To The Word – Day 217

₁*UNdikhoyo wasithi zinzi isixeko sakhe

phezu kwentaba engcwele.

₂Ewe, yena akaziva ngeZiyon;

ingaphezu kwayo yonke imizi yakwaYakobi.

₃Ewe, kuthethwa kamnandi ngawe, Ziyon, sixeko sikaThixo:

₄“Phakathi kwabo bandaziyo ndibalula iJiputa neBhabheli;

ewe, amaFilistiya, amaTire, namaKushe,

xa ewonke aphuma eJerusalem.”

₅IZiyon kuya kuthiwa ngunozala wezizwe zonke,

kuba uPhezukonke uyayixhasa.

₆Akuzidwelisa zonke izizwe uNdikhoyo,

xa zizonke zoba ngabemi baseJerusalem.

₇Iimvumi nabangqungqayo baya kuthi:

“Thina singabomthonyama.”

₁Emini ndibhenela kuwe, *Ndikhoyo, Msindisi wam;

nasebusuku ndizibika kuwe, Thixo wam.

₂Mawuvakale umthandazo wam kuwe;

ndive xa ndikhala kuwe, Thixo wam.

₃Kuba ndiphahlwe ziinkxwaleko;

sendimi phezu kwengcwaba.

₄Ewe, sendibalelwa kubafi;

akusekho yam kwaphela.

₅Sendinikelwe kwabafileyo;

sendifana nowoselweyo othe gangalala engcwabeni.

Ndinjengâbo ungasabakhumbuliyo,

abo bangasenakuncedakala.

₆Undithe tywa kwelimnyama ingcwaba,

ezantsi emathunjini omhlaba.

₇Ingqumbo yakho indisibekele,

amaza alatyuzayo andongamele.

₈Undihluthe izihlobo zam ezisenyongweni;

kungokunje ziyandenyanya.

Ndixinekile, futhi andisenakuphuncula;

₉ndiyayengezelisa ngenxa yembandezelo.

Ndikhoyo, ndikhala kuwe yonke imihla;

ndiphakamela kuwe ngomthandazo.

₁₀Imimangaliso ngaba uyenzela abafileyo na?

Boze bavuke bakudumise na?

₁₁Uthando lwakho luxelwa ngabafileyo na?

Ukunyaniseka kwakho kwaziwa kwantshabalala na?

₁₂Ngaba imimangaliso yakho yaziwa enzonzobileni na?

Okanye usindiso lwakho lusebenza kwelokulibala na?

₁₃Hayi bo! Ndikhoyo, ndibhenela kuwe;

ntsasa zonke ndizibika kuwe.

₁₄Awu, Ndikhoyo, ngani ukuba undilahle?

Ngani ukuba undifulathele?

₁₅Ndaxhwaleka ndasemngciphekweni kwandisemtsha;

ndiyangcungcutheka, andisento yanto.

₁₆Ingqumbo yakho iyandigubungela;

ewe, izithonga zakho zindicim' igama,

₁₇zindirhawula njengamanzi imini yonke,

zindigubungela ngeenxa zonke.

₁₈Undihluthe izihlobo nezizalwane zam;

ngoku sendihlobene nobumnyama kuphela.

₁*Ndikhoyo, ndiya kucula ngezibele zakho njalo-njalo;

ukuthembeka kwakho ndokubhengeza kuzo zonke izizukulwana.

₂Ndiya kububengeza obakho ububele ukuba soze butshitshe;

ukuthembeka kwakho ukuzinzisile emazulwini.

₃Kaloku wena wathi:

“Ndenze umnqophiso kunye nomnyulwa wam;

ndinqophisene nesicaka sam uDavide, ndathi:

₄‘Ndiya kuyimisela ngonaphakade inzala yakho;

ndoluxhasa ulawulo lwakho lungabi nasiphelo.’ ”

₅Amazulu ababaza imimangaliso yakho, Ndikhoyo,

ukuthembeka kwakho ebandleni lemilowo yakwakho!

₆Esibhakabhakeni ngubani onokulinganiswa nawe, Ndikhoyo,

ingubani kwabasemazulwini ofana nawe?

₇UnguThixo ohlonelwayo kwibandla labamsulwa;

umkhulu uyoyikeka ngaphezu kwabo bonke abakungqongileyo.

₈Ndikhoyo, Thixo onamandla onke,

ngubani oyingangamsha njengawe?

Ngeendlela zonke uthembekile!

₉Iilwandle ezinzongo-nzongo zilawulwa nguwe;

wena uyawazolisa amaza agugumayo.

