Mushe
1Muṋe washu o ita
uri kha vha lutsinga lwa Jakopo
hu bebwe munna wa vhuthu,
a tshi funwa nga Mudzimu na vhathu.
Ndi Mushe, ane a kha ḓi humbulwa a pfi o shudufhadzwa.
2Mudzimu o ita uri vhugala hawe
vhu eḓane na ha vharuṅwa vhakhethwa,
a mu ṋea maanḓa a ofhiwa nga maswina awe,
3a tendela Mushe uri a tshi amba, manditi a Vhaegipita a gume,
a mu hulisa lwe na mahosi a mu ṱhonifha,
a mu ṋea milayo ya vhathu vhawe,
a mu dzumbululela vhugala vhuṅwe hawe.
4Mudzimu o mu nanga vhukati ha vhathu vhoṱhe,
nge a fulufhedzea, a ḓiṱukufhadza,
5a mu tendela u pfa ipfi ḽawe ḽi tshi bvuma,
a mu endedza a mu isa goleni,
henefho a mu ṋea milayo vho livhana zwifhaṱuwo.
Ndi mulayo
u ṋeaho muthu vhutshilo na nḓivho,
uri a funze Jakopo ndayo dzawe, Israele a funzwe zwe a vhofha.
Aroni
6Mudzimu o ita na u vusa Aroni wa tsinde ḽa Livi,
mukhethwa a no nga murathu wawe Mushe.
7O vhofha nae mulanga wa lini na lini,
a mu vhumba muphrista wa vhathu vhawe.
O mu ambadza zwifuko zwa maṱeleṱele, a mu fukedza nga vhugala.
8O mu ambadza zwa vhugala ho khunyelelaho,
a mu ṱama nga zwiga zwa thengo khulu,
tshifuko tsha tsini na khanzu ndapfu na luvhemba lwa u pakata.
9O mu nakisa nga ḓilogo dza musuku u mona hoṱhe,
a tshi kanda ḽiga dza lila lu takadzaho, uri a pfale e thembeleni,
tshi vhe tshihumbudzi kha vhana vha vhathu vha hawe.
10O mu ṋea na tshifuko tshikhethwa tsha musuku
na denga na muridili, makolo o lukwaho,
na tshipilakhana tsha u haṱula, na madeṅwa makhethwa,
zwa muḓali mutswuku wo lukiwaho nga vhutsila,
11na matombo a mutengo muhulu o koriwaho unga luswayo,
ó fhomiwa nga musuku a tshi nga nungu,
matombo ayo o koriwaho e a u humbudza vhathu tshivhalo
tsha matsinde a fumi na mavhili a Vhaisraele.
12Kha thebeni yawe o vha e na khare ya musuku
yó korwa ha pfi “Ndi mukhethwa.”
Yo vha i na vhugala vhuhulu,
yó vhumbwa lu kanukisaho,
í na makolo a takadzaho maṱo.
13Misi Aroni a sa athu vhewa,
zwithu zwo nakaho unga izwo a zwo ngo vhuya zwa vha hone.
A hu na muṅwe o no vhuyaho a zwi ambara
arali vhe si vhana vha Aroni fhedzi,
na vha lutsinga lwawe u ya ho ya.
14Nduvho yawe ya thoro yo pfi i fhiswe yoṱhe
na tshiṱhavhelo tsho vhewaho,
luvhili nga ḓuvha u ya ho ya.
15Mushe o vhumba Aroni a vha muphrista
a mu ḓodza mapfura makhethwa.
Uyo wo vha mulanga wawe wa lini na lini
na wa vha lutsinga lwawe misi yoṱhe ḽiṱaḓulu ḽi tshee hone,
uri a range vhathu phanḓa
vha tshi luvha Mudzimu e muphrista,
a vha shudufhadze nga dzina ḽa Muṋe washu.
16Mudzimu o nanga Aroni vhukati ha vhoṱhe vha tshilaho,
uri a ṋekedze Muṋe washu zwiṱhavhelo zwi fhiswaho
na zwioro zwi nukhelelaho,
tshi tshihumbudzo tsha u pfumelela Vhaisraele vhutshinyi.
17Mudzimu o mu ṋea milayo yawe,
a mu kumedza ndayo dza Mulayo,
uri a funze vha lutsinga lwa Jakopo zwo vhewaho nga Mudzimu,
a vhonetshele Vhaisraele nga Mulayo wawe.
18Ha ro vha na vhaṅwe vhe vha mu itela tshimbevha,
vha mu itela vivho phangani;
ndi Dathani na Abiramu na vhe vha ima navho,
na Kora na tshigwada tshawe,
vha mu sinyutshela vha mu ḽela vhuhali.
19Huno Muṋe washu a zwi vhona zwa si mu takadze,
a tou duga nga mbiti a vha lozwa.
O vha itela maḓembe a vha wela,
a vha fhisa nga khavhu ya mulilo vhe lore,
20ha vha u engedza vhugala ha Aroni, a mu ṋea ifa ḽawe;
o mu kovhela nduvho khethwa dza zwiranzhe,
na tshinkwa a ḽa a pfelela.
21Zwiṱhavhelo zwi ṋekedzwaho Muṋe washu
zwo vha zwiḽiwa zwawe na vha lutsinga lwawe.
22Hone ha na mukovhe wa shango ḽa Israele,
ndi ene fhedzi a sa kovhekani navho ifa ḽavho;
Muṋe washu o mu vhudza a ri,
“Mukovhe wau, ḽone ifa ḽau, ndi Nṋe.”
Finiasi
23Finiasi murwa wa Eliazara ndi ene wa vhuraru nga vhugala,
ngauri o ofha Muṋe washu a mu lwela,
vhathu vha tshi shandukela Mudzimu o ima a sa dzinginyei,
o vha na mbilutshinna na tshivhindi,
ndi zwe a kona u pfumelela Vhaisraele.
24Ndi zwe Mudzimu a vhofha nae mulanga wa mulalo,
a mu ita mulangi wa hukhethwa na wa vhathu vhawe,
uri ene na vha lutsinga lwawe,
vha vhe na tshileme tsha vhuphrista lini na lini.
25Mulanga we Mudzimu a vhofha na Dafita murwa wa Isai,
wa tsinde ḽa Juda,
wo vha wa ifa ḽa khosi
ḽi no pfukela kha murwa muthihi fhedzi
ḽi tshi tevhedza lutsinga;
hone ifa ḽa Aroni ndi ḽa vha lutsinga lwawe lwoṱhe.
26Zwino ngavhe Muṋe washu a tshi ni ṋea vhuṱali,
na haṱula vhathu vhawe ni sa ṱaluli,
uri vhugala ha vhokhotsi aṋu vhu ḓi dzula vhu hone
zwi tshi ya nga mirafho na mirafho.
