Bible Reading Plan – Day 102

₁Mandikubonge ngomxhelo wam wonke, *Ndikhoyo,

ndibalise ngayo yonke imimangaliso oyenzileyo.

₂Ndomemelela ngemincili,

ndikuvumel' ingoma, ndibonge wena, Phezukonke.

₃Zithe xa zihlehlayo iintshaba zam,

zawa zatshabalala, wakuvela wena, Ndikhoyo.

₄Kaloku undigwebele ityala lam;

ungqendeve esihlalweni sakho,

wena mgwebi olungileyo.

₅Uzikhalimele iintlanga,

wabatshabalalisa abantw' abagwenxa,

waliphanzisa kwaphela igama labo.

₆Iintshaba zethu zibhangile mpela,

uzidilize didli izixeko zazo;

sele zacimayo nasezingqondweni.

₇Kodwa uNdikhoyo uya kuhlal' elawula kude kube nini-nini;

selengqendeve enkundleni yakhe, elungele ukugweba.

₈Ulilawula ngobulungisa elimiweyo;

azigwebe kakuhle zonke iintlanga.

₉NguNdikhoyo inqaba yokuzimela abacinezelwayo;

nguye ikhusi ngamaxesha eembandezelo.

₁₀Bathembele ngawe, Ndikhoyo, bonke abakwaziyo;

kaloku akuzange ubafulathele abo bakufunayo.

₁₁Mbongeni uNdikhoyo ongqendeve ebhotwe eZiyon;

zibhengezeni eluntwini izinto asenzele zona.

₁₂Uyaliphindezela igazi labacinezelweyo;

akasilibali isikhalo sabo baselusizini.

₁₃Ndenzele inceba, Ndikhoyo;

bona indlela abandiphethe ngayo abo bandithiyileyo,

wena ondihlangula ethunzini lokufa.

₁₄Mandiluxele udumo lwakho

phakathi kwabantu bakho eJerusalem.

Ewe, ndinemincili ngenxa yokuba undihlangule.

₁₅Iintlanga zeyele kumhadi ebeziwembile,

zabhajiswa sisabatha ebezisithiyile.

₁₆Uzibonakalisile uNdikhoyo, wasiwisa isigwebo;

izikhohlakali zarhintyelwa kwayimisebenzi yazo.

₁₇Ziya kwelabafileyo izikhohlakali,

neentlanga zonke ezimfulathelayo uThixo.

₁₈Kaloku akayi kusoloko elityalwa amahlwempu;

ithemba labahlelelekileyo aliyi kusoloko lifuthaniselwe.

₁₉Lamla, Ndikhoyo; malungaphakami uluntu;

mazize phambi kwakho uzigwebe iintlanga.

₂₀Zenze zikoyike, Ndikhoyo,

ziqonde ukuba zingabantu nje kuphela.

₁Yini na, *Ndikhoyo? Wachasela?

Kutheni? Wazifihla ngexesha longxunguphalo?

₂Abantw' abagwenxa banolunya;

bayabaleqa ababuthathaka.

Mabarhintyelwe kwangaloo mayelenqe abo.

₃Bayazidla ngaloo magugwana abo,

bazicengezele konempumelelo,

bamdele uNdikhoyo.

₄Libathe lwale ikratshi abantw' abagwenxa;

bade bazikhohlise ngokuthi: “Akukho Thixo ngandawo!”

₅Zinempumelelo zonk' iinzame zabo,

kodwa imiyalelo yakho ikude lee kubo.

Bayazeya zonke iintshaba zabo.

₆Baziqhayisa ngokuthi abasoze boyiswe nto bona,

abasoze balibone ishwangusha.

₇Umlomo wabo mbi, uzel' izishwabulo, ubuxoki, nezisongelo;

basoloko beceba ububi nobutshinga.

₈Bahamba bencathama ngezindlu ezixekweni,

bezungul' ukugwint' abantw' abangenatyala,

balalel' abantw' abangenakuzikhusela.

₉Bazimel' engontsini, baxel' ingonyama,

ilalel' ixhoba elingumnt' oludwayi;

xhakamfu bambambise ngomgibe wabo!

₁₀Nal' olo sizana lungen' esigwini lusoyisakala.

₁₁Bathi xa bezikhohlisa: “UThixo akakhathali;

akahoyanga nto; akasoz' aqonde.”

₁₂Lamla, Ndikhoyo; caca ukuba unguThixo!

Sukubalibal' abantw' abahlelelekileyo!

₁₃Kungani bekudela nje abantw' abagwenxa?

Kutheni le nto bade bathi: “Akukho nt' aya kuyenza loo Thixo”?

₁₄Ewe, wena uzijongile wazibona iintlupheko neentsizi,

khon' ukuze ulungele ukusisiza.

