Jeremia o tsogelwa ke bagolo ba setšhaba
1Mathomong a pušo ya Joyakima morwa wa Josia kgoši ja Juda Jeremia o tletšwe ke lentšu la Morena la re: 2Morena o re: Yaa o eme lapeng la ngwako wa Morena; mme bohle ba metse ya Juda ba ba tlago go rapela Ngwakong wa Morena o ba botše mantšu a ke go laelago ona; o se tlogele le letee la ona. 3Mohlomongwe ba tlo kwa, ba boa bohle ba lahlile tsela tše mpe tša bona. Ke mo le nna ke tlogo thiša ka gomiša bošula bjo ke gopotšego go ba dira bjona ka baka la bobe bja mediro ya bona.
4Ba botše o re: Morena o re: Ge le sa kwe se ke se bolelago, la tšea ka tsela ya molao wa ka wo ke o beilego pele ga lena, 5Ge le sa kwe se baporofeta ba ka ba se bolelago, bahlanka ba ka bao ke fedilego ke ba romela go lena, mme lena le se ba kwe, 6Gona Ngwako wo ke tlo o dira tšela tša Silo, ka lesa leina la motse wo e eba leroga mo ditšhabeng tša lefase.
7Gomme baperisita, le baporofeta, le setšhaba ka moka, ba kwa Jeremia ge a bolela mantšu ao Ngwakong wa Morena. 8Ya re ge a feditše go a bolela ka moka, mantšu ao a Morena a bego a mo laetše go a botša setšhaba ka moka, ba mo swara ba re: Sa gago ke go bolawa! 9O reng o porofeta ka leina la Morena wa re: Ngwako wo o tlo ka Silo, motse wo e tlo ba lešope, wa se ke wa dulwa ke motho? Setšhaba ka moka sa mo kgobakanela moo ngwakong wa Morena.
10Bakgoma ba Juda, ge ba ekwa tšeo, ba rotogela Ngwakong wa Morena ba etšwa ngwakong wa kgoši, ba tla ba dula kgorong e mpsha ya Morena. 11Baperisita le baporofeta ba bolela le bakgoma bao le setšhaba ka moka ba re: Monna yo a a ahlolelwe lehu, gobane o porofetetše motse wo ka mo le mo kwelego ka ditsebe tša lena.
12Jeremia a bolela le bakgoma, le setšhaba ka moka, a re: Nna ka romilwe ke Morena gore ke porofetele Ngwako wo le motse wo mantšu ao ka moka a le a kwelego. 13Bjale swarang ka tsela tše botse, le dire mediro e botse, le kwe tše Morena Modimo wa lena a di boletšego, ke mo Morena a tlogo thiša a lesa go tliša bošula a bo boletšego a era bolena. 14Ge e le nna, ke nna e ke matsogong a lena; ntireng ka mo le bonago e le botse. 15Fela, le tsebe ruri, ge le ka mpolaya gona lena le motse wo le baagi ba wona, le tlo oba molato wa madi a se nago molato, gobane ka kgonthe, nna Morena o nthomile go bolela ditaba tšeo ditsebeng tše lena.
16Ke mo bakgoma le setšhaba ka moka ba boletšego le baperisita le baporofeta, ba re: Ga go ka mo monna yo a kago ahlolelwa lehu, ka gobane o boletše le rena ka leina la Morena Modimo wa rena.
17Gwa ema le banna ba bangwe ba bagolo ba naga, ba bolela le phuthego ka moka ba re: 18Mehleng ya Hiskia kgoši ya Juda go kile gwa porofeta Mika wa Moresethe, a bolela le setšhaba ka moka a re: Tsione go tlo lengwa boka tšhemo, Jerusalema go tlo ba marako, mme thaba ya Ntlokgethwa e tlo ba ya lerobo (Mika 3:12). 19A fa Hiskia kgoši ya Juda, a na le ba Juda ka moka, a monna eo ba mmolaile? A ga a ka a boifa Morena, a rapela; mme Morena a thiša a lesa go tliša bošula bjoo a bo boletšego a era bona? Bjalo rena re itshenya ka go dira bokgopo bjo bogolo.
20Le monna e mongwe o be a le gona, e a bego a porofeta ka leina la Morena, ke Uria morwa wa Semaya wa Kiryate-Jearima. Le yena o porofetetše motse wo mantšu a a swanago le ona a ka moka a Jeremia. 21Mantšu a gagwe a kowa ke kgoši Joyakima le ditona tša gagwe le bakgoma ka moka. Kgoši ya rata go mmolaya. Uria a sebelwa, a boifa, a tšhabela Egipita. 22Kgoši Joyakima a roma banna ba ya Egipita; e be e le Elinathani morwa wa Akiboro; le banna ba bangwe ba ya le yena gona kua Egipita. 23Ba swara Uria, ba mo tliša go kgoši Joyakima; yena a mmolaya ka lerumo. Setoto sa gagwe a se lahlela mabitleng a ba e lego batho fela.
24Ge e le Jeremia, yena a emelwa ke Ahikama morwa wa Safani, a se gafelwe matsogong a setšhaba, a se bolawe.
