U‐Jobi 19

₁WAZA wapendula u‐Jobi, wati:

₂Kwoda kube ninina niya kubindisa umpefumlo wam, nindityumze ngamazwi? ₃Lamaxesha alishumi nindihlazisile: anidanile ukuba nindipata kakubi. ₄Kodwa okunene noko ndiposisileyo, isiposo sam sihleli nam. ₅Ukuba okunene niya kuzenza bakulu ngakum, nipikise ngakum isigxekwa sam: ₆yazini kaloku ukuba ngutixo ondipenuleyo, wandipahla ngotambo lwake.

₇Bona ke, ndiyabiza ngobudlwengu, kanti andamkeli impendulo; ndiyakala, kanti aluko ugwebo. ₈Umendo wam uwubiyile, ize ndingadluli; nasezindleleni zam ububekile ubumnyama. ₉Undihlubile ubungcwalisa bam; nesitsaba sentloko yam usisusile. ₁₀Undicitile ngamacala onke, ndimke ke; netemba lam ulinyotule njengomti. ₁₁Uvutisile ngakum ingqumbo yake; uyandibala ngokuba njengentshaba zake kuye. ₁₂Ayeza kunye amabandla ake, apakamise ngakum indlela yawo, ati waca ngokungqonga intente yam. ₁₃Abazalwana bam ubafudusile kude kum; nabandaziyo baqipukelene kanye nam. ₁₄Abalamane bam bancamile; nabazane bam bandilibele. ₁₅Abo bapambukele endlwini yam, nezicakakazi zam, bayandibala ngokuba ngowasemzini; ndingowelinye ilizwe emehlweni abo. ₁₆Ndabiza isicaka sam, kanti asisabelanga; ndataṙuzisa kuso ngomlomo wam. ₁₇Umoya wam usisimangaliso kumfazi wam, nokubongoza kwam kubantwana besizalo esandizalayo. ₁₈Kwa nentsatshana zindidelile: ziti ndakusuka, zandul’ ukuteta ngakum. ₁₉Onke amakolwane am andizondile; nabo ndabatandayo bajikile ngakum. ₂₀Amatambo am ate nama entlonzeni yam nasenyameni yam; kendasinda ngentlonze yamazinyo am. ₂₁Taṙu, taṙu, nina zihlobo zam! ngokuba isandla sikatixo sindibetile. ₂₂Yinina ukuba ninditshutshisa njengotixo, nokuba ningancanyiswa yinyama yam?

₂₃Akwaba amazwi am abe kwa kaloku eba̔lwa ke! akwaba abeqingqelwa encwadini! ₂₄ngesiqingqiso sesincete kunye nelode, aqoqelwe eweni ngonapakade! ₂₅Ngokuba ndisazi mna ukuba umkululi wam uhleli, nokuba ekupeleni wosuka eme pezu kwomhlaba: ₂₆nokuba okuya emveni kwentlonze yam kubujisiwe umzimba lo, ndoti noko kwa senyameni yam ndibone utixo; ₂₇endiya kumbona mna ngokwam, namehlo am aya kumkangela, engenguye owasemzini: ziyapelela oku izintso zam pakati kwam.

₂₈Ngokuba ninge nisiti: Siyamtshutshisela nina? ingcambo yendawo ifunyenwe kum nje. ₂₉Zoyikeleni ngenxa yeṙele; ngokuba umsindo ubang’ ukwohlwaya kweṙele; ukuze nazi ukuba kuko ukugweba.