To The Word – Day 154

₁Isono esendele entliziyweni siyamngxolela umnt' ogwenxa,

asuke angamoyiki uThixo.

₂Simthi lwale ngokuzikhohlisa

angaliboni isikizi lobubi baso.

₃Intetho yakhe ayilunganga; izele yinkohliso.

Selephelelwe nakukwazi ukwenza okulungileyo.

₄Xa esemandlalweni ucinga amacebo aphuthileyo,

azimisele ukuhamba ngendlela egwenxa,

angayityesheli inkohlakalo.

₅Kodwa zona izibele zakho, Ndikhoyo, ziye kuthi gaa ngamazulu,

nentembeko yakho yaya kuthi ngqu ngamafu.

₆Ukulunga kwakho akugungqi, kunjengentaba;

zinzulu njengolwandle zona izigqibo zakho.

Uyabanakekela abantu nezilo, wena Ndikhoyo.

₇Hayi izibele zakho, Thixo, ebantwini!

Oonyana babantu bazimela phantsi kwephiko lakho.

₈Baxhamla intlutha yendlu yakho;

ubaseze kumlambo wokulunga kwakho.

₉Wena ulithende lobomi;

ngokhanyiso lwakho sibona ukukhanya.

₁₀Mazinganqamki izibele zakho kubo bonke abo bakwaziyo,

uwabonelele amalungisa.

₁₁Mandinganyhashwa ngeenyawo ngabanolunya,

ndingantlithwa zizandla zabagwenxa.

₁₂Bawile daxa abantw' abagwenxa;

bakhahlelwe phantsi, abavuka.

₁Mus' ukuziduba ngamatshijolo wena,

ungabamoneli abenzi bobubi.

₂Kwakamsinya baya kubuna njengengca,

bavuthuluke njengamagqabi.

₃Thembela *kuNdikhoyo wena, wenze okulungileyo;

uya kuba sisima-mhlaba, ube nekamva.

₄Zonwabise ngokululamela uNdikhoyo;

wokunika umnqweno wentliziyo yakho.

₅Zilahlele kuNdikhoyo, ukholose ngaye;

yena ke wokwenzelelela.

₆Wobutyhila bukhanye njengelanga ubulungisa bakho,

kucace mhlophe ukulunga kwakho.

₇Zola phambi koNdikhoyo, ulindele kuye,

ungazidubi ngabantu abaphumelela ngamaqhinga.

₈Zilumle emsindweni, uyilahle ingqumbo,

ungazidub' umphefumlo, hleze unxunguphale.

₉Kaloku othi shwaka amatshijolo,

kodwa boba zizima-mhlaba abathembele kuNdikhoyo.

₁₀Ngumzuzwana nje athi shwak' amatshijolo;

uthi uwakhangela ungawaboni.

₁₁Kodwa bona abathobekileyo bowuma umhlaba,

baxhamle intlutha noxolo.

₁₂Amatshijolo awenzela amayelenqe amalungisa,

awajamele ngentiyokazi enkulu.

₁₃Kodwa uNdikhoyo usuka acubhuke yintsini,

kuba uyazi yena ukuba imihla yamatshijolo selisongekile.

₁₄Arhola amakrele, ajolise iintolo zawo amatshijolo,

efun' ukuwisa iintsizana namahlwempu,

abulale amalungisa.

₁₅Otyakatywa kwangelawo ikrele,

zaphulwe nezo ntolo zawo.

₁₆Obo buncinanana linabo ilungisa,

bungcono kunentaphane ezinayo izikrelemnqa,

₁₇kuba uya kuzaphul' iimpondo uNdikhoyo izikrelemnqa,

awenzelelele wona amalungisa.

₁₈UNdikhoyo uyawabonelela amalungisa,

awenze awume umhlaba ngalo lonk' ixesha.

₁₉Akayi kuntshubaza ngamaxesh' endlala;

ohlutha naxa ikati selilel' eziko.

₂₀Ke zona iintshaba zikaNdikhoyo zotshabalala,

zibhange zixel' ingca etshayo edlelweni.