Ewe, zibalekela kuwe nazo iindwayi,

wena ongumncedi weenkedama.

₁₅Zaphul' iimpondo ke izikrelemnqa nabantw' abagwenxa;

bohlwaye ide iphele nya inkohlakalo yabo.

₁₆Ngukumkani uNdikhoyo kuya kude kube nini-nini.

Zobhanga ziphele nya emhlabeni iintshaba zakhe.

₁₇Ndikhoyo, uyaziva izicelo zabantw' abathobekileyo;

uyabavuselela, uziphendule izicelo zabo.

₁₈Iinkedama nabacinezelweyo uyabaqwebela,

khon' ukuze oonyana babantu bangagrogrisi mntu ehlabathini.

₁Ndithembele *ngoNdikhoyo nje,

ningathini ukuthi: “Balekela ezintabeni zenu njengentaka!

₂Kaloku abantw' abagwenxa sebejolisile ngesaphetha esinotolo,

bajolisel' ukulidubul' emnyameni ilungisa.

₃Xa sekudilike neziseko nje,

lingenzani ke lona ilungisa?”

₄UNdikhoyo ukwibhotwe lakhe elilodwa,

uhlel' esihlalweni sakhe ezulwini.

Uyabagqala oonyana babantu,

uyazibona izintw' abazenzayo,

₅uyabavavany' abalungileyo nabagwenxa,

abathiye ngentiyokazi enkulu abaphalazi-gazi.

₆Uya kubabetha ngesichotho sesalfa namalahl' avuthayo abantw' abagwenxa;

iziphango nezaqhwithi ziba sisabelo sabo.

₇Kaloku ulilungisa uNdikhoyo;

uyazithanda izenzo ezilungileyo.

Abo balungisayo bobonana naye ubuso ngobuso.

₁Nceda, *Ndikhoyo!

Akukho namnye umnt' olungileyo;

baphelile abantw' abathembekileyo.

₂Bathetha ubuxok' abantu, bekhohlisana.

Bav' amantyontyelo baxokisane ngeentethw' ezimbaxa.

₃Wobaqhawul' imilebe uNdikhoyo abantw' abakhohlisayo;

wobashunqul' iilwimi abantw' abazigwagwisayo.

₄Nditsho nkqu abo bathi: “Sophumelela ngolwimi lwethu.

Iyeyethu nje imilebe le, ngubani owosixelela emasikuthethe?”

₅“Ndiza kulamla ke ngoku,” utsho uNdikhoyo,

“ngenxa yokuba amahlwempu ayacinezelwa,

neentsizana ziyancwina.

Ndobanika oko kuphumla bakulangazelelayo.”

_6-7Zithembekile izithembiso zikaNdikhoyo,

azinasibhidi, zinjengesiliva enyityilikiswe eziko kasixhenxe.

Uzigcinile izithembiso zakho, Ndikhoyo;

sigcine sikhuselekile kubantw' abagwenxa.

₈Basingqonge macal' onke abantw' abagwenxa,

lo gama wonke ubani ekuvuyela ukungcola.

₁Koda kube nini na, *Ndikhoyo, undilibele kwaphela?

Koda kube nini na ndingakuboni?

₂Koda kube nini na ndinomva-ndedwa,

ndinesingqala, ibuhlung' imini yonke intliziyo yam?

Koda kube nini zindivuyelel' iintshaba zam?

₃Bek' iindlebe, Ndikhoyo, undive, Thixo wam.

Ndihlaziye, hleze ndilal' ubuthongo bokufa,

₄hleze luthi lundoyisil' utshaba lwam,

bachwayit' ababandezeli, kuba ndoyisiwe.

₅Kodwa ndithembe uthando lwakho olungajikiyo;

ndochulumacha kuba uyandihlangula.

₆Ndombonga uNdikhoyo, kuba endiphethe ngobubele.

₁Iziyatha zithi akukho Thixo ngandawo.

Zonakele, futhi zenza amasikizi;

akukho ulungisayo kuzo.

₂Ke yena *uNdikhoyo ubabukele abantu;

uhlel' ezulwini efuna ukuqonda

ukuba ngaba sikho na isilumko,

nditsho ofuna ukunqula uThixo.

₃Kambe ke bonke bemkile,

xa bebonke bonakele;

kuba akakho olungisayo,

nditsho nokuba abe mnye.

₄Abanangqondo na abakhohlakeleyo;

abo baxhaphaza amawethu, ngathi batya isonka,

bangamnquliyo nokumnqula uNdikhoyo?

₅Baya kunkwantya benkwantyile,

kuba uThixo ukunye nâbo bamthobeleyo.

₆Nangona aminxwayo amacebo osizana,

nguNdikhoyo olixhadi lalo.