₁₀Wena wasinyhasha isilo esikhulu saselwandle;

ngaloo mandla akho wazisarhaza iintshaba zakho.

₁₁Amazulu ngokunjalo nehlabathi lelakho;

ihlabathi nako konke okukulo kwasekwa nguwe.

₁₂Umntla nomzantsi wadalwa kwanguwe;

iintaba iTabhore neHermon ziyakudumisa.

₁₃Ubungangamsha bakho buyakhamnqisa;

ubugorha nobukroti bakho buyamangalisa.

₁₄Ulawulo lwakho lusekwe ngobulungisa nolungelelwano;

wena ukhokelwa bububele nokuthembeka.

₁₅Basethamsanqeni abantu abakubhengeza ngendumiso;

ewe, Ndikhoyo, abo basoloko bekufutshane nawe,

₁₆abonwatyiswa nguwe imini yonke,

bekudumisa ngenxa yobulungisa bakho.

₁₇Wena uyindili yokomelela kwabo;

batshatshele kuba baxhaswa nguwe.

₁₈LikuNdikhoyo ikhaka lethu;

ukumkani wethu uvela koyiNgcwele kaSirayeli.

₁₉Kwamandulo wena wathetha ngombono nâbo bathembekileyo, wathi:

“Ndiyithe jize ngembasa ingangalala;

ulawulo ndilunikele umfana okhethwe ebantwini.

₂₀Ndimfumene uDavide isicaka sam;

yena ndimthambise ngamafutha angcwele.

₂₁Ke ngoko isandla sam soba naye njalo-njalo;

ewe, uya komelezwa ndim.

₂₂Akasoze onganyelwe lutshaba,

nezibhoja soze zimthibaze.

₂₃Ndiya kuzinyhasha iintshaba zakhe,

ndibatshabalalise abo bamthiyileyo.

₂₄Ndohlala ndimthanda, ndilithemba lakhe;

ndiya kumenza ahlale eyintshatsheli.

₂₅Ulawulo lwakhe luya kuma ngeelwandle,

luya kuthi xhaxhe ngemilambo.

₂₆Uya kubhenela kum, athi: ‘Wena unguTata;

unguThixo wam, umqolomba ondihlangulayo.’

₂₇Yena uya kuba yinkulu yam,

abe yingangalala yookumkani behlabathi.

₂₈Ububele bam kuye buya kuma njalo-njalo;

umnqophiso wam naye soze utshitshe.

₂₉Ulawulo soze luphume endlwini yakhe;

Ewe, lona lohlala luhleli njengamazulu.

₃₀“Sothi isizukulwana sakhe sakundilahla,

ewe, sakuyilahla imiyalelo yam,

₃₁ukuba sithe sayaphula imimiselo yam,

asayithobela imithetho yam,

₃₂ndisohlwaye ngoswazi,

ndibakatse ngenxa yesono sabo.

₃₃Kambe ke soze ndipheze ukumthanda,

ingasoze inxaxhe intembeko yam.

₃₄Soze ndiwutshitshise umnqophiso wam,

lingasoze liwe phantsi ilizwi endalithethayo.

₃₅Ewe, kaloku ndafunga ubungcwele bam,

ngoko ke soze ndimxokise uDavide.

₃₆Indlu yakhe soze ithini nanini-nanini;

ulawulo lwakhe luqiniseke njengelanga.

₃₇Soze luthini, lunjengenyanga

yona ilingqina elithembekileyo elisesibhakabhakeni.”

₃₈Phi ke, ngoku umlahlile nje,

wanengcwangu ngakumthanjiswa wakho?

₃₉Uwutshitshisile umnqophiso wakho nesicaka sakho;

uyohluthile naloo mbasa yakhe.

₄₀Uzidilizile iindonga zesixeko sakhe;

uzitsho zangamabhodlo iinqaba zakhe.

₄₁Ngoku abadlulayo bayazixhwithela;

uyintlekisa nakubamelwane bakhe.

₄₂Wena uziphakamisile iintshaba zakhe;

iintshaba zakhe ziyamqholosela.

₄₃Ewe, ikrele lakho ulitsho layindunyuva;

ngoku usisisulu edabini.

₄₄Uwohluthile umsimbithi oliwonga lakhe,

walubhangisa ulawulo lwakhe.

₄₅Uyinqamle imihla yobutsha bakhe;

ewe, umthe wambu ngehlazo.

₄₆*Ndikhoyo, koda kube nini ufulathele – ngumlibe na?

Koda kube nini ivutha njengomlilo ingqumbo yakho?

₄₇Ndikhoyo, khawukhumbule ukuba bufutshane kwabo ubomi bam;

khumbula ukungabi nto kwabo ubomi bomntu.