₂₁Izikrelemnqa ziboleka zingabuyisi,

ke lona ilungisa lipha ngesisa.

₂₂Boba zizima-mhlaba abo abathamsanqelayo uNdikhoyo,

bagxothwe abo abaqalekisayo.

₂₃NguNdikhoyo okhokelela umntu kwindlela amakahambe ngayo;

nguye omenza akholeke kuye.

₂₄Nokuba uwile, uyavuka,

kuba nguNdikhoyo omthundezayo.

₂₅Ndiyaluphala ngoku,

ukanti andizange ndilibone ilungisa lintshubaza,

nabantwana balo belamba.

₂₆Lisoloko libolekisa, lisipha ngesisa,

nenzala yalo iyathamsanqelwa.

₂₇Yahlukana nobubi, wenze okulungileyo;

uya kwalulelwa imihla yakho ebomini.

₂₈Kaloku uNdikhoyo uyakuthanda okulungileyo;

akayi kubafulathela abantu bakhe.

Wasoloko ebakhusela uNdikhoyo,

kodwa yona inzala yamatshijolo iyanqunyulwa.

₂₉Amalungisa aya kuba zizima-mhlaba,

ahlale ngoxolo kude kube nini.

₃₀Ilungisa lithetha amazwi obulumko;

into eliyithethayo isoloko

ilungile.

₃₁Lisoloko liwubambile umthetho kaThixo;

alisoze licebuke kuwo nanini na.

₃₂Itshijolo lisoloko lizungula ukubulala amalungisa,

₃₃kodwa uNdikhoyo akayi kuliyekela kumatshijolo ilungisa,

engayi kuliyekela lohlwaywe enkundleni yamatyala.

₃₄Thembela kuNdikhoyo, uthobele imithetho yakhe;

wokunika umhlaba uwume,

uwabone amatshijolo etshabalala.

₃₅Ndalibona lilawula ngegqudu itshijolo,

lilugxibha ngathi ngumkhoba wamahlathi.

₃₆Ndaphinda ndadlula apho, ndabona lingasekho;

ndalikhangela, andalifumana konke.

₃₇Kugqale ukulunga nobumsulwa,

kuba kumzisela uxolo umntu ekugqibeleni;

₃₈kodwa bona aboni baya kutshatyalaliswa,

nenzala yabo iphanziswe kuphele.

₃₉NguNdikhoyo umhlanguli wamalungisa;

ulikhaka lawo ngexesha lobunzima.

₄₀Nguye owancedayo, awahlangule,

awasindise kumatshijolo,

kuba akholose ngaye amalungisa.

₁*Ndikhoyo, ungandingxolisi ngomsindo,

ungandohlwayi ngengqumbo.

₂Zindityakatyile iintolo zakho,

nesandla sakho sindicinezele kabuhlungu.

₃Nditsho ndayingxwelerha ngenxa yomsindo wakho;

ndiyafa ziintlungu ngenxa yezono zam.

₄Ndintyumpa-ntyumpeka ezonweni;

zindisinda oku komthwal' onzima.

₅Zitsho zabhidla izilonda zam,

kuthi phuu ngenxa yobudenge bam.

₆Ndibandezelekile, ndiphelile,

kangangokude ndizile imini yonke.

₇Ndiyapena-pena ziintlungu;

andinampilo konke.

₈Ndoyisakele kwaphela;

ndiyagcuma ziintlungu nalixhala.

₉Nkosi yam, uyawazi umnqweno wam,

uyaziva zonke iincwina zam.

₁₀Ndinovalo, ndiphelelwe ngamandla,

namehlo am selebona kaluzizi.

₁₁Ke zona izihlobo nabamelwana abasondeli kum,

nkqu nentsapho yam le icezela phaya.

₁₂Bayandithiyela abafuna ukundibulala;

bayandoyikisa abazungula ukundenzakalisa;

bayandibhunga imini yonke.

₁₃Kodwa mna ndaba njengesithulu, andeva;

ndanjengesimumu, andawuvula tu umlomo.

₁₄Ewe, ndinjengomntu ongaphenduliyo,

kuba engeva.

