Bible Reading Plan – Day 264

₂₅“Imihla yam ikhawuleza ngaphezu kwembaleki;

ewe, ibaleka gqitha, ibe ke ayinayo nanto incomekayo.

₂₆Iphala njengesikhephe seengcongolo;

ikhawuleza ngathi lukhozi lurhiwula ixhoba.

₂₇Noba sendisithi:

‘Hayi, ngoku ndiza kukhe ndizingcwabe izikhalazo zam,

ndibobotheke ndihlale ndizonwabele,’

₂₈ndisuka ndoyike ndibe namanwele,

kuba ndiyaqonda ukuba wena akungeke undibalele njengongenatyala.

₂₉Ke, ukuba ndiza kugwetywa, ngani ukuba ndibe sazabalaza?

₃₀Noba ndingade ndihlambe ngekhephu,

izandla zam ndizicoce ngesephu,

₃₁wena uya kundiphosa emhadini,

nditsho ndibe rhono-rhono,

kwankqu neempahla zam zingandamkeli.

₃₂“Ebengumntu na kakade ukuba ndibe ndiphendulane naye?

Hayi, bendingeze ndime naye enkundleni!

₃₃Kaloku phakathi kwethu sobabini

akukho mlamli unokusahlula ngezandla zakhe.

₃₄Hayi bo! Khawumke noswazi lwakho

khon' ukuze ndingabi sankwantya ndisoyika isohlwayo.

₃₅Xa kunjalo ke ndingatsho ndithethe ndingenaloyiko,

kodwa ngale ndlela izinto zimi ngayo ngoku andinako.”

₁“Kwowu, ndidikiwe bobu bomi!

Ngoko ke ndosuka ndithethe utyhatyhiwe,

isikhalo sam ndisitsho ndibindekile!

₂Ewe, ndiya kuthetha naye ndithi:

‘Ngani ukuba undigwebe, Thixo?

Hayi kaloku, ndazise ityala kuqala.

₃Ikunceda ntoni wena ingcinezelo enje,

ukutshabalalisa umsebenzi wezandla zakho,

uze uthelele amacebo ezikhohlakali?

₄Ngaba amehlo akho afana nawabantu na?

Ngaba nawe ubona njengomntu?

₅Ngaba imihla yakho ifana neyomntu?

Ngaba iminyaka yakho ifana neyakhe na?

₆Ngani ke ukuba ugqogqe iziphoso zam,

uzingelane nesono sam?

₇Kaloku uyazi ukuba andinatyala,

ibe ke futhi uyazi ukuba akekho ongandihlangulayo esandleni sakho.

₈“ ‘Ndenziwa nguwe nje, ndabunjwa zizandla zakho,

ngaba ngoku uza kujika unditshabalalise?

₉Khumbula kaloku ukuba wandibumba njengodongwe!

Ngaba ke ngoku uza kundivuthulula ndibe luthuli?

₁₀Andithi na kaloku wandithulula njengobisi,

ndaza ke ndakhanywa njengengqaka?

₁₁Kaloku wandibumba ngamathambo nemisipha,

wandinxibisa inyama, wandambathisa ufele.

₁₂Wandinika ubomi, wandambesa ngezibele;

undinonophele ke wandixhasa.

₁₃“ ‘Kambe ke zonke ezi zinto undifihlele,

kuba le ibiyinjongo yakho kakade.

₁₄Kaloku wena ube ugade ukuba ndone

ukuze undigwebe ngenxa yesono sam.

₁₅Ukuba ke ndisisikhohlakali kunyembelekile kum!

Kambe ke noba ndililungisa andinaqhayiya,

kuba ndibandezelekile, ndambethwe lihlazo.

₁₆Noba ndingade ndiqholose wena ungandizingela njengengonyama,

uphinde wenze kum ngokwaloo mandla akho amangalisayo.

₁₇Usoloko unamangqina andintywiliselayo,

ibe ke nengqumbo yakho iyakhula ngakum,

kuba uyaphindelela ukundihlasela.

₁₈“ ‘Kwakutheni ukuze undiyeke ndizalwe?

Awu! Akwaba ndandife ndingekalanywa naliliso eli!

₁₉Ngoku ngendifana nongazange abekho,

kuba ngendavela nje ndasiwa engcwabeni.

₂₀Ewe, bufutshane kambe ubomi bam!

Hayi khona, khawundiyeke ndikhe ndiphumle kancinane!

₂₁Kaloku ngoku ndiyahamba,

ibe ke soze ndibuye;

ndiya kwilizwe lethunzi nobumnyama.

₂₂Ewe, ndiya kwilizwe lobumnyama namathunzi,

nelesithokothoko sobumnyama,

apho ukukhanya kufana nobumnyama.’ ”

₂“Uthi kungathi cwaka, ingaphendulwa le nyambalala yamazwi akho?

Ucinga ukuba ukulavuza okunje kungamthethelela umntu?

