Jobe 19

₂“Nitangivisa buhlungu kuze kube ngunini,

solo ningishushumbisa ngemavi labuhlungu?

₃Sengemahlandla lalishumi nyalo

solomane ningitsela ngetinhlamba,

nite nemahloni ekungetfuka.

₄Nangabe kuliciniso phela kutsi ngedukile,

lelo phutsa liphutsa lami ngedvwana.

₅Nangabe ngempela ningatiphakamisa,

nitente ncono kunami,

nisebentise lesehlakalo lesingehlele

kutsi nimelane nami,

₆yatini-ke kutsi nguNkulunkulu longonile,

wangigigela ngelugibe lwakhe.

₇“Naloku ngikhala: ‘Ngimi lengoniwe!’

Kodvwa angiphendvulwa;

naloku ngicela lusito,

kute kwetsembeka.

₈Utivalile tindlela tami,

entela kutsi ngingakhoni kwendlula,

wembatsise tindlela tami ngebumnyama.

₉Ungembule kuhlonipheka kwami,

wesusa umchele wami enhloko yami.

₁₀Ungidladlabula ngala nangala ngize ngingabikho,

uzuphuna litsemba lami njengelukhula.

₁₁Lulaka lwakhe luyangivutsela,

ungibala kanye netitsa takhe.

₁₂Emabutfo akhe ayashuca atengihlasela,

akha tindvundvuma tekungivimbetela,

akambe atungeleta likhaya lami.

₁₃“Ungehlukanise nebazalwane bami, bangigucukela,

sengehlukene nalabo bengetayelene nabo.

₁₄Tihlobo tami tingishiyile,

bangani bami bangikhohliwe.

₁₅Tivakasheli tasekhaya kami

setiyangiphika kutsi tiyangati;

nesisebenti lesisikati sasekhaya kami

sesitsi ngisihambi,

sebangitsatsa njengemhambuma.

₁₆Nome ngitsi ngibita sisebenti sami, asisasabeli,

nome sengisicela mine,

ngisincenga ngemlomo wami.

₁₇Umphefumulo wami sewuyanuka kumfati wami,

kubomnaketfu sengiyenyanyeka.

₁₈Ngisho nekwebafanyana lokuncane sekuyangedzelela,

nangitsi ngiyachamuka,

bachwebana ngami bahleke.

₁₉Bonkhe bangani bami

lebengitsi bevakala ekhaleni

sebayacansuka ngami;

labo labatsandzekako kimi sebangigucukele.

₂₀Sengingumbambo tiyabalwa,

ngisindze ngekulambisa.

₂₁“Mane sale ningihawukela, bangani bami,

mane sale nihawukela mine,

sandla saNkulunkulu singinhlakayile.

₂₂Ningishophelani, nani nilingise Nkulunkulu

lolibele kucoshana nami?

Anisenakweneliseka yini kani

ngalokubola kwesikhumba semtimba wami?

₂₃“Awu! Kube fane lamagama ami lengiwakhulumako

abengabhalwa phansi,

kube fane abengabhalwa encwadzini legocotwako,

₂₄kube fane abengacoshwa ngelusungulo emtfofini,

nome acoshwe edvwaleni laphakadze naphakadze.

₂₅Kodvwa mine ngiyati

kutsi uMhlengi wami uyaphila,

nekutsi ekugcineni utakuma etikwalomhlaba.

₂₆Ngisho nome umtimba wami sewubhujisiwe,

kodvwa noko emtimbeni wami ngiyawumbona Nkulunkulu.

₂₇Mine cobo lwami ngiyawumbona ngewami emehlo,

mine lo, hhayi lomunye.

Maye, inhlitiyo yami seyiyamlangatelela!

₂₈“Naningatsi: ‘Siyawumkhandzelwa ngubani,

njengaloku imphandze yayo yonkhe lenhlupheko ikuye?’

₂₉Kufanele nani nesabe inkemba,

ngobe lulaka lwakhe luyakwehlisa sijeziso ngayo inkemba,

ngulapho niyawufundza nicondze khona

kutsi kukhona kwehlulelwa.”