SIRAKHA 24

₁Vhuṱali vhu a ḓirenda,

vhu ḓikhoḓa tshivhidzoni

tsha vhathu vhaho.

₂Vhu amba na tshivhidzoni tsha Waṱaḓuluṱaḓulu,

ha ṱana vhugala haho phanḓa ha Ramaanḓa ha ri,

₃“Nṋe ndi bva mulomoni wa Waṱaḓuluṱaḓulu,

nda alama ḽifhasi unga khuli.

₄Ndo vha ndi tshi dzula ṱaḓuluṱaḓulu,

khuluṋoni yanga i phuphu ya gole.

₅Ndo vhumba ṱhanga ya tshitendeledzi ya lutombo ndi ndoṱhe,

nda tshimbila dzivhani ḽa lwanzhe.

₆Nṋe ndi vhusa magabelo a lwanzhe,

na ḽifhasi ḽoṱhe na tshakha dzaḽo,

₇Hoṱhe afho ndo ṱoḓa vhuawelo,

nda sedza hune nda nga akha dennde.

₈Ndi hone Musikazwoṱhe a tshi nndaya,

Muvhumbi wanga a nnangela fhethu ha dennde yanga.

O ri, ‘Dzula na Jakopo,

fhaṱa shangoni ḽa Israele ḽi vhe mukovhe wau.’

₉O mmbumba tsha kale na kale na lini na lini;

ndi ḓo ḓi dzula ndi hone lini na lini.

₁₀Ndo mu shumela denndeni khethwa,

nda ṱoka midzi thavhani ya Tsioni.

₁₁O nnyawedza muḓini wo nangwaho,

hune nda vhusa ndi Jerusalema.

₁₂Ndo ṱoka midzi vhukati ha vhathu vho huliswaho,

vhe Muṋe washu a vha nanga vha vha vhathu vhawe vhukuma.

₁₃Ndo ṱoṱomodzwa

nda nga mukedara wa Libanoni,

nda nga muṱaululo wa thavha ya Heremoni,

₁₄nda lapfa sa mutshevho wa Engedi,

nda nga mirosi ya Jerikho,

nda nga muolivi wa u naka u tsimuni,

nda adza matavhi unga muelela.

₁₅Nda nukhelela unga kinamoni na muunga,

sa tshiḓolo tsha mutengo muhulu,

nda nga ṋonzhe dza tshakha-tshakha dzi ḓifhaho,

na matombo a mivhalavhala

na tshioro tshi nukhelelaho tshi fhethu hukhethwa.

₁₆Ndo adza matavhi anga sa muhuyu,

matavhi anga a tshi ṱuma lurere, a tshi tamisa.

₁₇Ndo kulukusha zwi takadzaho sa munḓirivhe,

maluvha anga a vha mitshelo yavhuḓi ya vhugala na lupfumo.

₁₉Iḓani ha nṋe, noṱhe inwi ni nndilaho,

ni ḽe mitshelo yanga ni fure.

₂₀Ni ḓo nnyelelwa nga u ḓifha u fhira mutoli,

ifa ḽanga ḽi fhira tshigili tsha ṋotshi.

₂₁Ane a ḽa nṋe ha pfeleli,

a no nnwa u ḓo ḓi tama u dovha.

₂₂Muthu a no nthetshelesa a nga si shone,

a no pfa ndayo yanga a nga si tshinye.”

₂₃A hu na vhuṱali vhuṅwe,

vhuṱali hoṱhe ndi mafhungo a bugu ya mulanga wa Waṱaḓuluṱaḓulu,

ndi mulayo we ra laiwa nga Mushe, ḽone ifa ḽa tsinde ḽa Jakopo.

₂₅Mulayo u elela vhuṱali unga mulambo wa Phishoni,

sa mulambo wa Thigirisi misi ya mitshelo.

₂₆ṱhalukanyo yawo i fhufhuma sa Yufuratha,

sa Jorodani musi wa khaṋo.

₂₇U elela ndayo unga Nile,

sa mulambo wa Gihoni misi ya u fula nḓirivhe.

₂₈Muthu wa u thoma

ho ngo vhu ṱalukanya a vhu fhedza,

na wa u fhedzisela a nga si ele vhudzivha haho.

₂₉Mihumbulo yaho yo tsesa u fhira lwanzhe,

ngelekanyo yaho i fhira luwa.

₃₀Zwino nṋe ndi nga mugero u no bva khawo,

u no elela u tshi isa maḓi tsimuni.

₃₁Ndo ri,

“Ndi ḓo sheledza miri yanga,

ndi ḓo ṋukadza ngade yanga ya maluvha.”

Mugero uyo wanga wa mbo ḓi vha mulambo,

mulambo wa hula wa vha lwanzhe,

₃₂ndayo yanga ya mbo ḓi tswuka sa mapfuvhi,

maṱalazaza ayo a ṱanganya shango.

₃₃Ndi ḓo shulula ndayo sa vhuporofita,

ya vha ifa ḽa mirafho i kha ḓi ḓaho.

₃₄Vhonani!

Ndo vha ndi sa khou ḓishumela ndi ndoṱhe,

ndo ḓidinela vhoṱhe vha no ṱoḓa vhuṱali.