₃Uthi oku kubhobhoza kwakho kuya kusenza sithi cwaka?

Uthi wena ngoku uphoxisa thina masikuyeke singakuphoxi?

₄Andithi na kaloku wena uthi imfundiso yakho imsulwa,

nawe ngokwakho awunabala phambi koThixo?

₅Awu, akwaba uThixo ebengadandulukayo athethe nawe,

₆akhe akubonise iingontsi-ngontsi zobulumko!

Kuba kambe kunzulu ukwazi kwakhe!

Yiqonde into yokuba esi sohlwayo akunike sona uThixo

siyalaba-laba kubutyala bakho.

₇“Uthi ungahle uziqonde iingontsi-ngontsi zobunzulu bukaThixo,

ngokunjalo nobungakanani bamandla kaSomandla?

₈Hayi bo, úngaphaya kwakho, namazulu uwakrobele!

Ewe, yena ubona nelabafileyo, ube ke wena awazi nto!

₉UThixo ulivelele ihlabathi,

kanti ke ulukrobele nolwandle!

₁₀Ukuba ke usuka akubambe edlula,

aze akuse ematyaleni,

ngubani ongamnqandayo?

₁₁Kaloku yena uyabazi oongantweni;

ke, xa ebona ububi ùthi makangenzi nto?

₁₂Ke zona iziyatha zoza zibe nengqondo

mhla iqwarha lazala umntu!

₁₃“Ukuba uthe wayisebenzisa ingqondo yakho,

unganako ukolulela izandla kuThixo.

₁₄Ukuba uphethe ububi yahlukana nabo,

nezinto zenkohlakalo mazingafumaneki nasemzini wakho.

₁₅Ukuba unokwenjenjalo ke unganako ukuma ungenaxhala nganto,

ume ngxishi ungenadyudyu.

₁₆Ngako ke ungatsho uyilibale yonke le mbandezelo;

ewe, ilibaleke njengeempuphuma zomlambo oseluwuthile.

₁₇Ke bona ubomi bakho buya kutsho buqaqambe ngathi kusemin' emaqanda.

Le meko yakho yokubandezeleka ijike ibe yeginyis' amathe, oku komsobomvu.

₁₈Uya kutsho uzithembe, kuba kaloku nekamva liqaqambile.

Ngenene uya kuhlala ukhuselekile ungenaxhala.

₁₉Uya kuthi zava ungenadyudyu,

bathi nabaninzi bacele uncedo kuwe.

₂₀Ke zona izikhohlakali ziya kucinywa amehlo,

abe ke namathuba okuphuncula engasekho,

kuphela kwanto iseleyo kukuqhawuka.”

₂“Inene, ningabona bantu;

ibe ke nobulumko buya kufa nani!

₃Kambe ke nam ndinengqondo njengani;

anindidluli nganto.

Kakade ke nithi ngubani ongàzaziyo ezi zinto?

₄“Mna ndiyakhala kuThixo, aze andiphendule;

kodwa ngoku sendiyintlekisa nakwizihlobo zam –

ewe, ilungisa lomfo ongenabala,

kambe ke namhlanje ndisisigculelo!

₅Oseshweni uyadelwa ngabathe zava;

ogxadazelayo uyakhatywa!

₆Kukho ulonwabo ezindlwini zezikrelemnqa;

abamqumbisayo uThixo bakhuselekile;

nditsho abo bacingayo ukuba uThixo usezandleni zabo.

₇“Kodwa ke khanibuze nakwiinyamakazi, ziya kunifundisa;

nibuze nasezintakeni, zinixelele.

₈Khaningqawe ulwazi nakwizilo zomhlaba, ziya kuninika;

ninkinkqe ukuqonda nasezintlanzini elwandle, ziya kuniphokozela.

₉Phakathi kwazo akukho ungaqondiyo ukuba le nto yenziwe *nguNdikhoyo.

₁₀Kaloku zonke izinto eziphilayo zisesandleni sakhe,

nobomi boluntu lonke buxhomekeke kuye.

₁₁Kaloku kwanjengokuba umlomo usiva ubunjani bokutya,

nendlebe ke iyawaphicotha amazwi.

₁₂Ubulumko buyafumaneka kwiingwevu;

ke bona ubudala buza namava.

₁₃“Kanti ke yena uThixo unobulumko namandla,

amacebo nengqiqo.

₁₄Into ayiqhaqhileyo akukho mntu unokubuya ayakhe;

ngokunjalo nomntu amvaleleyo akukho ungamvulelayo.

₁₅UThixo akuwavalela amanzi kuyabalela;

kanti ke akuwavulela kutsho kube ziimpuphuma.

₁₆Ukomelela noloyiso lolwakhe,

kanti ke nabakhohlisi ngokunjalo nabakhohliswa basesandleni sakhe.

₁₇Yena amaphakathi uwatsho ancitheke,

nabagwebi abatsho babe ziimpanga-mpanga.

