Bible Reading Plan – Day 110

₁Ngaba anikhethi buso na kodwa,

nina balawuli, xa nilawulayo?

Anibalamli ngegobe kodwa abantu?

₂Hayi bo! Niyila inkohlakalo;

kweli hlabathi naba ugonyamelo.

₃Abakhohlakeleyo banxaxha bezalwa nje;

ewe, banxaxha besesesizalweni, bathethe ubuxoki.

₄Banobuhlungu njengeenyoka;

banjengenyushu ezenza isithulu,

₅ukuze ingeva tu xa iculelwa ngabo banemilingo;

ubuqili benkintsela bungasebenzi.

₆Khawubaphule loo mazinyo, Thixo;

wafohloze amabamba engonyama, *Ndikhoyo.

₇Mabaphel' emehlweni, baxel' amanzi ehamba ngomsele.

Mabajolise ngeentolo ezibuthuntu.

₈Mabanyibilike, baxel' inkumba.

Mabaxel' imva-mbilini ejik' endleleni.

₉Imbiza ingekawuva umlilo,

noba wokhekile, noba awokhekanga,

izikhohlakali ziqweqwediswa zingabi sabonakala.

₁₀Ke lona ilungisa liya kugcoba lisakuyibona le mpindezelo;

liya kugxampuza egazini labakhohlakeleyo.

₁₁Abantu baya kutsho bathi:

“Kuthe kanti kuneziqhamo ukuba lilungisa;

ngenene ukho uThixo olilawulayo ihlabathi.”

₁Khawundihlangule ezintshabeni, Thixo wam;

ndikhusele kwabo bandihlaselayo.

₂Ndihlangule kubantu abagwenxa;

ndisindise kwizikrelemnqa.

₃Uyabona bayandilalela.

Izikhohlakali zidibana ngam,

ndingonanga nokona, *Ndikhoyo.

₄Hayi, andenzanga nento le,

kodwa nâbo bendiqulela.

₅Ndikhoyo, Thixo Somandla,

wena Thixo kaSirayeli,

phakama uze kundinceda!

Vela undibone kaloku.

Zivukele uzohlwaye iintlanga.

Mabangasindi abaphembi boqhushululu.

₆Baphuma ngamarhatya,

ngathi zizinja ezilambayo,

benze umkhulungwane esixekweni.

₇Nâbo begragrama,

iilwimi zabo ngathi likrele;

bathi ngubani obakhathaleleyo.

₈Ke wena, Ndikhoyo, uyabahleka;

ewe, ziyintlekisa kuwe iintlanga.

₉Ungumkhuseli wam, ndizimela ngawe;

ulikhakha lam, wena Thixo.

₁₀Ngenxa yokuba undithanda

uyandihlangabeza, Thixo wam;

uya kuziswantsulisa iintshaba zam.

₁₁Musa ukubatshabalalisa, Thixo,

khon' ukuze abantu bakho bafumane umzekelo.

Ngaloo mandla akho basarhaze babe zizibhadu-bhadu.

Ulikhakha lethu, wena Ndikhoyo.

₁₂Kukrwada ukuthetha kwabo;

mabaxakane nekratshi labo,

kuba bayaqalekisa, futhi bayaxoka.

₁₃Babhubhise ngomsindo wakho;

batshabalalise kuthi tu,

khon' ukuze ihlabathi lazi

ukuba kwaYakobi kulawula uThixo.

₁₄Baphuma ngamarhatya, ngathi zizinja ezilambayo,

benze umkhulungwane esixekweni.

₁₅Bafunana nokutya, barhaqaze bakuba benganeli.

₁₆Kodwa ke mna ndiya kucula ndibonga amandla akho;

ndiya kumemelela kwasekuseni,

kuba uthando lwakho luyamangalisa.

Kaloku wena uyinqaba yam,

ungumqolomba ngomhla wembandezelo.

₁₇Ndiya kukubonga, mkhuseli wam.

Mna ndizimela ngoThixo;

ewe, uThixo ondithandayo.

₁Awu, Thixo, usilahlile!

Ngoku sitsho soyisakala.

Wena usivelele ngomsindo.

Nceda, khawube nebuyambo.

₂Wena uwunyikimisile umhlaba;

wona utsho wazama-zama; kungokunje uyaqhaqhazela.

