SIRAKHA 37

₁Thama iṅwe na iṅwe i ḓo ri,

“Nṋe-vho ndi ṱama yau,”

hone ṱhama dziṅwe ndi ṱhama nga dzina fhedzi.

₂Arali ṱhama yau ya mbiluni ya shanduka swina ḽau,

a u nga ṱungufhali wa vhuya wa fa naa?

₃Yawee tsiko mmbi ya muthu!

Wo vhumbelwani wa tibedza ḽifhasi nga vhufhura?

₄ṱhama ya muhoyo i ḓo takala na iwe musi wa nḓalo,

hone musi wa khombo ya vho ima na maswina.

₅ṱhama ya ngoho

i u takalela vhukuma, ha ḓa swina ya ima na iwe.

₆U songo hangwa ṱhama i fulufhedzeaho,

u songo mu hangwa musi wo pfuma.

₇A hu na mueletshedzi a si na nyeletshedzo,

hone vhaṅwe vhaeletshedzi vha ṱoḓa zwi tshi nakela vhone,

hu si iwe.

₈Thanyela mueletshedzi,

u range u vhona zwine a ḓiṱoḓela; a nga vha

a tshi khou humbula ene muṋe fhedzi, a sa ṱoḓi zwi tshi nakela iwe.

₉A nga u vhudza a ri,

“Wo fara nḓila yone-yone!”

a konou u ṱamba a sedza zwine zwa u wela.

₁₀U songo ṱoḓa nyeletshedzo ya ane a si u takalele,

vhane vha u itela vivho vha dzumbele mihumbulo yau.

₁₁U songo tenda musadzi a tshi u eletshedza nga a muhadzinga wawe;

goswi u songo ḽi vhudzisa zwa nndwa,

kana mushavhi nga zwa vhushavhi,

kana murengi nga zwa mutengo,

kana wa vhutshivha nga zwa mitendelo,

kana wa tshiṱuhu nga zwa vhuthu,

kana mubva nga zwa mushumo,

kana mushumi wa tshifhinganyana nga zwa u vuledza mushumo,

kana phuli i sa shumi nga zwa mushumo u lemelaho.

U songo londa nyeletshedzo yavho ifhio na ifhio.

₁₂Tshau ḓowelana na muthu a na vhurabeli,

ane wa ḓivha uri

u vhulunga milayo ya Mudzimu,

wa mbilu i no nga yau,

a no ḓo ri u tshi khakha a u pfela vhuṱungu.

₁₃Zwino tsha u fhedzisela,

thetshelesa nyeletshedzo ya mbilu yau;

a hu na a no fulufhedzea u fhira yone.

₁₄Luvalo lwa muthu lu kona u mu sevha phanzi,

u fhira vhalindi vhaṱanu na vhavhili vho imaho muṱumbani wa thawara.

₁₅Tshi fhiraho zwoṱhe,

rabela Waṱaḓuluṱaḓulu

uri a tshimbidze ṋayo dzau nḓilani ya ngoho.

₁₆Ngelekanyo nga i vhe tshisima tsha mishumo yoṱhe;

humbula u sa athu ita tshithu.

₁₇Mudzi wa mihumbulo yoṱhe ya muthu ndi mbilu;

i medza matavhi maṋa:

₁₈Ndi zwivhuya na zwivhi, vhutshilo na lufu;

oṱhe vhuṋa hao nga misi a langwa nga lulimi.

₁₉Muthu a nga ṱalifha a funza vhanzhi,

hone ene muṋe zwi si mu farise tshithu.

₂₀Muṅwe ndi makone wa u amba,

hone a nga ḓi nyaliwa,

a fhedza a fa nga nḓala

₂₁nga u sa takalelwa nga Muṋe washu, a si ṋewe vhuṱali.

₂₂Ha vha na muṅwe a no ḓiita muṱali,

a ri zwe a wana a zwi dzinginyei,

₂₃hone muṱali vhukuma u laya vhathu vhawe;

zwe ene a wana ndi zwone zwi sa dzinginyei.

₂₄Muṱali, mashudu awe ha fheli;

vhoṱhe vha mu vhonaho vha ri u na mashudu.

₂₅Maḓuvha a muthu ha yi thambo,

hone maḓuvha a Israele ha vhalei.

₂₆Muṱali u ḓo fulufhedzwa; dzina ḽawe a ḽi fi.

₂₇ṅwananga, u tshi kha ḓi tshila

u sedze zwine zwa anḓana na muvhili wau;

u songo ḽa zwine zwa nga u vhaisa;

₂₈a si uri zwiḽiwa zwoṱhe zwi anḓana na vhathu vhoṱhe,

na u ḓifhelwa a vha fani.

₂₉U songo ḽesa madzanga afhio na afhio;

u songo vha khusha;

₃₀u ḽesa hu a lwadza,

vhupangwa vhu ḓisa muzwimbelo.

₃₁Ho no ḓi fa vhanzhi nga vhupangwa;

iwe iḽa u tshi ḓilinganya, ndi hone u tshi ḓo lalama.