NEHEMIA 10

₁Ya re di šetše di eme ka mokgwa wo, ra dira kgwerano, ra e ngwala; mme bakgoma ba rena, le Balefi ba baperisita ba rena, ba bea seka sa bona mo lengwalong leo.

₂Ba ba beilego seka šeba: Ke Nehemia molakanaga morwa wa Hakalia, le Tsedekia, ₃le Seraya, le Asaria, le Jeremia, ₄le Pashuri, le Amaria, le Malakai, ₅le Hatusi, le Sebanya, le Maluka, ₆le Harima, le Meremothe, le Obadya, ₇le Daniele, le Ginithoni, le Baruki, ₈le Mesulama, le Abia, le Miyamini, ₉le Maasia, le Biligai, le Semaya. Ke bona baperisita. ₁₀Ba Balefi e be e le: Jeshua morwa wa Asanya, le Binui. Wa ga Henadadi e be le Kadimiele, ₁₁le bona ba bobona boSebanya, le Hodia, le Kelita, le Pelaya, le Hanani, ₁₂le Mika, le Rehobo, le Hasaya, ₁₃le Sakuri, le Serebya, le Sebanya, ₁₄le Hodia, le Bani, le Beninu. ₁₅Bagolo ba setšhaba e be e le Pareose, le Phahathe, Moaba, le Elama, le Sathu, le Bani, ₁₆le Banu, le Asigadi, le Bebai, ₁₇le Adonia, le Bigifai, le Adina, ₁₈le Atere, le Hiskia, le Asuri, ₁₉le Hodia, le Hasuma, le Betsai, ₂₀le Harifa, le Anathothe, le Nebai, ₂₁le Magapia, le Mesulama, le Hesira, ₂₂le Mesesabiele, le Tsadoko, le Jadua, ₂₃le Pataya, le Hanani, le Anaya, ₂₄le Hosea, le Hananya, le Hasuba, ₂₅le Halohese, le Pilika, le Sobeke, ₂₆le Rehuma, le Hasabana, le Maaseya, ₂₇le Abia, le Hanani, le Anani, ₂₈le Maluka, le Harima, le Baana.

₂₉Le ba bangwe ba setšhaba, ba baperisita le Balefi, le baletakgoro, le baopedi, le bahlanka ba Ntlokgethwa, le bohle ba ba bego ba ikarogantše le ditšhaba tša dinaga tšeo mme ba bušwa ke molao wa Modimo, le basadi ba bona, le barwa ba bona, le barwedi ba bona, bohle ba ba bego ba na le tlhaologanyo, ₃₀ba tiiša gotee le bana ba bobana ba bagolo, ba ena ba itlema ba re ba tlo swara ka tsela ya molao wa Modimo, wo a o beilego ka Moshe mohlanka wa gagwe, le gore ba tlo o hlokomela, ba dira ka ditaelo ka moka tša Morena Modimo wa rena, ba gomarela mokgwa wa gagwe, ₃₁ra re: Barwedi ba rena re ka se ke ra ba nea ba ditšhaba tša naga ye, mme barwa ba rena ba ka se ke ba tšea barwedi ba bona.

₃₂Le gona ra re: Ge ba ditšhaba ba ka tliša tša go bapatša, e ka ba mabele a mehutahuta, ba a bapatša ka letšatši la Sabatha, re ka se ke ra ba rekela ka la Sabatha, le ge e le ka tšatši le lengwe le lekgethwa; mme ra re: Ka ngwaga wa go šupa re tlo lesa naga ya khutša, ra lesa go bela melato.

₃₃Ra ipeela molao wa go re re tlo ntšha sa boraro sa sekele ka ngwaga, ya ba sa go direla Ngwako wa Modimo wa rena, ₃₄gore go bewe dinkgwaponwa, le dibego tša ka mehla, le sehlabelo sa ka mehla le sa Sabatha le sa kgwedi e mpsha le sa menyanya; le dileboga le diloba tša ge Isiraele a direlwa poelanyo; go dirwe mediro ka moka ya Ngwako wa Morena.

₃₅Ra diriša baperisita le Balefi matengwa ka baka la go rwalela dikgong Ngwakong wa Morena, ba fapakanya medirong ka go ya ka meloko le ka mabaka a ngwaga, ba di iša aletareng ya Morena Modimo wa rena ka mo go ngwadilwego molaong.

₃₆Ra re: Re tlo ntšha dithakangwaga tša mašemo a rena, le dithakangwaga tša dienywa tša dihlare ka moka; di tlišwe Ngwakong wa Morena ka ngwaga o mongwe le o mongwe.

₃₇Le barwa ba rena ba maitšibulo, le maitšibulo a diruiwa tša rena, re a tliša ka mo go ngwadilwego molaong, e lego maitšibulo a dikgomo le a dinku tša rena, a tlišwe Ngwakong wa Modimo wa rena go baperisita ba ba swerego modiro Ngwakong wa Modimo wa rena.

₃₈Re tliše le dithakangwaga tša bupi bja diekaro, le tša dienwya tša dihlare ka moka, tša morara le tša mohlware; re di tliše diphapošing tša Ngwako wa Modimo wa rena; le sa lesome sa mašemo a rena se ntšhetšwe Balefi, gore Balefi ba newe dikarolo tša lesome metseng ka moka e nago le malemo. ₃₉Ge Balefi ba ntšhiša batho sa lesome, go tlo tla le moperisita wa leloko la Arone; mme sa lesome sa dikarolo tšeo se išwe Ngwakong wa Modimo, ba di boloke diphapošing tša Ngwako wa polokelo. ₄₀Gobane diphapošing tšeo Baisiraele le Balefi ba tlo boloka diekaro tša mabele le tša morara le mohlware, gobane ke mo go bolokwago thoto e kgethwa, ke mo go lego baperisita ba go dira mediro e mekgethwa, le baleti ba dikgoro, le baopedi.

Gobane ga re rate go lahla Ngwako wa Modimo wa rena.