Bible Reading Plan – Day 104

₁Thixo wam, Thixo wam, undishiyeleni na?

Kudala ndizigixa, ndicel' uncedo,

kodwa andikalufumani unangoku!

₂Thixo wam, emini ndikhalela kuwe, kodwa akundiva.

Nasebusuku ndiyakhala,

ndingafumani kuphumla phezu koko.

₃Kambe wena ungqendeve phakathi kwabakudumisayo;

nditsho wena ngangamela yakwaSirayeli.

₄Babekholose ngawe ookhokho bethu;

babekuthembile, wabahlangula wena.

₅Bakhala kuwe, wabakhulula wena;

babethembele ngawe, akwabadanisa.

₆Ke mna andimntu, ndifana nqwa nombungu;

ndiyintlekisa ebantwini, ndideliwe luluntu.

₇Bonk' abandibonayo bayandigxwala;

bandinyevulele, bahlunguzelis' intloko besithi:

₈“Ubethembele *kuNdikhoyo, makamhlangule kaloku;

makamkhulule ukuba uyamthanda.”

₉Kanti ke nguwe owawundikhusele kwasekuzalweni kwam,

wandilondoloza ndisesemabeleni kama.

₁₀Ndahlulelwa wena kwasekuzalweni kwam;

ubunguThixo wam wena ndingekazalwa.

₁₁Mus' ukuba kude kum.

Kaloku sele isemnyango imbandezelo;

ibe akukho namnye ongandincedayo.

₁₂Zindingqongile iintshaba zam,

ngathi ziinkunz' ezomeleleyo zaseBhashan;

zindivelele macal' onke.

₁₃Zikhamisile, zindivulel' imilomo;

ziyandijamela zixel' ingonyam' egqumayo.

₁₄Ndiphelelwe; amandla aphalele njengamanzi,

ahlukene onke amathambo am,

intliziyo yam iyanyibilika ngathi ngumthwebeba.

₁₅Aphele mpel' amandla kum,

ulwimi lwam lunamathel' ezinkalakahleni,

undishiy' eluthulini njengofileyo.

₁₆Lindirhawul' igquba labantw' abagwenxa,

ndangathi ndirhangqwe ligqiza lezinja;

bandidlavul' izandla neenyawo,

₁₇ngoko ke amathambo am aphandle.

Ke zona iintshaba zam zibukele.

₁₈Babelana ngeengubo zam;

benzelan' amaqashiso ngesambatho sam.

₁₉Ke wena, Ndikhoyo, mus' ukuba kude nam;

Mkhululi wam, khawuleza undincede!

₂₀Ndihlangule ekreleni,

undisindise kwezi zinja.

₂₁Ndihlangule emlonyeni wengonyama;

ndisindise kulo mngcipheko ndikuwo.

₂₂Ndowabalisela amawethu ngezint' ozenzileyo,

ndikubonge ebandleni, ndithi:

₂₃“Mbongen' uNdikhoyo, nina bamhlonelayo;

mdumiseni nonke, nina bonyana bakaYakobi;

mhloneleni nonke, nina nzala kaSirayeli!

₂₄Kaloku akazideli engazicekisi iintsizi zehlwempu;

uyaziva izicelo zalo, angalifulatheli.”

₂₅Ndiya kukubonga esidlangalaleni,

ngenxa yezinto ondenzele zona;

ndowafezekisa amadinga endawenzayo,

phambi kwebandla lâbo bakuthobelayo.

₂₆Amahlwempu aya kutya ahluthe mpu;

bombonga uNdikhoyo abo bamfunayo.

Banga banganempumelelo engapheliyo.

₂₇Zonke izizwe zomkhumbula uNdikhoyo,

zibuyele kuye ehlabathini liphela,

ziqubude kuye zonke iintlanga.

₂₈Kaloku nguNdikhoyo ukumkani;

nguye umlawuli weentlanga zonke.

₂₉Ewe, zonk' izinhanha ziya kudlelana, zimvume yena;

nditsho yonk' intw' engumntu iya kumnqul' uNdikhoyo.

₃₀Izizukulwana ziya kumkhonza,

ooyise babalisele abazukulwana ngoNdikhoyo.

₃₁Ewe, nâbo bangekazalwa boxelelwa

ukuba uNdikhoyo wabasindisa abantu bakhe.

₁*InguNdikhoyo nje ondalusayo,

ndingaswela ntoni na?

₂Nguye ondikhaphelela kumadlelo aluhlaza,

andikhokelele kwimilambo empompozayo,

₃nditsho ndihlaziyeke emphefumlweni.

Undithundezela kwezona ndlela zilungileyo,

ukuze lidunyiswe igama lakhe.

₄Ngoko ke, nokuba ndihamba kwiingxondorha ezimnyama,

andinadyudyu.

Kaloku ungakum, wena Ndikhoyo;

isagweba sakho nebhunguza lakho lixhadi lam.