Nceda ungcibe ezo ntanda.

₃Abantu bakho ubavise inkxwaleko;

ewe, usitsho sazizinxada-nxada.

₄Ubanike intshinga abakuhlonelayo;

ubahluphezile ukuze bazuze uloyiso.

₅Nceda ngamandla akho usivelele,

ukuze basinde abo ubathandayo.

₆UThixo uthethe *esesibingelelweni sakhe,

wathi: “IShekem ndiyayahlula-hlula,

ngoloyiso ndiyayihlahlela;

intili yeSukoti yona ndiyibenge.

₇IGiliyadi yeyam, noManase ngowam.

UEfrayim lelona xhadi lam;

uJuda ngumsimbithi wam.

₈UMowabhi yintili yam yebhongo;

ke yena uEdom ndiyambanga.

EFilistiya ndikhwaza uloyiso.”

₉Ngubani onokundisa emzini oxhotyisiweyo?

Ngubani onokundisa e-Edom?

₁₀Noko usilahlile, Thixo.

Awusaphumi nemikhosi yethu.

₁₁Sincedise ezintshabeni zethu:

kaloku olomntu uncedo luphuthile.

₁₂Ukuba uThixo ungakuthi siya kuphumelela;

uya kuzinyhasha iintshaba zethu.

₁Thixo, ndiyakhala;

nceda undiphulaphule.

₂Ndibhenela kuwe ndisekudeni;

ndisuke ndanengevane.

Nceda undikhokele,

undise entabeni ephakamileyo.

₃Kaloku wena uyinqaba yam;

uyandikhusela ezintshabeni.

₄Ndiya kuhlala kwakho njalo-njalo,

ndithi ncwaba phantsi kwaloo maphiko.

₅Kaloku, wena Thixo, uzivile izithembiso zam;

undinike ilifa labakuhloniphayo.

₆Yandise imihla yokumkani;

makakhule ade akhokhobe.

₇Makangqendeve kwaThixo njalo-njalo,

umkhusele ngothando lwezibele zakho;

ewe, maluse ngokuthembeka kwakho.

₈Mna ke ndiya kukubonga mihla le,

ndihlale ndizifezekisa izithembiso zam.

₁Ndithe cwaka ndikholose ngoThixo;

kaloku nguye yedwa ondikhululayo.

₂Ndizimela ngaye, nguye ondisindisayo.

Yinqaba yam, soze ndichukunyiswe.

₃Koda kube nini nimhlasela umntu,

ninxanel' igazi lakhe,

noba enjengodonga olukekeleyo,

enqwa nothango oluwayo?

₄Nizungula ukumbhukuqa awe;

niqhayisa ngokuxoka.

Ngomlomo niyathamsanqelisa,

ukanti niyaqalekisa ngaphakathi.

₅Ndithe cwaka, ndikholose ngoThixo;

kaloku nguye yedwa ithemba lam.

₆Ndizimela ngaye, nguye ondisindisayo.

Yinqaba yam, soze ndichukunyiswe.

₇Ndisindiswa nguThixo, uliwonga lam.

UThixo yinqaba yam, ndizimela ngaye.

₈Maxa onke thembelani kuye, bantundini,

nizityand' igila kuye;

kaloku uThixo yinqaba yethu.

₉Abantu bafana nomphunga.

Umntu yinto engento yanto.

Akubekwa esikalini ukhaphukhaphu;

hayi, kubhetele kwaphepha.

₁₀Musa ukuqamela ngezigalo;

musa ukuthembela ekuphangeni.

Noba bungade bufumbe ubutyebi,

wena musa ukuqamela ngabo.

₁₁Nto zimbini azithethileyo uThixo:

Le yokuba amandla ngawakhe,

₁₂nenkqu yothando ivela kuMhlekazi.

Kaloku wena, Nkosi, uyazelelela,

umntu umvuza ngokwemisebenzi yakhe.

₁Wena Thixo, unguThixo wam, ndithe swi nguwe.

Umphefumlo wam uyakulangazelela.

Ndihlala ndizula-zula ndikufuna;

ndinxanele wena oku komhlaba obharhileyo.

₂Ndikuzingela phakathi *esibingelelweni,

ukuze ndibone amandla nesidima sakho.

