Leeto la boraro la Paula; tša Efeso
1Mehleng yeo ya ge Apollo a le motseng wa Korinthe, ke ge Paulo a feditše go sepela dinaga tša tletlolo, a fihlile motseng wa Efeso. Moo a hwetša barutiwa ba bangwe, 2A ba botšiša a re: A le filwe Moya o Mokgethwa mohla le dumelago?
Bona ba re: Aowa, ga re ešo ra kwa ge go na le Moya o Mokgethwa.
3Paulo a re: Gomme le kolobeditšwe ka efe kolobetšo?
Bona ba re: Ka kolobetšo ya Johane.
4Paulo a re: Johane o kolobeditše ka kolobetšo ya tshokologo, a fela a botša batho a re, ba dumele e a tlogo mo hlatlama, a era Kriste Jesu.
5Batho bao ge ba ekwa a realo, ba kolobetšwa leineng la Morena Jesu. 6Paulo a ba bea diatla, mme Moya o Mokgethwa wa tla go bona, ba bolela ka maleme a šele ba porofeta. 7Banna bao ka moka ga bona e be e ka ba ba lesome la metšo e mebedi.
8Paulo a fela a eya phuthegong ya Bajuda gwa fela dikgwedi tše tharo a ema a ba hlathollela ditaba tša mmušo wa Modimo, a ba eletša. 9Ge ba bangwe ba ithatafatša ba gana go dumela, ba bolela ka go senya thuto ya Modimo bathong, Paulo a ba tlogela, a arola barutiwa, a ruta ka mehla ngwakong wa thuto e bego e le wa Tiranno. 10Gwa dula go le bjalo gwa feta nywaga e mebedi. Bohle ba ba agilego dinageng tša Asiana ba kwa thuto ya Morena Jesu, ba Bajuda le ba Bagerika.
11Modimo a dira ditiro tše maatla tše di tlabago ka diatla tša Paulo. 12Ba ba ba tšea mašelana a gagwe a go phomola dikudumela, le a bego a a apere, ba apeša balwetši ka ona, ba napa ba tlogwa ke malwetši, le meoya e mebe ya tšwa. 13Bajuda ba bangwe ba go šika le naga e le baleleki ba meoya e mebe, ba leka go bola leina la Morena Jesu ge ba na le ba ba tsenwego ke meoya e mebe, ba re: Re le leleka ka Jesu, yo Paulo a mmolelago. 14Ba ba bego ba dira ka mokgwa woo, e be e le barwa ba ba šupilego ba Mojuda e mongwe Sekefa moperisita e mogolo.
15Moya o mobe wa fetola wa re: Jesu ke a mo tseba! Le Paulo ke a mo tseba! Lena gomme le bomang!
16Motho eo wa moya o mobe a napa a ba wela godimo, o ba katelela, a ba bunakela, ba ba ba tšhaba ngwakong ba hlobotše ba gobetše. 17Taba ye ya kwala mo go Bajuda ka moka le go Bagerika ba ba agilego Efeso; bohle ba welwa ke poifo. Leina la Jesu ba le sema le legolo. 18Ba bantši ba ba dumetšego ba tla ba bobola ba ipolela mediro ya bona. 19Ba bantši ba ba bego ba dirile tša bonoge kgale, ba kgobokanya dipuku tša mohuta woo, ba di fiša pepeneneng. Ge ba bala theko ya tšona, ba hwetša e le ya mašeleng a dikete tše masome a mahlano. 20Lentšu la Morena la enela ka mokgwa woo e le le maatla le fenya.
21Dilo tše ge di direga, ke ge Paulo a eleletša pelong ya gagwe, a re o tlo phatša naga ya Matsedonia le ya Akaya, a tlo tsebo ya Jerusalema; a re: Ge ke boa moo, ke mo ke tlogo ya Roma, gobane go swanetše ge le motse woo ke o bona. 22A roma banna ba babedi ba ba bego ba mo direla, Timotheo le Erasito; bona ba ya Matsedonia, yena a fetša lebaka a sa le nageng ya Asiana.
23Mehleng yeo gwa tsoga mpherefere o mogolo wa ba ba ganetšago thuto ya Morena. 24Ke wa Demetrio morudi wa tshipitshehla, e a bego a dira pheko tša Diana ka yona tshipi yeo, a thwala bomakgone ba modiro woo, a ba humiša gagolo ka wona. 25Demetrio a rapa batho, le badiri ba dilo tšeo, a re: Banna! Le tseba gobane re phela ka wona modiro wo. 26Bjale le a di bona, gomme le a di kwa. Paulo yo o gakišitše batho ba bantši, e sego ba Efeso fela, o nyakile go hlakanya ba Asiana ka moka ka go ba fora a re: Tše di dirwago ka diatla tša batho ga se medimo. 27Gomme ga se gore kotsi ya go senyegelwa e wela modiro wa rena fela; le ngwako wa Diana modimogadi e mogolo o tlo thwe ke lefela. Bogoši bja wona bo tlo nyatšega, mola ba Asiana ka go fela, le ba mafase ohle, ba loba fa.
28Ge ba mo kwa a realo, ba tlala bogale, ba goa ba re: Diana wa Baefeso ke e mogolo! 29Mpherefere wa hlakanya motse; ba tšhologela kgorong ya dipapadi ba le pelotee; ba tla ba goga Gayo le Aristareko ba Matsedonia bafelegetši ba Paulo. 30Paulo ge a rata go tsena gare ga lešaba leo, barutiwa ba mo thibela. 31Le ba bangwe ba babuši ba Asiana ba ba bego ba gwerane le yena, ba roma motho ba mo rapela ba re a se ke a ya kgorong. 32Moo go be go godile lešata la bano ba bego ba goa tša bona, le bala ba goa tša bona, e le lešaba le le ferekanego; ba bantši e le ba ba sa tsebego se ba se bokanetšego. 33Ba bangwe ba lešaba ba ntšha Alesandere, yo Bajuda ba bego ba mo hlaotše. Alesandere a akalatša seatla, a rata go homotša mašaba ao a batho. 34Fele, ge ba mmona e le Mojuda, ba tšhologa legoa la maletee ba re: Diana wa Baefeso ke e mogolo! Gwa ba gwa feta nako tše pedi ba sa goa ba realo.
35Lešaba la homotšwa ke mokgoma wa motse; a bolela a re: Banna ba Efeso! Ke mang motho e a sa tsebego ge motse wa Efeso e le Molotangwako wa Diana wona modimogadi o mogolo, le wa seswantšho sa wona sa go tšwa legodimong go Jupitere? 36Bjale ge taba ye e sa ganetšege, go kaone ge le ikhomolela, le se dire ka maphakaphaka. 37Banna ba le ba tlišitše fa ba sa ka ba hlakola ntlo ya modimo, ba sa roga modimo wa lena. 38Ke gona, ge Demetrio le badirišani ba gagwe bomakgone ba hweditše molato go motho, a ba tle ba seke, gobane dikgoro di gona, le bakgoma ba gona. 39Ge go ka ba le tše dingwe tše le di nyakago, a di ahlolwe pitšong e yago ka molao. 40Le gona, go ka ba gwa begwa borena ka molato wa moferefere wo wa lehono; gobane ga go se re kago phema ka sona ge go thwe: Le be le reng le tsoša moferefere? -- Ge a realo, a phatlalatša lešaba.