₅Undamkela okondwendwe oluxabisekileyo,

uqukeze ude undihlinzeke ngesidlo, iintshaba zam zibukele.

Ngenene, iyaphuphuma indebe yam.

₆Ngoko ke ndiya kulandelwa kokulungileyo nabububele,

umzi wakho ube likhaya lam yonke imihla yobomi bam.

₁*LelikaNdikhoyo ihlabathi liphela, nako konk' okukulo;

ndixel' ilizwe elimiweyo kunye nabemi balo.

₂Walisekela phezu kweelwandle;

walithi zinzi phezu kwayo imilambo.

₃Ngubani onganyukayo aye entabeni kaNdikhoyo;

ingubani oya kuthi gcobho endlwini yakhe?

₄Ngulow' uzandla zimsulwa, untliziyo inyulu,

lowo ungazinquliyo izintw' ezingento,

low' ungafungiyo exoka.

₅Uya kumthamsanqela uNdikhoyo,

kuye kube chosi, kube hele,

kuba nguThixo umkhululi wakhe.

₆Sinjalo ke isizukulwana sabo bamfunayo,

abo bafuna ukubona uThixo kaYakobi.

₇Vulekani, masango;

vulekani, minyango yakudala,

angene uKumkani iNgangalala!

₈Ngubani loo Ngangalala yoKumkani?

NguNdikhoyo igorha elinamandla onke;

nguNdikhoyo onamandla onk' edabini!

₉Vulekani, masango; vulekani, minyango yakudala,

angene uKumkani iNgangalala!

₁₀Ngubani loo Ngangalala yoKumkani?

NguNdikhoyo onamandla onke;

nguye uKumkani, nguye iNgangalala.

₁Ndiwuphakamisela kuwe, *Ndikhoyo, umphefumlo wam;

₂Thixo wam, ndithembele kuwe.

Mandingakhe ndidane konke;

mazingakhe zindivuyelele konk' iintshaba zam.

₃Ewe, mabangadani bonk' abathembele kuwe;

mayibe ngâbo banxaxhayo amabadane.

₄Ndibonise indlela yakho, Ndikhoyo;

ndifundise iindlela zakho.

₅Ndikhokelele enyanisweni yakho, undifundise.

Kaloku nguwe, Thixo, umkhululi wam;

ndihleli ndikulindele imini yonke.

₆Khumbula, Ndikhoyo, inceba yakho,

nothando lwakho obukade unalo kwakudala.

₇Ungazikhumbuli izono zobutsha bam,

nokungathobeli kwam umthetho wakho;

kanye ndazelelele ngothando olungagungqiyo,

ngenxa yobubele bakho, Ndikhoyo.

₈UNdikhoyo unobubele, ulungile.

Yiyo loo nto abafundisayo indlela yakhe aboni.

₉Abathobekileyo ubakhokelela kokulungileyo,

abafundise indlela yakhe abalulamileyo.

₁₀Zonk' iindlela zikaNdikhoyo zezothando nenyaniso

kwabo bathobela umnqophiso nemithetho yakhe.

₁₁Ngenxa yegama lakho, Ndikhoyo, ndixolele ityala lam

nakuba lilikhulu kangaka.

₁₂UNdikhoyo uya kumbonisa indlela umntu omoyikayo.

₁₃Uya kuhlala enenkqubela

nabantwana bakhe ube lilifa labo umhlaba.

₁₄Ungumhlobo kwabo bamhlonelayo uNdikhoyo,

uyabaqondisa umnqophiso wakhe.

₁₅Ndihleli ndilindele uncedo lukaNdikhoyo,

kuba uyawusombulula umgib' ezinyaweni zam.

₁₆Buyela kum, Ndikhoyo, undenzele inceba;

kaloku ndilikheswa, ndixhwalekile.

₁₇Ndikhulule kwintlungu endikuyo,

undikhuphe ezimbandezelweni.

₁₈Qwalasela ubunzima nosizi endikulo,

undixolele zonk' izono zam.

₁₉Zigqale ubuninzi bazo iintshaba zam,

nendlela ebuhlungu ezindiphethe ngayo ngolunya.

₂₀Bukhusele ubomi bam, undihlangule;

mandingadaniswa kaloku, kuba ndithembele ngawe.

₂₁Mandihlale ndingasoleki ndililungisa,

kuba kaloku ithemba lam likuwe.

₂₂Bakhulule, Thixo, abantu bakho amaSirayeli

kuzo zonke iimbandezelo zabo.

₁Ndigwebele, *Ndikhoyo;

kaloku azisoleki iindlela zam,

nethemba lam kuwe aligungqi.

₂Ndivavanye, undicikide, Ndikhoyo;

yigocagoce intliziyo yam ngokunjalo neengcinga zam.

₃Ndisoloko ndikhokelwa zizibele zothando lwakho;

ndihamba njalo nasenyanisweni yakho.

₄Andinanto yakwenza namamenemene,

ndaye ndingenabudlelwana nabakhohlisi.

