IMIZEKELISO 21

₁Yimijelo yamanzi intliziyo yokumkani esandleni sikaYehova;

Uyibhekisa apho asukuba ethande khona.

₂Zonke iindlela zendoda zithe tye kwawayo amehlo;

Umlinganisi weentliziyo nguYehova.

₃Ukwenza ubulungisa nokusesikweni

Kunyulekile kuYehova ngaphezu kombingelelo.

₄Ukuqwayinga kwamehlo, nokugungubala kwentliziyo,

Kwanokukhubela kwabangendawo, kusisono.

₅Iingcinga zabakhutheleyo zisingisa elungeniselweni lodwa;

Konke ukungxama kusingisa entswelweni yodwa.

_6-7Ukuzuza ubuncwane ngolwimi oluxokayo

Ngumphúnga ophephethekayo wabafuna ukufa.

Ukubhuqa kwabangendawo kuyabaqweqwedisa;

Ngokuba àbavumi ukwenza okusesikweni.

₈Iligosogoso indlela yendoda enetyala;

Ke yena ohlambulukileyo, umsebenzi wakhe uthe tye.

₉Kulungile ukuhlala elungqamekweni oluphezu kwendlu,

Kunokuhlala ndlwini-nye nomfazi onengxabano.

₁₀Umphefumlo wongendawo unqwenela ububi;

Amehlo akhe akambabali ummelwane wakhe.

₁₁Ekuhlawulisweni komgxeki siyalumka isiyatha;

Ekuqiqisweni kwaso, isilumko samkela ukwazi.

₁₂Ilungisa liyayiqiqa indlu yongendawo.

Libaphenulela ebubini abangendawo.

₁₃Ovingca iindlebe zakhe ekukhaleni kwesisweli,

Naye uya kubiza, angàviwa.

₁₄Isipho entsithelweni sinqanda umsindo,

Isicengo esondweni lengubo sinqanda umsindo onamandla.

₁₅Kuluvuyo kwilungisa ukwenza okusesikweni;

Kuqhiphula umbilini kubasebenzi bobutshinga.

₁₆Umntu ondwendwayo, emke endleleni yengqiqo,

Uya kuhlala esikhungwini sabafileyo.

₁₇Othanda imigcobo uba yindoda esweleyo;

Othanda iwayini neoli akabi sisityebi.

₁₈Ongendawo lucamagusho ngenxa yelungisa;

Inginingini lisesikhundleni sabathe tye.

₁₉Kulungile ukuhlala ezweni eliyintlango,

Kunokuhlala nomfazi onengxabano neengqumbo.

₂₀Ubuncwane obunqwenelekayo neoli zisekhayeni lesilumko;

Ke umntu osisinyabi uyaziginya azigqibe.

₂₁Ophuthuma ubulungisa nenceba

Wofumana ubomi nobulungisa nozuko.

₂₂Isilumko siyaqabela emzini wamagorha,

Siyiwise inqaba ekukholoswe ngayo.

₂₃Ogciné umlomo wakhe nolwimi lwakhe

Ugcina umphefumlo wakhe ezingxingongweni.

₂₄Umkhukhumali oligagadele, ngumgxeki igama lakhe;

Ngowenza ngokukhukhumala okuphuphumayo.

₂₅Umnqweno wevila uyalibulala,

Kuba izandla zalo azivumi kusebenza.

₂₆Imini yonke linqwena linqwenile,

Ke lona ilungisa liyapha lingavimbi.

₂₇Umbingelelo wabangendawo lisikizi;

Kobeka phi na ke bakuwuzisa ngenxa yamanyala!

₂₈Ingqina elinamanga liyatshabalala;

Ke yona indoda evayo ithetha kuphele.

₂₉Indoda engendawo iyingwanyalala ubuso;

Ngothe tye oyiqondayo indlela yakhe.

₃₀Akukho bulumko, akukho ngqondo,

Akukho cebo malungana noYehova.

₃₁Ihashe lilungiselwa imini yokulwa,

Ke usindiso lona lunoYehova.