IMIZEKELISO 22

₁Igama elilungileyo linokunyulwa ngaphezu kobutyebi obuninzi;

Isimilo esilungileyo silunge ngaphezu kwesilivere negolide.

₂Ziyaqubisana izityebi namahlwempu;

Umenzi wabo bonke nguYehova.

₃Onobuqili ubona into embi, azifihle;

Ke zona iziyatha ziya kugqitha kuyo, zihlawuliswe.

₄Umvuzo wolulamo kukoyika uThixo,

Bubutyebi, nozuko, nobomi.

₅Ngameva nezibatha, endleleni yojibilizayo;

Ogcine umphefumlo wakhe makadede kuzo.

₆Mfundise umntwana ngendlela efanele umntwana;

Naxa athe wamkhulu, akasayi kumka kuyo.

₇Isityebi siya kuwalawula amahlwempu;

Nobolekayo ngumkhonzi endodeni embolekayo.

₈Ohlwayela ubugqwetha, wovuna ubutshinga,

Nentonga yokuphuphuma kwakhe umsindo yophela.

₉Oliso linobubele nguye osikelelekayo;

Kuba kwisonka sakhe upha isisweli.

₁₀Gxotha umgxeki, iphume ingxabano,

Kuthi bembe amaphike nokucukuceza.

₁₁Othanda ukuhlambuluka kwentliziyo,

Omlomo unobabalo, umhlobo wakhe ngukumkani.

₁₂Amehlo kaYehova alondoloza ukwazi,

Aphenule intetho yenginingini.

₁₃Ivila lithi, Kukho ingonyama phandle,

Ndoncinithwa ezitratweni.

₁₄Sisihogo esinzulu umlomo wabafazi abangengabo;

Obhavunyelwa nguYehova weyela khona.

₁₅Ukumatha kubotshiwe entliziyweni yomntwana;

Intonga yokuqeqesha yokumkisa kuye.

₁₆Ocudisa isisweli, ukuba andise okwakhe,

Nonika isityebi, uhlelwa yintswelo kuphela.

₁₇Thoba indlebe yakho, uve amazwi ezilumko,

Uyibhekise intliziyo yakho ekwazini kwam.

₁₈Ngokuba kumnandi, xa uthe wawagcina embilinini;

Makeme onke ephelele emlonyeni wakho.

₁₉Ukuze ùkholose ngoYehova,

Ndikwazisile namhla wena lo.

₂₀Andikubhalelanga na iintetho eziyintloko,

Ezineengcebiso nokwazi,

₂₁Ukuze ndikwazise isilinganiselo samazwi enyaniso,

Ukuze ubuye kwabakuthumileyo, uze namazwi ayinyaniso?

₂₂Musa ukusihlutha isisweli ngakuba sisisweli,

Ungamtyumzi olusizana esangweni;

₂₃Kuba uYehova eya kubambana nababambene nabo,

Awonakalise umphefumlo wabonákalisa bona.

₂₄Musa ukuqhelana nomntu onomsindo,

Ungahambi nendoda enobushushu,

₂₅Hleze ufunde iindlela zayo,

Urhintyelise umphefumlo wakho.

₂₆Musa ukuba phakathi kwababambana nomnye ngesandla,

Phakathi kwabamela into ebolekiweyo.

₂₇Ukuba ùthe akwaba nanto yakuhlawula,

Yini na ukuba athabathe ukhuko lwakho phantsi kwakho?

₂₈Musa ukuwushenxisa umlimandlela wakudala,

Abawenzáyo ooyihlo.

₂₉Ùyayibona indoda eyinkunkqele eshishinini layo? Inokuma phambi kokumkani;

Ayinakuma phambi kwabantu abangenagama.