MIRERO 29

₁Muthu a no ri u kaidzwa lunzhi a ḓi ita tshipimbi,

ha nga lengi u lozwiwa – a hu na ṅanga.

₂Hu tshi thoma u vhusa vha no thetshelesa Mudzimu

vhathu vha a pembela;

hu tshi vhusa vhavhi vhathu vha a gomela.

₃Ane a funa vhuṱali u takadza khotsi awe;

a no konana na dziphombwe u tambisa lupfumo lwawe.

₄Khosi i ladza shango nga khaṱhulo mbuya;

a no ziamedza vhathu nga mithelo u a ḽi phusukanya.

₅U hoya muthu ndi u mu retshela tshikwekwe.

₆Muvhi u fashwa nga vhuvhi hawe;

a no thetshelesa Mudzimu u fhululedza ó takala.

₇A no thetshelesa Mudzimu u funa vhashai vha tshi wana pfanelo dzavho;

vhavhi vhone izwo a vha zwi londi.

₈Vhanyefuli vha vusa mufhirifhiri muḓini;

vhaṱali vhone vha dzikisa mbiti.

₉Arali muṱali a isana tsengoni na tsilu,

tsilu ḽi fhufha ḽa ṋanzwa makole,

ḽa nyefula, ḽa si tendele muṅwe a tshi amba.

₁₀Vhane vha funesa u shulula malofha vha vhenga a sa solisei;

ndi vhavhi, vha ṱoḓa ṱhoho yawe.

₁₁Tsilu a ḽi dzumbi mbiti dzaḽo;

muṱali ene u a dzi kanda.

₁₂Arali muvhusi a tshi thetshelesa mazwifhi,

vhakoma vhawe vhoṱhe vha vha vhavhi.

₁₃Mushai na mukandeledzi vha fana nga hezwi:

Muṋe washu u vha ṋea vhutshilo vhuvhili havho.

₁₄Khosi i no haṱula vhashai i sa ṱaluli,

i ḓo vhusa u ya ho ya.

₁₅Ndayo na ṱhamu zwi ṋea muthu vhuṱali;

ṅwana a no ita zwine a funa u ḓo fhedza

nga u shonisa mme awe.

₁₆Hu tshi thoma u vhusa vhavhi vhuvhi vhu a anda;

vhavhuya vhone vha ḓo tshila vha vhona vhavhi vha tshi wa.

₁₇Laṱisa ṅwana wau;

u ḓo u rudza mbilu,

u ḓo u takadza.

₁₈Hu si na nzumbululo ya Mudzimu hu anda vhuhwarahwara;

u na mashudu ane a vhulunga mulayo.

₁₉Phuli a i laṱiswi nga maipfi fhedzi;

u pfa i a pfa, i ro sa zwi ita.

₂₀U a mu vhona muthu a no ṱavhanyedza u amba?

Onoyo zwi ḓo mu vhifhela u fhira na tsilu.

₂₁Arali wa lema phuli i tshee nga hayo,

i ḓo fhedza nga u u dzhiela zwoṱhe.

₂₂Wa mbilwana u vusa nndwa;

mudziambiti u ita zwivhi zwinzhi.

₂₃A no ḓihudza u a ṱukufhadzwa;

a no ḓiṱukufhadza u a huliswa.

₂₄Ane a shumisana na fobvu u a ḓivhenga;

a aniswa tsengoni u dzumba vhuṱanzi.

₂₅U ofha muthu ndi u ḓiretshela tshikwekwe;

ane a ofha Muṋe washu ene o tsireledzwa.

₂₆Vhanzhi vha ṱoḓa u funwa nga muvhusi;

khaṱhulo mbuya yone i wanala ha Muṋe washu.

₂₇A no thetshelesa Mudzimu u nengwa a sa fulufhedzei;

muvhi ene u nengwa a si na vhufhura.