₃Kaloku izibele zothando lwakho ziyabugqwesa nobomi,

ngoko ndiya kuhlala ndikudumisa.

₄Ndiya kukubonga lo gama ndisaphilayo;

ndiya kunyukela kuwe ngomthandazo.

₅Ndiya kutya ndide ndincinde amafutha;

ndiya kumemelela ndicule ndinemihlali.

₆Emandlalweni wam ndicinga ngawe;

ndicamngca ngawe phakathi kobusuku.

₇Kaloku wena uluncedo lwam;

ngamaphiko akho uyandikhusela, nditsho ndicule ndinemincili.

₈Ndizimisele ukuthi nca kuwe;

kaloku wena uyandixhasa.

₉Ke bona abafunana nobomi bam

baya kweyela kwelabafileyo.

₁₀Baya kubulawa ngekrele,

babe lixhoba leengcuka.

₁₁Ke yena ukumkani uvuyiswa nguThixo.

Bonke abaqamela ngaye baya konwaba.

Amaxoki ke wona aya kusikw' umlomo.

₁Bek' iindlebe, Thixo, ndiyakhala;

ndikhusele kwizoyikiso zotshaba.

₂Ndifihle kumayelenqe abakhohlakeleyo,

kwihlokondiba eliyila inkohlakalo.

₃Ulwimi lwabo lubukhali njengekrele;

bajolisa ngamazwi abukhali okweentolo.

₄Balalela badubule abamsulwa;

babaqubula bengenasazela.

₅Bayakhuthazana kobu bukrelemnqa;

bafuthelana ngamayelenqe;

bathi: “Soze sibonwe!

₆Ngubani onokulibhaqa eli yelenqe lethu?

Iqhinga lethu silenze ngobuchule.”

Kaloku intliziyo yomntu lulwandle!

₇Kodwa ke uThixo uya kubadubula ngotolo;

uya kubachana benzakale bengalindelanga.

₈Uya kubabhubhisa ngenxa yokuthetha kwabo,

abababonayo banikine iintloko.

₉Bonke baya kutsho boyike,

bakubhengeze akwenzileyo uThixo,

bayetyise imisebenzi yakhe.

₁₀Amalungisa makonwatyiswe *nguNdikhoyo.

Ewe, makazimele ngaye;

onke amalungisa makaqhayise ngaye.

₁Ufanelwe kukubongwa, Thixo, eZiyon,

zifezekiswe kuwe izibhambathiso.

₂Wena uyawugqala umthandazo;

bonke baya kuza kuwe.

₃Ngenxa yobugwenxa bethu

iziphoso zethu ziyasongamela,

kodwa wena uyasixolela.

₄Uthamsanqelekile omnyulayo wena.

Lowo umhlalisa enkundleni yakwakho.

Siya kufumana ukwanela endlwini yakho,

apho kukho ubunewu-newu nobungcwele.

₅Ngemisebenzi yakho emangalisayo

uyasiphendula usikhulule.

Thixo, wena uyinkululeko kuthi.

Ihlabathi liphela lithembele ngawe,

nditsho neelwandle jikelele.

₆Iintaba waziseka ngegunya lakho,

zingumzobo wamandla akho.

₇Ungumthozamisi weelwandle ezilwayo,

umthibazi wamaza alatyuzayo,

umthomalalisi wezizwe ezixokozelayo.

₈Nabaseziphelweni zehlabathi bathi,

bakuzibona ezi zinto, barhwaqele.

Ngapha nangapha wena uhlwayela ulonwabo.

₉Ilizwe wena ulalusa ngemvula;

wena ulitsho libe yintombazana.

Ke yona imilambo iyankcenkceza;

uyabalungiselela bafumane indyebo.

₁₀Amasimi uwavathisa ngemvula, atsho ee thinte ngamanzi.

Umhlaba uwunyakamisa ngomvimbi, zitsho ziqhame izityalo.

₁₁Unyaka uwuthi jize ngendyebo,

kuvuz' ubusi namafutha kwimizila yeenyawo zakho.

₁₂Amadlelo athe thande yimfuyo;

iinduli zimbeje-mbeje, ziyavuya.

₁₃Idobo liphanjwe yimihlambi;

iintili zivathiswe likhaba.

Ziyakratsha, ziyacula zinemincili.