₁₈Uyawakhulula amakhamandela aqhotyoshwe ngookumkani,

aze bona ngokwabo abanxibise umbhinqo wamabanjwa.

₁₉Ababingeleli ubatsho baphoxeke,

aze wona amakhwahla awakhiqe.

₂₀Amaciko athenjiweyo uwatsho abhibhidle;

aze ayiphuthise nengqiqo yamadoda amakhulu.

₂₁Amatshawe uwahlaza ngendelelo;

ke zona iingwanyalala uzihlutha izixhobo.

₂₂Utyhila izinto ezifihlakele ezinzulwini zobumnyama,

nobona bumbonde-mbonde abujike bube kukukhanya.

₂₃Uyazikhulisa izizwe, abuye azivuthulule;

azithi jize ngobungangalala, abuye aziyekele zithinjwe.

₂₄Iinkokheli zezizwe uzitsho zibe zizithwanga-thwanga,

zifathule zibhadula enkangala.

₂₅Ngoko ke ziphutha-phutha ebumnyameni, kungekho kukhanya;

zigxadazele njengamanxila.”

₁“Hayi kaloku, zonke ezi zinto sendikhe ndazibona

ngala wam amehlo;

ewe, ndizivile ngezi zam iindlebe, ndaye ke ndiziqonda.

₂Zonke ezi zinto nizaziyo nam ndiyazazi;

anindidlule nganto.

₃Kambe ke mna okunokwam ndifuna ukuthetha noSomandla,

ndiwaneke ndiwuxoxe naye lo mcimbi.

₄Ke nina nilibele kukugquma inyaniso ngobuxoki;

nifana nqwa neqithilili logqirha ongenakunyanga mntu.

₅Akwaba beningathi cwaka;

oko kuthula kwenu bekungaba bobona bulumko benu.

₆Khaniphulaphule xa ndixoxayo,

nive ukuzithethelela kwam.

₇Nicinga ukuba ningakuThixo, nide nikhuthaze intswela-bulungisa nje?

Nithi ninceda yena ngale nkohliso?

₈Ngaba nizama ukuthatha icala ngenxa yakhe?

Nifuna ukuthethela uThixo?

₉Nithi kunganjani xa anokuthi anigoca-goce?

Mhlawumbi naye nithi ningamkhohlisa ngale ndlela nibakhohlisa ngayo abantu?

₁₀Inene, uya kunohlwaya,

ukuba nenza isheyi ngokufihlakeleyo.

₁₁Ewe, ubungangamsha bakhe buya kunirhwaqelisa,

nonganyelwe kukunkwantya.

₁₂Kaloku ezi zangotshe zenu zifana nelahle elinothuthu;

zaye ke nezi ngxoxo zenu ziya kusumka ngathi ludongwe.”

₁₃“Sukan' apha! Khanindiyeke ndithethe utyhatyhiwe,

yehl' ehlayo!

₁₄Ngoku ndiza kuzibeka esichengeni,

ubomi bam bube semngciphekweni.

₁₅Noba selengade andigwinte andikhathali;

kodwa ukuxoxa oku ke kona ndiza kuxoxa,

ndiyandlale kuThixo imeko yam!

₁₆Mhlawumbi le nto yeyona ingandisindisayo,

kuba ke akukho saphula-mthetho singade sibe nokujongana naye.

₁₇Khanibaz' iindlebe nindiphulaphule,

niyiqwalasele ingcaciso yam.

₁₈Hayi ke, ngoku sendiqule ndaligangatha;

futhi ndiza kuyibeka imeko yam, ndixoxe ndiphume phambili.

₁₉Ngaba ukhona na ongabambana nam?

Kuba xa kunjalo ndothi cwaka ndife.

₂₀“Masivumelane ngezi zinto zimbini, Thixo,

ukuze ndingabi sazama kuzifihla kuwe.

₂₁Sirhoxise kum isandla sakho, sahlukane nam;

mandingabi sahlala ndirhwaqele ndisoyika wena.

₂₂Uze uthethe, ndiya kukuphendula;

okanye kuya kuthetha mna, ke wena uze undiphendule.

₂₃Bungakanani na ubugwenxa bam nesono sam?

Ndazise ubutyala nokona kwam.

₂₄Ngani ukuba undifulathele,

undithathe njengotshaba?

₂₅Ngoku sowusukelisana negqabi eliphephethekayo?

Uhlasela inkintshi-nkintshi yomququ?

₂₆Kaloku undimangalela ngezityholo ezinzima;

ude undityabeke ngobutyala bam basebuntwaneni.

₂₇Iinyawo zam uzikhonkxa ngezikhuni;

uyazigqala zonke iindlela zam,

uzicandele umda iintende zeenyawo zam.

₂₈Ngenxa yoko ndivuthuluka njengevithi;

sendifana nempahla edliwe ngamanundu.”