₇Akwaba ingavela eZiyon inkululeko yamaSirayeli,

akuba uNdikhoyo eyibuyisile inkqubela yabantu bakhe.

AbakwaYakobi baya kugcoba;

ewe, ochulumacha amaSirayeli.

₁*Ndikhoyo, ngubani oya kuba lundwendwe lwakho;

ingubani oya kutyelela kwakho?

₂Ngulowo uhambo ingenabala,

owenza ubulungisa,

ayithethe inyaniso engafihlisi.

₃Ngulowo unganyelisiyo,

ungamenziyo into embi uwabo,

ungamhlebiyo ummelwana wakhe.

₄Ngobadelayo abo babukulwe nguThixo,

abancome abo bamoyikayo uNdikhoyo,

ofunga angajiki noba kunyembelekile.

₅Ngongabolekisi ngemali yakhe,

ngenxa yokuba efuna inzala;

ngongekhe anyotywe ngokuthengisa umnt' ongenatyala.

Lowo ke wenjenjalo

ngumnt' ozinzileyo.

₁Ndikhusele kaloku, Thixo;

ndithembele ngawe.

₂Ewe, ndiyazibika, *Ndikhoyo; nguwe iNkosi yam;

ngaphandle kwakho, Mhlekazi, andinabani.

₃Kuba mna ulonwabo lwam luphakathi kwemilowo yakwaThixo;

nditsho leyo itshatsheleyo kweli hlabathi.

₄Bazandisel' iintsizi abo bazinyulela *thixo wumbi.

Andiyi kuba nanxaxheba kumadini abo;

andiyi kubanqula ngomlomo wam oothixo babo.

₅Nguwe kuphela, Ndikhoyo, inxaxheba endiyabelweyo;

lisentendeni yesandla sakhw' ibango lam.

₆Isabelo sam sisendaweni entle;

hayi ukuba lihle kwalo ilifa lam!

₇Mbongeni uNdikhoyo ngokuba endiphe icebo;

nesazela sam siyandiluleka ebusuku.

₈Ndihlala ndimbeke phambi kwam uNdikhoyo;

ungasekunene kwam, ngoko ke andiyi kushukunyiswa nto.

₉Yiyo ke loo nto ndihleli ndichwayitile nje;

ngenene ndiziva ndikhuselekile.

₁₀Kaloku akuyi kundishiya enyanyeni ndide ndife;

akuyi kusiyeka sibole isicaka sakho esithembekileyo.

₁₁Wena undazisa iindlela zobomi;

kaloku ndizala yimincili xa ndiphambi kwakho.

Ngasekunene kwakho yimihlali yodwa kude kube ngunaphakade.

₁Kuphulaphule ukunyaniseka kwam, *Ndikhoyo;

kubazel' iindlebe ukutarhuzisa kwam.

Yiva, nas' isicelo sam.

Kaloku mna andinankohliso.

₂Malicace kuwe ibango lam;

amehlo akho makakhangele ngokungenaxanasi.

₃Uyicikidile intliziyo yam, wandivelela ebusuku;

undivavanyile, akwafumana bugwenxa kum.

Kaloku ndizimisele ukungoni,

nditsho nangokuthetha oku.

₄Andixelisang' abany' abantu ngokuphikisana nomyalelo wakho;

ndizikhwebule kwiindlela zamathanda-gazi.

₅Ndithe ngcembe, ndihamba ngendlela yakho;

andaphambuka konke kuyo.

₆Ndizibika kuwe, Thixo; kaloku uyandiva;

zibaze iindlebe, uwuve umthandazo wam.

₇Bonakalisa uthando lwakh' olungagugiyo,

wena msindisi wâbo bathembela ngawe,

ubakhusele ezintshabeni zabo.

₈Ndilondoloze ngokokhozo lweliso lakho,

undisithelise ngethunzi lamaphiko akho

₉kubantw' abagwenxa abandihlaselayo,

kwezo ntshaba zindingqongileyo, zifuth' inkohlakalo.

₁₀Azinalo novelwano;

zithe lwale likratshi.

₁₁Ziyandizungula, zifun' ukundirhangqa;

zindithe ntsho ngamehlo, zijong' ukundiqethula.

₁₂Zifun' ukundithi qwenge-qwenge zixel' ingonyama;

zindilalele zincatham' engontsini njengerhamncwa.

₁₃Lamla, Ndikhoyo; zikhalimele iintshaba, uzichithe!

Ndihlangule ngekrele lakho kubantw' abagwenxa.

₁₄Ndihlangule, Ndikhoyo, koohlohlesakhe abazisu zimbaxa,

betsho ngenyambalala yoonyana.

Bathi zubelele bafe,

babushiyel' oonyana obo butyebi.

₁₅Mna ndobonana nawe ngenxa yobulungisa bam;

ndokwaneliswa kukubona wena xa ndivukayo.