UJobe 6

₂“Sengathi usizi lwami

nenhlekelele engehlele

kungalinganiswa nokulinganiswa,

nokubhujiswa kwami

kubekwe esilinganisweni kanyekanye.

₃Ngokuba manje kuyasinda

kwedlula isihlabathi solwandle,

ngakho amazwi ami abengumbhedo nje.

₄Ngokuba imicibisholo kaSomandla ikimi,

ubuthi bayo buphuzwa ngumoya wami,

ukwesabisa kukaNkulunkulu kunami shaqa.

₅Imbongolo yasendle

iyakhala yini inotshani na?

Inkabi iyakhala yini inotshani na?

₆Okuduma kungadliwa yini

ngaphandle kukasawoti na?

Kuyahlwabusa yini okumhlophe kweqanda na?

₇Umphefumulo wami uyenqaba ukukuthinta,

kungukudla okunengekayo kimi.

₈“Sengathi isicelo sami singezwakala,

uNkulunkulu angiphe engikufisayo.

₉Sengathi uNkulunkulu angangiphihliza,

avule isandla sakhe, angibhubhise.

₁₀Lokho bekuyoba yinduduzo kimi,

bengiyojabuliswa yizinhlungu ezingapheliyo,

ngokuba angiwagodlanga amazwi oNgcwele.

₁₁Ayini amandla ami

ukuba ngingawethemba na?

Siyini isiphetho sami

ukuba ngingasibekezelela na?

₁₂Ngabe amandla ami

angamandla amatshe na?

Inyama yami iyithusi na?

₁₃Angikwazi ukuzisiza,

usizo lwami lususiwe kimi.

₁₄“Ogodlela umngani wakhe odangele umusa,

ulahla ukwesaba uSomandla.

₁₅Abafowethu bambuluzile njengomfudlana,

nanjengemithonjana eshayo,

₁₆emnyama ngenxa yeqhwa,

lapho ungqoqwane uzinqwabela kuyo.

₁₇Ngesikhathi sokufudumala, iyanyamalala,

uma sekushisa iyasha,

iphele endaweni yayo.

₁₈Abahamba ngezindlela zayo bayaphambuka,

benyukela oqwathuleni, babhubhe.

₁₉Izindwendwe zabahwebi bakwaThema zabafuna,

nemiqobo yezihambi zakwaShebha zibheke ngethemba.

₂₀Zadumala, ngoba zazinokuzethemba,

lapho sezifike khona zadangala,

₂₁nani seninjalo-ke kimi;

nibone okwethusayo, nesaba.

₂₂Ngasho yini kini, ngathi:

‘Ngipheni isipho empahleni yenu’ na?

₂₃noma: ‘Ngikhululeni esandleni sesitha,

ningihlenge esandleni sezidlova’ na?

₂₄“Ngifundiseni, mina ngizothula du,

ningichazele ukuthi ngone ngani.

₂₅Ukukhuluma okuqotho kunamandla kangakanani na?

Kepha ukusolwa yinina kusiza ngani na?

₂₆Nicabanga ukuthi ningawasola amazwi,

ngokungathi ukukhuluma kophelelwe yithemba,

kungumoya nje na?

₂₇Nenza unkatho ngentandane,

nithengisa ngomngani wenu.

₂₈Manje-ke, phendukani, ningibheke,

ngokuba angisoze ngawaqamba amanga kini.

₂₉Ake niphenduke,

kungabi bikho owenza ukungalungi.

Phendukani, indaba yami ilungile.

₃₀Kukhona yini ukungalungi

engikusho ngolimi lwami na?

Ulwanga lwami alunakukwehlukanisa yini okubi na?”