₄₈Nguwuphi umntu oya kuhlala ngonaphakade,

ingubani ongaliphephayo ingcwaba?

₄₉Nkosi, zaya ngaphi izibele zakho zamandulo,

nditsho ezo wazifungela uDavide?

₅₀Nkosi, khawukubone ukungcikivwa kwesicaka sakho,

ndlela le ndijijithekiswa yintlamba yoluntu ngayo.

₅₁Ndikhoyo, iintshaba zihlekisa ngam;

ewe, ziphoxisa ngaye umthanjiswa wakho naphi na apho anyathela khona.

₅₂Huntshu-u-u! UNdikhoyo ngowokubongwa naphakade!

Makube njalo – ewe; amen!

₁Lowo uhleli ekhuselwe nguPhezukonke,

uhlala esemthunzini kaSomandla.

₂Yena uya kuthi: “*Ndikhoyo, ungumkhuseli wam;

uyinqaba yam, wena Thixo, ndiya kuthembela kuwe.”

₃Kuba nguye okuhlangula emgibeni wabakugcayiseleyo

nakubhubhani wesifo,

₄akwambathise ngamaphiko akhe, akufihle ekhusini lakhe,

kube likhaka nekhuselo lakho ukuthembeka kwakhe.

₅Akuyi koyika zingozi zasebusuku,

nakuhlaselwa ngequbuliso emini,

₆nabhubhani wangobusuku,

nasifo sigqugqisayo emini emaqanda.

₇Nokuba kungawa iwaka ecaleni kwakho,

neshumi lamawaka liwe likungqonge,

akusayi kuchukunyiswa nto wena.

₈Uya kuqwalasela ukubone ngamehlo akho

ukohlwaywa kwawo amatshijolo.

₉Ngenxa yokuba uthembele ngoNdikhoyo,

wamenza umkhuseli wakho uPhezukonke,

₁₀akuyi kuhlelwa bubi;

akuyi kusondela nasibetho emzini wakho.

₁₁Kaloku woziwisela umthetho ngawe izithunywa zakhe

wokuba zikugcine endleleni yakho,

₁₂zikufunqule hleze ukhubeke elityeni.

₁₃Wonyathela phezu kweengonyama neenyoka,

unyhashe amathol' eengonyama noogqoloma.

₁₄Ngenxa yokuba endithanda, ndomhlangula;

ndimphakamise, kuba elazi igama lam.

₁₅Akuzibika kum, ndiya kumva;

ndiya kuba naye ezimbandezelweni,

ndimhlangule, ndimbek' ezimbekweni,

₁₆ndimvuze ngobomi obude,

ndimbonise ukuba ndiyasindisa.

₁Yinto entle ukumbulela *uNdikhoyo;

yinto entle ukubonga igama loPhezukonke.

₂Kulungil' ukubalisa ngezibele zakhe kusasa,

nangokunyaniseka kwakhe ngokuhlwa,

₃kuvakala uncuthu lwengoma yeentambula,

nehapu itsho ngesongo sengom' emyoli.

₄Kub' undivuyisile, Ndikhoyo, ngezinto ondenzele zona;

ndokubonga ndinemincili ngenxa yemisebenzi yakho.

₅Hay' ukubaluleka kwemisebenzi yakho, Ndikhoyo!

Hay' ukuba nzulu kweengcamango zakho!

₆Isidenge asinakuyazi loo nto,

nesiyatha asinako ukukuqiqa:

₇le yokuba amatshijolo aya kubhangiswa,

nokuba selede amila njengokhula,

nokuba selede aphumelela.

₈Kaloku wena, Ndikhoyo, unguPhezukonke;

wena unguye nanini-nanini.

₉Iintshaba zakho, Ndikhoyo, zotshabalala kuphele,

kananjalo abhangiswe onke amatshijolo.

₁₀Undomeleze ndanga ndiyinyathi;

undithe jize ngombhiyozo nolonwabo.

₁₁Ndikubone ngala wam amehlo ukuwa kweentshaba zam;

ndiyive ngezi zam iindlebe intshabalalo yâbo bandizungulayo.

₁₂Amalungisa achuma njengesundu,

akhula njengemisedare yaseLibhanon.

₁₃Amilile emzini kaNdikhoyo;

ayakhula endlwini kaThixo.

₁₄Avelisa iziqhamo naxa selaluphele,

aqhelezele omelele.

₁₅Kutheth' ukuthi ke uNdikhoyo ulilungisa,

yena ngumkhuseli wam, akukho khwiniba kuye.