SIRAKHA 32

₁Arali wa nangwa

u vha mutshimbidzavhuṱambo, u songo ḓihudza,

dzula na vhaeni u nge muṅwe ngavho.

Ranga u vha londola u sa athu dzula fhasi.

₂Musi wo no khunyeledza mushumo wau, dzula vhudzuloni hau,

uri u takale nga u vhona u ḓiphiṋa havho;

vha ḓo u khoḓela vhukoni hau wa ambadzwa muṅene.

₃Iwe u re mukalaha, u nga ḓi amba,

zwo u fanela,

huno ivha na vhuṱali,

u sa ḓo thithisa vhaimbi.

₄U songo amba hu tshi khou imbiwa,

u songo ṱana vhuṱali hau nga tshifhinga tshi si tshone.

₅Vhuṱamboni ha nyimbo hune ha nwiwa waini

zwi fana na nungu ya rubi yó nambatedzwa kha musuku.

₆Nyimbo dza zwilidzo hu tshi nwiwa waini i ḓifhaho,

zwi fana na tombo ḽa muroxwe ḽo nambatedzwa kha musuku.

₇Iwe muṱhannga,

amba arali zwo u fanela,

hone lindela u vhidzwa u si fhirise luvhili.

₈U songo ya naḽo, u songo fhafhaḓa.

U nge muṱali,

u ḓikaṱudze u tshi amba.

₉Musi u na vhahulwane u songo ḓiita thanga yavho;

u songo fara muambi mulomo.

₁₀Lupenyo lu rangela mubvumo;

muthu o dzikaho u rangelwa nga bvumo ḽawe.

₁₁Musi tshi tshifhinga tsha u balangana,

ivha wa u ranga u ṱuwa,

u songo tsha lenga,

u mbo ḓi livha hayani.

u songo vha wa u fhedzisela,

ṱavhanya u ye hayani,

u songo tsha mona-mona.

₁₂Henefho ḓiphine,

u ite zwine wa funa,

hone u songo tshinya nga maipfi a u ḓihudza.

₁₃Kha zwoṱhe izwo,

renda Muvhumbi wau;

ha u kambisi nga waini,

u tou u fusha nga zwivhuya.

₁₄A ofhaho Mudzimu u ḓo tenda a tshi mu laya;

Mudzimu u takalela ane a mu ṱoḓa.

₁₅A no ḓidina u ḓivha Mulayo u ḓo fushwa ngawo,

hone wa muhoyo Mulayo a ḓo mu khukhula.

₁₆Muṋe washu u takalela vhane vha mu ofha,

mishumo yavho mivhuya i penya unga tshedza.

₁₇Muvhi a tshi laiwa u konyolela matanda nḓevheni,

a shanda mulayo wa vho amba zwine ene a funa.

₁₈A re na ṱhalukanyo ha nyadzi u laiwa;

vhatsinda na vhadzialunyadzo a vha ofhi tshithu.

₁₉U songo ita tshithu ú songo tshi sedzulusa, ndi hone u sa ḓo ḓisola.

₂₀U songo fara nḓila i re na matombo,

u sa ḓo khukhulwa.

₂₁Nangwe wa tshimbila gondoni ḽo kupiwaho,

u songo ḓifulufhela tshoṱhe,

₂₂u thanyele na vhana vhe wa vha beba.

₂₃U songo ita tshithu u si na vhusedzi;

na zwenezwo ndi u vhulunga milayo.

₂₄A no ḓitika nga Mulayo u a u tevhedza;

ane a fulufhela Muṋe washu ha nga shoni.