1 IZikhronike 17

₁Kwathi lapho uDavide esehleli esigodlweni sakhe, wathi kuNathani, umphrofethi: “Bheka, mina ngihlala esigodlweni semisedari, kodwa umphongolo wesivumelwano sikaSimakade uphansi kwamakhethini.”

₂UNathani wathi kuDavide: “Yenza konke okusenhliziyweni yakho, ngokuba uNkulunkulu unawe.”

₃Kwathi ngalobo busuku izwi likaNkulunkulu lafika kuNathani, lathi: ₄“Hamba uyotshela uDavide, inceku yami, uthi: ‘Usho kanje uSimakade, uthi: “Wena awuyukungakhela indlu ukuba ngihlale kuyo, ₅ngokuba angikaze ngihlale endlini kusukela ngosuku engakhuphula ngalo u-Israyeli kuze kube namuhla, kodwa bengisemathendeni ngamathende, nasemathabanakelini. ₆Ezindaweni zonke engihambe kuzo naye wonke u-Israyeli ngake ngalikhipha yini izwi nakoyedwa wabehluleli bakwa-Israyeli engangibayale ukuba beluse abantu bami, ngathi: Aningakhele ngani indlu yemisedari na?” ’ ”

₇“Ngakho-ke uyakusho kanje kuDavide inceku yami, uthi: ‘Usho kanje uSimakade Wamabandla, uthi: “Mina ngakuthatha edlelweni, ekweluseni izimvu, ukuba ube ngumbusi wabantu bami u-Israyeli. ₈Nganginawe noma kuphi lapho wawuya khona, ngazibhubhisa zonke izitha zakho phambi kwakho. Ngiyakwenza igama lakho libe njengamagama abakhulu abasemhlabeni. ₉Ngiyakubamisela indawo abantu bami, u-Israyeli, ngibatshale ukuba bahlale endaweni yabo, bangaphinde bakhathazwe nakukhathazwa ngababi bababhubhise njengakuqala, ₁₀kusukela emihleni engamisa ngayo abehluleli ukuba babuse abantu bami u-Israyeli, ngiyakuzinqoba zonke izitha zakho. Ngiyakutshela futhi ukuthi uSimakade uyakukwakhela indlu yakho. ₁₁Kuyothi lapho izinsuku zakho seziphelele ukuba uye koyihlomkhulu, ngimise abozalo lwakho omunye zalweni lwakho, ngiwuqinise umbuso wakhe. ₁₂Nguye oyakungakhela indlu, ngiyakusiqinisa isihlalo sakhe sobukhosi, kuze kube phakade. ₁₃Mina ngiyakuba nguyise kuye, yena abe yindodana kimi; angiyukuwususa umusa wami kuye, njengalokho ngawususa kulowo owayengaphambi kwakho. ₁₄Ngiyakumbeka endlini yami nasembusweni wami, kuze kube phakade; isihlalo sakhe sobukhosi siqiniswe, kuze kube phakade.” ’ ”

₁₅UNathani wakhuluma kuDavide njengawo wonke lawa mazwi nanjengawo wonke lo mbono.

₁₆Inkosi uDavide yahamba yahlala phambi kukaSimakade, yathi: “Ngingubani Simakade Nkulunkulu, nendlu yami iyini ukuba ungithwale kuze kube lapha na? ₁₇Nalokho kwakuyinto encane emehlweni akho, Nkulunkulu; ukhulumile nangendlu yenceku yakho isekude, wangibuka kungathi ngingumuntu ophakemeyo, Simakade Nkulunkulu.

₁₈“UDavide angenezela ngokuthini kuwe ngodumo inceku yakho elwenzelweyo na? Wena uyayazi inceku yakho. ₁₉Simakade, ngenxa yenceku yakho nanjengokwenhliziyo yakho, wenzile konke lokhu okukhulu ukuba kwaziswe bonke lobu bukhulu.

₂₀“Simakade, akekho onjengawe, akekho uNkulunkulu ngaphandle kwakho, kukho konke esikuzwileyo ngezindlebe zethu. ₂₁Ngubani onjengabantu bakho, u-Israyeli, isizwe esisodwa emhlabeni, uNkulunkulu azihlengela sona ukuba sibe ngabantu bakhe, wazenzela igama ngezinto ezinkulu nezesabekayo ngokuxosha abezizwe phambi kwabantu bakho owabahlenga eGibhithe na? ₂₂Wabenza abantu bakho, u-Israyeli, baba ngabantu bakho kuze kube phakade, Wena Simakade waba nguNkulunkulu wabo.

₂₃“Manje Simakade, izwi olikhulume ngenceku yakho nangendlu yayo, maliqiniswe kuze kube phakade, futhi yenza njengalokhu ushilo. ₂₄Maliqiniswe libe likhulu igama lakho kuze kube phakade, ukuze kuthiwe: ‘USimakade Wamabandla unguNkulunkulu ka-Israyeli, yebo, uNkulunkulu ka-Israyeli,’ nendlu kaDavide, inceku yakho, iqinisiwe phambi kwakho.

₂₅“Wena Nkulunkulu wami ukwambulile endlebeni yenceku yakho ukuthi uyakuyakhela indlu, ngakho-ke inceku yakho ize ukuba izokhuleka phambi kwakho. ₂₆Manje Simakade, unguNkulunkulu, ukhulume okuhle encekwini yakho, ₂₇ake uvume ukubusisa indlu yenceku yakho, ukuba ibe phambi kwakho kuze kube phakade, ngokuba okubusisile Wena Simakade, kubusisekile kuze kube phakade.”