SIRAKHA 31

₁U ṱwa muthu o linda lupfumo

zwi a ondisa;

u vhilaela lupfumo zwi kundisa muthu u eḓela.

₂Wa vhilaela zwinzhi nga masiari, wó lala a u fari khofhe,

zwi u shaisa khofhe unga vhulwadze vhu ofhisaho.

₃Mupfumi u shuma a shisha mabiko a tshi khokha lupfumo,

a tshi awela a ḽa madzanga.

₄Mushai u shuma a shisha mabiko, a ḓi shaya, a vhuya a awela,

a wana a si na tshithu.

₅Mufuni wa musuku a nga si kundwe u tshinya,

a no funesa u bindula zwi a mu xedza.

₆Ho no ḓi lozwiwa vhanzhi nga musuku,

vho ṱangana na ndozwo yavho vhó livhana nayo.

₇Musuku ndi wone tshikwekwe tsha vhane vha u funesa;

tshi fasha matsilu oṱhe.

₈Mashudu mupfumi a no wanala a si na mulandu;

ndi a sa khakhiswi nga u funesa musuku.

₉Ri mu wanafhi, ra mu khoḓa?

Onoyo o ita zwimangadzo kha vha hawe.

₁₀A no lingwa nga musuku a bva o kuna ndi nnyi?

Zwo mu fanela u khoḓelwa zwenezwo.

O vha a tshi kona u tshinya hone a si tshinye,

a tshi kona u ita vhuvhi hone a si ite.

₁₁Thundu yawe a i nga lovhi;

tshivhidzo tshi ḓo khoḓa vhuthu hawe.

₁₂Arali u tshi khou swiṱula na muhulwane

u songo ḓiita phangwa;

u songo ṱavha mukosi wa ri, “A si zwiḽiwa, ndi iḓa u vhone!”

₁₃Humbula uri vhupangwa ho vhifha.

Hu na tshivhumbwa tshi no fhira iṱo nga vhuvhi naa?

Ndi zwine ḽa sokou dzula ḽi tshi rothisa miṱodzi.

₁₄U songo sukumedza o dzulaho tsini hau

wa hovha zwiḽiwa zwine ene a zwi tama.

₁₅ḓivha uri

na ene u funa zwine iwe wa funa, u vhe na vhusedzi.

₁₆Zwe wa avhelwa zwone iḽa unga muthu;

wa ḽesa vha ḓo u nengwa.

₁₇Ivha wa u thoma u litsha u ḽa, ndi hone u ḓifara zwavhuḓi;

u songo furesa u sa ḓo nengisa vhaṅwe.

₁₈Arali wo dzula na vhathu vhanzhi zwiḽiwani,

nga hu thome u ṅwata vhaṅwe.

₁₉Muthu o laiwaho ha ḽesi;

musi o eḓela ha zwimbelwi.

₂₀A no ḽa zwo eḓanaho u eḓela zwavhuḓi,

u a fhinduwa, a pfa o tou nzhala.

Khusha i lala i tshi teta,

i tshi totiwa dangani,

yó zwimbelwa.

₂₁Arali wo kombetshedzea u ḽesa, takuwa u yo ṱanza,

u ḓo pfa wo rulwa.

₂₂Nthetshelese ṅwananga,

u songo nnyadza,

ngavhuya u ḓo wana ndo amba zwone.

Zwoṱhe zwine wa ita u songo kalula,

ndi hone u sa nga farwi nga malwadze.

₂₃Muthu ane a vha mapakulile wa zwiḽiwa,

u ḓo khoḓwa nga vhathu,

nahone vha tshi amba zwone.

₂₄Muthu a no dzimana zwiḽiwa

u ḓo gungulelwa nga vhathu vhoṱhe,

vhuṱanzi ha tseḓa yawe a vhu nga fi.

₂₅U songo ḓiita makone wa u nwa waini;

yo no lozwa vhanzhi.

₂₆Tsimbi i lingwa ṋanḓoni;

u dzumbulula wa mazuwo nga waini.

₂₇Waini ndi mushonga arali muthu a i nwa a tou eḓanya.

A sa nwi waini u tshilelani?

Hufha yo fhonḓelwa u ri takadza.

₂₈Arali wa i nwa u tshi ḓihumbula,

wa nwa nga tshifhinga tsho fanelaho,

mbilu yau i a fhululedza,

muya wa takala.

₂₉Hone wa nwa wa tou kalula nga u sinyuwa kana u ṱonga,

zwi u vhaisa muya.

₃₀Tsilu ḽo no kambwa ḽi vha na mbiti,

ḽa fhedza ḽa huvhala,

ḽa vho vusa dzinndwa

hone ḽi si tshee na nungo.

₃₁U songo sema muṅwe vhuṱamboni ha waini,

u songo mu shonisa ó ḓitakalela;

u songo mu sengisa, kana wa mu dina nga u mu vhila mulandu.