₁₅Ndikhoyo, ndithembele ngawe;

nguwe, Nkosi, Thixo wam, oya kundiphendulela.

₁₆Ndithandazela nje ukuba ungabayeki bandivuyelele abo bahlekayo xa ndiwayo.

₁₇Ndingawa nanini na; kaloku iintlungu zindiphethe.

₁₈Sendizivuma izono zam; ndiyazithiya izigqitho zam.

₁₉Banamandla abo baziintshaba zam,

nâbo bandithiya kungekho sizathu.

₂₀Ubuhle bandibuyisela ngobubi,

naxa mna ndizama ukwenza okulungileyo.

₂₁Zungandifulatheli, Ndikhoyo;

Thixo wam, mus' ukuchasela kum.

₂₂Khawuleza undincede, Nkosi, Msindisi wam!

₁Ndathi: “Ndiya kuzilumkela iindlela zam,

ndingoni ngokuthetha,

ndilubambe ulwimi lwam xa ndiphakathi kwamatshijolo.”

₂Ndathi cwaka, andathetha nto.

Ukuthula kwam akuncedanga nto,

kodwa noko yona inkxwaleko yathath' unyawo.

₃Ndavalwa luvalo ndisacamanga,

ndavukwa ngumva-ndedwa,

ndavakala ndibuza ndisithi:

₄“*Ndikhoyo, ndazise isiphelo sobomi bam

nenani lemihla yokuphila kwam.

Ewe, ndazise ubufutshane bobomi bam.

₅Kaloku imihla yam uyicuthe kakhulu;

àyinto konke kuwe imihla yobomi bam;

umntu ufana nomphunga nje kuwe.

₆Uhla enyuke njengesithunzi silandelelana nomntu;

ubila esoma nje ngenxa yelize;

uqweba indyebo engazi nokuba yoba yekabani na.

₇“Xa kunjalo ke, Nkosi, mna ndikholose ngantoni?

Elam ithemba likuwe.

₈Ndikhulule kuzo zonke izono zam,

ndingade ndihlekwe nazizidenge.

₉Ndiya kuthi cwaka, ndingathethi,

kuba nguwe ondifake kule meko.

₁₀Mus' ukuba sandohlwaya;

mus' ukundinkula ndide ndenzakale.

₁₁Ngokumohlwaya umntu, umbonisa isono.

Uyidlavula njengenundu loo nto ayithandayo.

Ewe, kambe, umntu ufana nomphunga nje kuwe.

₁₂“Ndikhoyo, wubazel' iindlebe umthandazo wam;

ndive, ndakuzibika kuwe.

Ungàthi cwaka xa ndikhala kuwe,

kuba ndiselugcinweni lwakho,

nam ndisisibhadu-bhadu njengookhokho.

₁₃Khawundenzele umnyinyivana, khe ndiphefumle,

ngoku ndingekemki kweli hlabathi.”

₁Impendulo ethambileyo iyawuthibaza umsindo,

kanti ke wona amazwi akrwempayo ahlobisa igazi.

₂Izilumko ziphokoza ulwazi xa zithethayo;

kanti ke zona izityhakala zithulula ubudenge.

₃UNdikhoyo uyazibona zonke izinto ezenzekayo;

ubakhangele abenza okubi nokulungileyo.

₄Amazwi axolelanisayo angumthi wobomi;

ke wona awenkohlakalo ayawaphula umoya.

₅Umntu ongaqiqiyo akayikhathalele imfundiso kayise;

kambe ke yena ozamkelayo iziluleko unengqondo.

₆Ubutyebi buyagcinakala emzini womntu olungileyo;

kanti ke yona ingeniso yesikhohlakali isiphathela inkathazo.

₇Umlomo wesilumko usasaza ulwazi;

phofu ke akunjalo kwintliziyo yesityhakala.

₈Amadini omntu okhohlakeleyo alisikizi kuNdikhoyo,

kambe ke uyayamkela imithandazo yabantu abathe ngqo.

₉UNdikhoyo uyazicaphukela iindlela zabantu abakhohlakeleyo,

kodwa uyabathanda abo bathene mbende nezinto ezifanelekileyo.

