SIRAKHA 36

₁Mudzimu Muṋe wa zwoṱhe,

ri sedze nga khathutshelo,

u songo ri sanda;

ita uri tshakha dzoṱhe dzi dzhenwe nga nyofho dzi u ofhe!

₂Angaladza tshanḓa tshau u lwe na tshakha dza vhannḓa,

vha vhone maanḓa au.

₃Wo ri sumbedza vhukhethwa hau vha tshi zwi vhona;

zwino vha sumbedze vhugala hau ri tshi zwi vhona.

₄Ndi hone vha tshi ḓo zwi ḓivha, unga na riṋe ri tshi zwi ḓivha,

uri Mudzimu ndi Iwe u woṱhe Muṋe washu.

₅Sumbedza zwiga nga huswa,

u ite zwimangadzo zwiswa,

sumbedza vhugala ha tshanḓa tshau na tshishasha tshau tsha maanḓa.

₆Vusa vhuhali hau,

u shulule mbiti dzau;

lozwa vha lwaho na riṋe,

u balanganye maswina.

₇U songo tsha lenga,

humbula zwe wa ana,

vhathu nga vha anee mishumo yau ya maanḓa;

₈mbiti dzau nga dzi duge dzi ḽe dzitshavhi, dzi vha mile,

vhakandeledzi vha vhathu vhau vha ṱangane na ndozwo;

₉kuya ṱhoho dza vhavhusi vho ri vutshelaho,

vha no ri,

“Vhathu ndi riṋe ri roṱhe.”

₁₀Kuvhanganya matsinde oṱhe a Jakopo,

uri shango ḽi vhe ifa ḽavho unga kale.

₁₁Khathutshela vhathu vha vhidzwaho nga dzina ḽau,

tonda Israele, we wa ri ndi tanzhe ḽau.

₁₂Pfela vhuṱungu muḓi wau mukhethwa Jerusalema, hune wa dzula hone.

₁₃ḓadza Tsioni nga thendo dza u renda Iwe,

thembele yau i ḓale vhugala hau.

₁₄Vhe wa ranga u vha vhumba,

sumbedza vhathu uri u ima navho,

u khunyeledze vhuporofita he ha ambiwa nga dzina ḽau.

₁₅Pfufha vhe vha u lindela,

vhaporofita vhau vha vhonale vhe vha ngoho.

₁₆Ipfa thabelo ya vhaḓinḓa vhau,

zwi tshi tevhedza mashudu e Aroni a shudufhadza vhathu vhau ngao;

₁₇ndi hone zwi tshi ḓo ḓihwa migumoni ya ḽifhasi,

uri Iwe u Muṋe washu,

u Mudzimu wa lini na lini.

₁₈Thumbu i nga ṱanganedza zwiḽiwa zwifhio na zwifhio,

hone zwiṅwe zwi fhira zwiṅwe.

₁₉Muṱali u ḓivha mazwifhi

u ḓi nga lulimi lu tshi thetshela lwa ḓivha uri ndi ṋama-ḓe.

₂₀Phaṱhi i kula vhathu nungo,

hone muthu a re na nḓivho u a mu lifhedza.

₂₁Musadzi a nga tenda munna muṅwe na muṅwe,

hone vhananyana vhaṅwe vha fhira vhaṅwe.

₂₂Lunako lwa musadzi lu a takadza tshifhaṱuwo,

a hu na tshi no takadza munna u fhira lwone.

₂₃Arali a dovha a amba nga vhuthu na vhulenda,

ndi hone munna wawe e na mashudushudu.

₂₄Mufumakadzi a nga pfumisa munna wawe;

ndi mufarisi o mu fanelaho,

ndi phuphu i no mu tika.

₂₅Tsimu i si na luhura i ḓo kandekanywa;

hu si na mufumakadzi,

munna u ḓo tendeleka a vusa mifhirifhiri.

₂₆Muthu ane a nga fulufhedza ḽivemu ḽi na tshihali

ḽi no bva kha muḓi uno ḽa dzhena kha muṅwe ndi nnyi?

₂₇Zwo ralo na kha munna a si na tshiṱaha,

a sokou eḓela hune a kovhelelwa hone.