanda wawe a mu dzudzanyela, a ḽa, a nwa ó livhana na Holofenese. 20Holofenese a takadzwa nga Judithi, a nwa a kalula u fhira misi miṅwe.