₁₀Umntu ophambukayo endleleni wohlwaywa qatha;

ke yena okuthiyileyo ukululekwa uya kufa.

₁₁Ingcwaba nelabafileyo azifihlakalanga kuNdikhoyo;

zibeka phi ke ukungafihlakali iingcamango zomntu kuye?

₁₂Abagxeki abafuni kucetyiswa,

bengafuni nokuya nakwizilumko.

₁₃Umntu oxolileyo ukhangeleka enemihlali,

kanti ke yena oneenzingo uyanxuba.

₁₄Umntu onengqondo usoloko elangazelela ukufunda;

kanti ke sona isidovela saneliswa kukumatha.

₁₅Yonke imihla yomntu olusizana ngamabona-ndenzile,

kambe ke kumntu ochwayithileyo ubomi busoloko bufana netheko.

₁₆Kubhetele ukuba lihlwempu elihlonela uNdikhoyo

kunokuba sisinhanha esiphethwe ngamaxhala.

₁₇Xa ukho umoya wobudlelwana akunani nokuba utya imifuno,

ndaweni yokutya inyama yenkomo etyetyisiweyo ikhatshwa yintiyo.

₁₈Umntu onephuku uphembelela uqhushululu;

kanti ke yena onomonde uyayiphelisa ingxabano.

₁₉Indlela yevila soloko ibekelwe ameva;

phofu ke yona eyabathe ngqo iphangalele.

₂₀Unyana olumkileyo uyamvuyisa uyise;

ke yena umntu osisiyatha uyamdela unina.

₂₁Umntu ongabhadlanga engqondweni uvuyiswa bubi,

ke yena onengqondo ihambo yakhe ithe ngqo.

₂₂Apho kungekho kucebisana izicwangciso ziyabhanga,

kanti ke apho kukho abacebisi abaninzi ziyaphumelela.

₂₃Hayi ukuvuya komntu oyaziyo impendulo echanekileyo!

Ewe, ilizwi elithethwe ngexesha elililo lihle kunene.

₂₄Indlela yomntu onengqondo isinga phezulu ebomini;

yena uyayiphepha indlela ehlayo eya kwelabafileyo.

₂₅UNdikhoyo uyayidiliza imizi yabantu abanekratshi;

kanti ke uyawukhusela umhlaba womhlolokazi.

₂₆UNdikhoyo uyazicaphukela iingcinga zabantu abagwenxa;

kanti ezabanyulu zamkelekile kuye.

₂₇Umntu onyolukileyo uyihlisela inkathazo indlu yakhe;

ke yena okuthiyileyo ukunyotywa uya kudla ubomi.

₂₈Umntu olilungisa uyacinga phambi kokuba aphendule;

ke wona umlomo womntu okhohlakeleyo uphuphuma ububi.

₂₉UNdikhoyo ukude kubantu abakhohlakeleyo;

phofu ke uyayiphulaphula imithandazo yamalungisa.

₃₀Imbonakalo echwayitileyo izisa ulonwabo entliziyweni;

ibe ke zona iindaba ezimnandi ziyahlaziya emathanjeni.

₃₁Umntu ophulaphula ukucetyiswa uya kudla ubomi,

azive esekhaya phakathi kwezilumko.

₃₂Umntu ongayifuniyo ingqeqesho uyazilimaza yena ngokwakhe:

kanti ke yena ovayo akululekwa uzuza ukuqonda.

₃₃Ukuhlonela uNdikhoyo kufundisa ubulumko;

indlela eya ewongeni yintobeko.

₁Umntu uyazenza izicwangciso,

kodwa lona ilizwi lokugqibela lelikaNdikhoyo.

₂Zonke iindlela zomntu zilungile kwawakhe amehlo,

kodwa nguNdikhoyo ocikida iinjongo zazo.

₃Kunikele kuNdikhoyo konke okwenzayo,

yaye ke yena uya kuziphumelelisa izicwangciso zakho.

