IMIZEKELISO 10

₁Unyana olumkileyo uyamvuyisa uyise;

Ke unyana osisiyatha usisingqala sonina.

₂Ubuncwane bokungendawo abunyusi;

Ke bona ubulungisa buhlangula ekufeni.

₃UYehova akawuyeki ulambe umphefumlo welungisa;

Ke imbimbithelo yabangendawo uyayisunduza.

₄Úba lihlwempu osebenza ngesandla esidangeleyo;

Ke sona isandla sabakhutheleyo siyatyebisa.

₅Obutha ehlotyeni ngunyana onengqiqo;

Owozela ngexa lokuvuna ngunyana odanisayo.

₆Ziintsikelelo entlokweni yelungisa;

Ke wona umlomo wabangendawo ugubungela ugonyamelo.

₇Ukukhunjulwa kwelungisa kuhleli kunentsikelelo;

Igama labangendawo liba livithi.

₈Ontliziyo ilumkileyo uyayamkela imithetho;

Omlomo ufumana uthethe ukhahleleka phantsi.

₉Ohamba ngengqibelelo uhamba ngenkoloseko;

Ke yena ojibilizayo ngeendlela zakhe uyaziwa.

₁₀Otyanda ngoshiyi ubanga imbulaleko;

Omlomo ufumana uthethe ukhahleleka phantsi.

₁₁Lithende lobomi umlomo welungisa;

Ke wona umlomo wabangendawo ugubungela ugonyamelo.

₁₂Intiyo ixhokonxa ingxabano;

Uthando lugubungela zonke izono.

₁₃Ubulumko bufumaneka emlonyeni wonengqondo;

Intonga yeyomhlana woswele intliziyo.

₁₄Izilumko ziya kuqhusheka ukwazi,

Ke wona umlomo wesimathane yintshabalalo ekwalapha ukusondela.

₁₅Ubuncwane besityebi ngumzi waso oliqele;

Iintshabalalo yabasweleyo bubuhlwempu babo.

₁₆Umvuzo welungisa usingisa ebomini;

Ungeniselo longendawo lusingisa esonweni.

₁₇Umendo osa ebomini kukugcina uqeqesho;

Olahla isohlwayo uyandwendwa.

₁₈Oyifihlayo intiyo ungumlomo wexoki;

Ohambisa intlebendwane usisidenge.

₁₉Ebuninzini bamazwi akusweleki sono;

Owubambayo umlomo wakhe unengqiqo.

₂₀Yisilivere enyuliweyo ulwimi lwelungisa;

Intliziyo yabangendawo yintwana engeyakonto.

₂₁Umlomo welungisa udlisa abaninzi;

Izimathane zifa ngokuswela intliziyo.

₂₂Intsikelelo kaYehova, yiyo etyebisayo,

Imbulaleko àyongezi nento kuyo.

₂₃Ukwenza amanyala kunjengokudlala kwisidenge;

Ubulumko bunjengokudlala, kwindoda enengqondo.

₂₄Into anxunguphala yiyo ongendawo, yiyo emfikelayo;

Akunqwenelayo amalungisa aya kunikwa.

₂₅Kwakugqitha isaqhwithi, akabikho ongendawo;

Ke lona ilungisa luseko lwaphakade.

₂₆Njengeviniga emazinyweni, njengomsi emehlweni,

Linjalo ivila kwabalithumayo.

₂₇Ukoyika uYehova kongeza imihla;

Ke yona iminyaka yabangendawo iyanqanyulwa.

₂₈Ukulinda kwamalungisa luvuyo;

Ithemba labangendawo liyadaka.

₂₉Iyinqaba yabagqibeleleyo indlela kaYehova;

Yintshabalalo kubasebenzi bobutshinga.

₃₀Ilungisa alishukunyiswa naphakade;

Ke bona abangendawo abalihlali ilizwe.

₃₁Umlomo welungisa umila ubulumko;

Ulwimi lwempenduka luyanqanyulwa.

₃₂Imilebe yomlomo welungisa iyakwazi okwamkelekileyo;

Umlomo wabangendawo uyimpenduka.