DZIPHISALEMA 114

₁Zwiḽa Vhaisraele vha tshi pfuluwa Egipita,

muṱa wa Jakopo u tshi ṱutshela vhathu vha luambo lusili,

₂Juda o vha ene hukhethwa ha Mudzimu,

Israele a vha muvhuso wawe.

₃Lwanzhe lwo ri u zwi vhona lwa shavha,

Jorodani wa ela u tshi humela murahu,

₄dzithavha dza thamuwa unga dzithutha,

zwikwara zwa khana unga ngwana.

₅Iwe lwanzhe, u shavhani?

Iwe Jorodani, u humelani?

₆Inwi dzithavha,

ni thamutshelani unga dzithutha?

Inwi zwikwara,

ni khanelani unga ngwana?

₇Iwe ḽifhasi, tetemela

u tshi vhona Ene Muṋe wazwo,

u tshi vhona Mudzimu wa Jakopo;

₈o shandukisa tombo ḽa vha muhuvhi,

ḽiangahwe ḽe ḽa vha ḽo tou te,

ḽa vha zwisima zwa maḓi.