₅Ndiyithiyile imbutho yabantw' abagwenxa,

ndaye ndingadlelani nabantw' abangcolileyo.

₆Ndazihlamba kubo ezam izandla,

ndenjenjeya ukuy' esibingelelweni sakho, Ndikhoyo,

₇ndivuma ingoma yombongo,

ndibalisa ngazo zonk' izenzo zakhw' ezingummangaliso.

₈Ndiyakuthanda ukuhlala endlwini yakho, Ndikhoyo,

apho sikhoyo isidima nesithozela sakho.

₉Ungandikhukhulisi kunye naboni,

ungandidibi nezigwinta,

₁₀abantw' abazandla zipheth' ukungcola,

abasoloko begush' ukunyoba.

₁₁Ke mna ndohlala ndingasoleki;

ndihlangule undenzel' inceba.

₁₂Iinyawo zam zithe zinzi emhlabeni;

ndibonga uNdikhoyo ebandleni.

₁*InguNdikhoyo nje ondikhanyiselayo,

inguye nje ondisindisayo, ndingoyika ntoni?

InguNdikhoyo nje inqaba yam, ndingoyika bani?

₂Xa bendidlavula abantw' abakhohlakeleyo,

iintshaba zam nabandileqayo,

kokhubeka kwabona, bawe.

₃Nokuba ndingade ndingqongwe ngumkhosi,

andiyi kuba naluvalo konke.

Nokuba ndirhawulwe yimfazwe,

ndiya kuthembela ngoNdikhoyo.

₄Ndinqwenela into enye kuphela kuNdikhoyo,

ndaye ndifuna yona kanye:

le yokuba ze ndihlale kwaNdikhoyo yonke imihla yobomi bam,

ndiqwalasele ubuhle bakhe, ndimfune endlwini yakhe.

₅Kaloku wondikhusela enqabeni yakhe ngexesha lobubi,

andifihle engontsini endlwini yakhe,

ndithi ngcu phezulu eliweni.

₆Ngoko ke ndiya kuzikrobela iintshaba ezindingqongileyo,

ndinikele uNdikhoyo idini endlwini yakhe,

ndinemivuyo ndicula, ndivumela uNdikhoyo.

₇Ndive, Ndikhoyo, xa ndizibika kuwe;

yiba nenceba kum, undiphulaphule.

₈Kweli wena uthi: “Funani ubuso bam,”

intliziyo yam yathi: “Ewe, ndiyafuna ukukubona, Ndikhoyo.”

₉Mus' ukuzifihla kum, Ndikhoyo,

ungasilahli ngomsindo isicaka sakho.

Wena mncedi wam, mus' ukundilahla;

uzungandishiyi, Thixo wam, Mkhululi wam.

₁₀Xa ndilahlwe ngubawo noma,

wondichola yena uNdikhoyo.

₁₁Ndifundise indlela yakho, Ndikhoyo,

undikhokele endleleni elungileyo,

kuba zininzi iintshaba zam.

₁₂Uzungandiyekeli kwabandivukelayo,

kuba andivukele amangqina obuxoki,

afutha ukundenzakalisa.

₁₃Ngenene ndobuxhamla kambe ububele bukaNdikhoyo

lo gama ndisadla amazimba.

₁₄Thembela kuNdikhoyo; yomelela, ube nesibindi!

Ewe, thembela kuNdikhoyo wena!

₁Ndizibika kuwe, *Ndikhoyo, xhadi lam;

musa ukuzenza isithulu, hleze ndifane nabeyel' emhadini xa uthe cwaka.

₂Live ilizwi lam xa ndizibika,

xa izandla zam ndiziphakamisela kuwe ebhotwe.

₃Uzungandisingeli phantsi kunye nabantw' abagwenxa,

abantw' abenza okungcolileyo,

abathetha kamnandi nabamelwane, kanti bagush' ububi.

₄Babuyekeze ngokwemisebenzi yabo,

ubohlwaye ngenxa yenkohlakalo yabo.

Bavuze ngokwezintw' abazenzayo,

bafumane loo nto ibafaneleyo.

₅Ngenxa yokuba bengayinanzi imisebenzi kaNdikhoyo,

kwakunye nezintw' azenzileyo,

yena wobabhubhisa baphele kuthi tu,

bangaze babuye bavuke.

₆Makabongwe uNdikhoyo,

kuba ukuvile ukutarhuzisa kwam.

₇NguNdikhoyo amandla am nekhaka lam;

ndithembele ngaye ngomxhelo wam wonke.

Ndoncedakala nditsho ndibe nemincili,

ndimbonge ngengoma.

₈NguNdikhoyo obomelezayo abantu bakhe;

nguye omkhuselayo nomsindisayo umthanjiswa wakhe.

₉Basindise abantu bakho, Ndikhoyo;

lithamsanqelise ilifa lakho.

Baluse, ubathwale ngoku kude kube nini-nini.