Risimu ra Muxe.
1Kutani Muxe ni vana va Israele va yimbelela eka Yehovha risimu leri, va ku:
“Ndzi ta yimbelela Yehovha, hikuva u titlakusile ngopfu;
U wisile lwandle hanci ni mukhandziyi wa yona.
2Yehovha i matimba ya mina, ni risimu ra mina;
Hi yena Mukutsuri wa mina.
Hi xona Xikwembu xanga; ndzi ta xi dzunisa;
I Xikwembu xa tatana, ndzi ta xi twarisa.
3Yehovha i nhenha ya matimba,
Vito ra yena i Yehovha.
4“U wisile lwandle makalichi ya Faro, ni nyimpi ya yena;
Tinhenha ta yena leti hlawuriweke ti dyiwe hi Lwandle ro Tshwuka.
5Magandlati ma va funengetile;
Va mbombomerile exidziveni kukotisa ribye.
6“Voko ra wena, Yehovha, ri twakale hi matimba;
Voko ra xinene ra wena,
Yehovha, ri pyanyise valala.
7Evukulwini bya vuhosi bya wena,
U wisile lava nga ku pfukela matimba;
U humese ku kariha ka wena,
Ku va hisa kukotisa mungu.
8“Hi ku hefemula ka tinhompfu ta wena,
mati ma hlengeletanile,
Mati lama tsutsumaka ma yimisiwile,
ma endle khumbi;
Magandlati ma tiyile xikarhi ka lwandle.
9Nala u te:
‘Ndzi ta hlongorisa ndzi khoma, ndzi phanga.
Moya wa mina wu ta titsakela ha vona;
Ndzi ta hlomula tlhari, ndzi va dlaya.’
10U huhutile hi ku hefemula ka wena:
Elwandle ri va funengeta;
Va mbombomela kukotisa ntsopfu,
Exidziveni xa ku enta xa mati.
11“I mani la fanaka na wena,
Yehovha, exikarhi ka swikwembu!
I mani la kwetsimaka,
la tengeke kukotisa wena,
La fanelaka ku dzunisiwa hi tinsimu,
U endle masingita!
12U tshambulutile voko ro wena ra xinene,
Misava yi va mita.
13“Hi tintswalo ta wena u fambisile u tshunxile tiko leri;
U ri fambisile hi matimba ya wena,
Evutshan'weni bya ku kwetsima ka wena.
14Matiko, loko ma swi twa, ma rhurhumela;
Vafilista va khomiwa hi ku chava.
15Tihosana ta Edomu ta rhurhumela;
Tinhenha ta Mowabu ti dlayiwa hi mapfalo;
Vaaki hinkwavo va Kanana va khomiwa hi ku rhurhumela.
16Ku chava ni ku rhurhumela ku ta va wela ehenhla;
Hi voko ra wena ra matimba
Va ta hundzuka timbheveve leti fanaka ni maribye,
Ku kondza tiko ra wena ri pela, oho Yehovha!
Ku kondza ku pela tiko leri u ri kutsuleke.
17U ta va fikisa, u va simeka entshaveni ya ndzhaka ya wena,
Exivandleni lexi u tiendleleke xona ku tshamisa kona, oho Yehovha!
Eku kwetsimeni loku endliweke hi mavoko ya wena, Hosi!
18Yehovha u ta fuma hi masiku lama nga heriki.”
19Hikuva tihanci ta Faro ni makalichi ya yena,
Ni vakhandziyi va swona va nghenile elwandle,
Kutani Yehovha u tlherisile mati ya lwandle henhla ka vona;
Kasi vana va Israele va fambile laha ku omeke exikarhi ka lwandle.
20Kutani Meriyamu, muprofeta, makwavo wa Aroni, a teka dzandzana evokweni ra yena, kutani vavasati hinkwavo va huma, va n'wi landza, va ri ni madzandzana, va cina.
21Meriyamu a pfumelelana na vona, a ku:
“Tlangelani Yehovha,
hikuva u tikurisile ngopfu;
U wisile lwandle hanci ni mukhandziyi wa yona.”
Ta mati ya Mara.
22Kutani Muxe a suka ni Vaisraele eLwandle-ro-Tshwuka, va famba hitlhelo ra mananga ya Xuru; kutani va famba masiku manharhu emananga va nga kumi mati. 23Va fika eMara, kambe va tsandzeka ku nwa mati ya Mara hikuva a ma bava hikwalaho xivandla lexi xi thyiweke vito ra Mara (ku bava). 24Kutani tiko ri holovela Muxe, ri ku: “Hi ta nwa yini?”
25Kambe Muxe a khongela Yehovha hi matimba, kutani Yehovha a n'wi kombisa murhi leswaku a wu hoxa ematini. Kutani mati ma nandziha. Hi kona a nga va vekela milawu ni ku lerisa, a va ringa, a ku: 26“Loko u yingisa rito ra Yehovha, Xikwembu xa wena, u endla leswi lulameke emahlweni ka yena, loko u rhiya ndleve eku leriseni ka yena, kutani u hlayisa milawu ya yena hinkwayo, ndzi nga ka ndzi nga ku tiseli makhombo lama nga wela Vaegipta; hikuva hi mina Yehovha muongori wa wena.”
27Kutani va fika eElimi; va kuma swihlovo swa khume na swimbirhi ni mimpfun'wana ya ntlhanu wa makume na makume mambirhi. Kutani va dzima mitsonga ya vona ekusuhi ni mati.