₄UNdikhoyo unenjongo ngayo yonke into;

ewe, kwanomntu lo ukhohlakeleyo umenzele imini yobubi.

₅UNdikhoyo umthiyile umntu ontliziyo inekratshi;

ngokuqinisekileyo ngekhe agwetyelwe.

₆Ngako ukuthembeka nokunyaniseka isono siyacanyagushelwa;

ngokuhlonela uNdikhoyo umntu uyabucezela ububi.

₇Ukuba uNdikhoyo uyakholiswa yihambo yomntu

neentshaba zakhe zitsho zihlalisane naye ngoxolo.

₈Akunani kwaintwana engephi oyizuze ngendlela elungileyo

kunentabalala yengeniso oyifumene ngondlela-mnyama.

₉Umntu uyalucwangcwisa uhambo lwakhe,

kodwa nguNdikhoyo olawula ukunyathela kwakhe.

₁₀Ukuthetha kukakumkani kuba ludaba olundilisekileyo;

umlomo wakhe mawungabi naxanasi xa agwebayo.

₁₁UNdikhoyo ufuna kusetyenziswe isilinganiso nesikali esingenagobe;

ubunzima bamatye okuveyisha mabube ngokwezigqibo zakhe.

₁₂Ookumkani bayabucekisa ubugwenxa;

kaloku uburhulumente buzinziswa bubulungisa.

₁₃Ookumkani bayakholiswa ngumntu onyanisekileyo;

ewe, bayamxabisa umntu othetha inyaniso.

₁₄Umsindo kakumkani sisigidimi sokufa;

ke yena umntu olumkileyo uyamthomalalisa.

₁₅Xa bukhululekile ubuso bukakumkani kudliwa ubomi;

ukwamkeleka kuye nqwa nemvula entlakohlaza.

₁₆Kulungile ukuzuza ubulumko kunokufumana igolide;

kungcono ukukhetha ulwazi kunokwamkela isiliva.

₁₇Umntu othe ngqo uhamba ngendlela ebucezelayo ububi;

ewe, oyalusayo indlela yakhe ulondoloza ubomi bakhe.

₁₈Ikratshi lilandelwa yimbubho;

ke kona ukudelela kutshayelela ukuwa.

₁₉Akunani kwaukugqush' eluthulini nabahlelelekileyo

kunokuxhaphaza amaxhoba nabakhukhumeleyo.

₂₀Umntu oyinonophelayo imfundiso uyaphumelela;

ewe, yimihlali yodwa kokholosa ngoNdikhoyo.

₂₁Isilumko esizinzileyo siduma ngengqondo;

ubuciko baso busenza silandelwe ngabantu.

₂₂Ingqiqo ngumthombo wobomi kwabo banayo;

kambe ke imfundiso yeziyatha bubudenge.

₂₃Isilumko siyawabala amazwi esiwathethayo;

intetho yaso isenza silandelwe ngabantu.

₂₄Amazwi amyoli nqwa nobusi;

ayanandipheka emphefumlweni, ephilisa emathanjeni.

₂₅Kukho indlela ebonakala ngokungathi ilungile emehlweni abantu,

kodwa isiphelo sayo sisa ekufeni.

₂₆Indlala imenza umntu ukuba asebenze;

ewe, iphango limtyhalela ekuxelengeni.

₂₇Itshijolo lihlala liqingqa ububi;

kwa-amazwi nje alo agqatsa njengomlilo.

₂₈Umntu onobugwenxa udala ingxabano;

umntu ohlebayo wahlukanisa izihlobo.

₂₉Indlavini iyamkhukulisa ummelwane,

imkhokelele kwimikhuba ephuthileyo.

₃₀Omana ewancina amehlo uceba ubugwenxa;

ohlala eluma umlomo utyekele ebubini.

₃₁Izimvi sisithsaba sobuhandiba;

zizuzwa ngabaphila ngobulungisa.

₃₂Onomonde ulungile kunegorha;

olawula umsindo wakhe ungcono kunothimba isixeko.

₃₃Abantu basenokulenza *iqashiso,

kanti ke ngumnwe kaNdikhoyo ofezekisayo.